ဟေရှာယ ၆၀:၁-၂၂
၆၀ “အို အမျိုးသမီး၊+ ထပြီး အလင်းထွန်းလင်းပါ။ မင်းရဲ့အလင်း ပေါ်ထွန်းပြီ။
မင်းအပေါ် ယေဟောဝါရဲ့ ဘုန်းတန်ခိုး ထွန်းလင်းပြီ။+
၂ ကြည့်ပါ။ ကမ္ဘာမြေကို မှောင်မိုက် ဖုံးလွှမ်းလိမ့်မယ်။
လူမျိုးတွေကို အမှောင်ထု ဖုံးလွှမ်းလိမ့်မယ်။
မင်းအပေါ်မှာတော့ ယေဟောဝါ အလင်းထွန်းလင်းမယ်။
မင်းအပေါ်မှာ ဘုန်းတန်ခိုးတော် ထင်ရှားမယ်။
၃ လူမျိုးတွေက မင်းရဲ့အလင်းဆီ ရောက်လာမယ်။+
ဘုရင်တွေက+ မင်းရဲ့တောက်ပတဲ့ အလင်းဆီ လာကြမယ်။+
၄ ပတ်လည်ကို ကြည့်လိုက်ပါ။
သူတို့အားလုံး စုဝေးပြီး မင်းဆီ လာနေတယ်။
မင်းရဲ့သမီးတွေကို ပွေ့ချီပြီး လာနေကြတယ်။+
မင်းရဲ့သားတွေကလည်း အဝေးက လာနေတယ်။+
၅ မင်းဆီ ပင်လယ်ရဲ့စည်းစိမ် ဦးတည်လာနေတဲ့အတွက် အဲဒါကို မြင်တဲ့အခါ မင်းရွှင်မြူးလိမ့်မယ်။+
ပျော်လွန်းလို့ ရင်တလှပ်လှပ် ခုန်လိမ့်မယ်။
လူမျိုးတွေရဲ့ ပစ္စည်းဥစ္စာတွေကလည်း မင်းဆီ ရောက်လာမယ်။+
၆ တိုင်းပြည်မှာ ကုလားအုတ်တွေ၊မိဒျန်ပြည်နဲ့ ဧဖာပြည်ကလာတဲ့+ ကုလားအုတ်ပျိုတွေ ပြည့်နေလိမ့်မယ်။
ရှေဘပြည်သားအားလုံးလည်း ရွှေနဲ့လောဗန်ကို သယ်ပြီး ရောက်လာမယ်။
ယေဟောဝါကို လူသိရှင်ကြား ချီးမွမ်းကြလိမ့်မယ်။+
၇ ကေဒါပြည်ရဲ့+ သိုးအုပ်တွေလည်း မင်းဆီမှာ စုဝေးကြလိမ့်မယ်။
နဗာယုတ်ပြည်ရဲ့+ သိုးထီးတွေက မင်းဆီမှာ အမှုထမ်းမယ်။
ငါ့ပူဇော်ရာပလ္လင်ပေါ် သူတို့တက်လာတဲ့အခါ ငါလက်ခံမယ်။+
ခမ်းနားတဲ့ ငါ့အိမ်တော်ကို လှပတင့်တယ်စေမယ်။+
၈ မိုးတိမ်တွေလို၊ အသိုက်ဆီ ပြန်လာတဲ့ ချိုးငှက်တွေလို ပျံသန်းလာနေတာ ဘယ်သူတွေပါလိမ့်။
၉ ကျွန်းသူကျွန်းသားတွေက ငါ့ကို မျှော်လင့်ကြလိမ့်မယ်။+
တာရှိသင်္ဘောတွေက မင်းရဲ့သားတွေကို တင်ဆောင်ပြီး အဝေးကနေ လာလိမ့်မယ်။+
သူတို့က ယေဟောဝါဘုရားရဲ့ နာမည်အတွက်၊အစ္စရေးတို့ရဲ့ သန့်ရှင်းတဲ့အရှင်အတွက် ရွှေငွေတွေ ယူဆောင်လာမယ်။
အဲဒီအရှင်က မင်းကို ဂုဏ်တင်ချီးမြှောက်မယ်။+
၁၀ တိုင်းတစ်ပါးသားတွေက မင်းရဲ့မြို့ရိုးတွေကို တည်ဆောက်မယ်။
သူတို့ရဲ့ဘုရင်တွေက မင်းဆီမှာ အမှုထမ်းမယ်။+
ငါ အမျက်ထွက်ပြီး မင်းကို ဒဏ်ခတ်ခဲ့တယ်။
ဒါပေမဲ့ မျက်နှာသာပေးပြီး ကရုဏာပြမယ်။+
၁၁ လူမျိုးခြားတို့ရဲ့ ဘုရင်တွေဟာ ပစ္စည်းဥစ္စာတွေကို ဦးဆောင်ပြီး သယ်လာနိုင်အောင်+
မင်းရဲ့မြို့တံခါးတွေကို နေ့ရောညပါ မပိတ်ဘဲ အမြဲဖွင့်ထားရလိမ့်မယ်။+
၁၂ မင်းဆီမှာ အမှုမထမ်းတဲ့ လူမျိုးတွေ၊ နိုင်ငံတွေအားလုံး ပျက်စီးသွားမယ်။
အဲဒီလူမျိုးတွေ ကျိန်းသေပျက်စီးသွားမယ်။+
၁၃ လက်ဘနွန်ရဲ့ ဘုန်းကျက်သရေက+
ဂျူနီပါထင်းရှူးပင်၊ သစ်ရာပင်၊ဆိုက်ပရပ်ထင်းရှူးပင်နဲ့အတူ+ မင်းဆီရောက်လာပြီး ငါ့ရဲ့သန့်ရှင်းရာဌာနတော်ကို လှပတင့်တယ်စေမယ်။
ငါခြေတင်တဲ့နေရာကို ဘုန်းအသရေ တိုးစေမယ်။+
၁၄ မင်းကိုဖိနှိပ်ခဲ့သူတွေရဲ့ သားတွေ မင်းဆီ လာပြီး ဦးညွှတ်ရလိမ့်မယ်။
မင်းကို မလေးမစားဆက်ဆံသူတွေလည်း ခြေရင်းမှာ ပျပ်ဝပ်ရလိမ့်မယ်။
မင်းကို ယေဟောဝါရဲ့မြို့တော်၊အစ္စရေးတို့ရဲ့ သန့်ရှင်းတဲ့အရှင်ရဲ့ ဇိအုန်မြို့လို့ သမုတ်ကြလိမ့်မယ်။+
၁၅ မင်းဟာ စွန့်ပစ်မုန်းတီးခံရပြီး ဖြတ်သန်းသွားလာသူမရှိတဲ့မြို့ မဖြစ်တော့ဘူး။+
မင်းကို ထာဝရ ဂုဏ်ယူဝင့်ကြွားစရာ ဖြစ်စေမယ်။
နောင်လာနောက်သား အဆက်ဆက် ရွှင်လန်းချမ်းမြေ့စရာ ဖြစ်စေမယ်။+
၁၆ မင်းက လူမျိုးခြားတွေရဲ့နို့ကို သောက်ရလိမ့်မယ်။+
ဘုရင်တွေရဲ့နို့ကို စို့ရလိမ့်မယ်။+
ငါယေဟောဝါဟာ မင်းကို ကယ်တင်တဲ့အရှင်ပဲ၊
ယာကုပ်ရဲ့ တန်ခိုးကြီးတဲ့အရှင်ဟာ မင်းကို ပြန်ဝယ်တဲ့အရှင်ပဲဆိုတာ မင်း ကျိန်းသေ သိရလိမ့်မယ်။+
၁၇ ကြေးနီနေရာမှာ ရွှေ၊သံနေရာမှာ ငွေ၊
သစ်သားနေရာမှာ ကြေးနီ၊ကျောက်နေရာမှာ သံကို ငါအစားထိုးမယ်။
ငြိမ်သက်ခြင်းကို မင်းရဲ့ကြီးကြပ်မှူးတွေအဖြစ်၊ဖြောင့်မတ်ခြင်းကို မင်းရဲ့ အလုပ်ကြီးကြပ်သူတွေအဖြစ် ငါခန့်အပ်မယ်။+
၁၈ တိုင်းပြည်မှာ အကြမ်းဖက်တဲ့သတင်း၊မင်းရဲ့ နယ်နိမိတ်အတွင်းမှာ ပျက်စီးဆုံးပါးတဲ့ သတင်းတွေ မကြားရတော့ဘူး။+
မင်းက မြို့ရိုးတွေကို ကယ်တင်ခြင်း၊+ မြို့တံခါးတွေကို ချီးမွမ်းခြင်းလို့ သမုတ်လိမ့်မယ်။
၁၉ နေ့အချိန်မှာ မင်းကို အလင်းပေးတာ နေမင်းဖြစ်မှာ မဟုတ်ဘူး။
ညအချိန်မှာ အလင်းပေးတာ လမင်းဖြစ်မှာ မဟုတ်ဘူး။
ယေဟောဝါဟာ မင်းအတွက် ထာဝရအလင်း၊+မင်းရဲ့ ဘုရားသခင်ဟာ မင်းရဲ့ဘုန်းအသရေ ဖြစ်မှာမို့လို့ပဲ။+
၂၀ ယေဟောဝါဟာ မင်းအတွက် ထာဝရအလင်း ဖြစ်မှာမို့+ နေဝင်သွားတဲ့နေ့တွေ၊လမိုက်ညတွေ ရှိတော့မှာ မဟုတ်ဘူး။
ညည်းတွားငိုကြွေးရတဲ့နေ့တွေ အဆုံးတိုင်သွားမယ်။+
၂၁ မင်းရဲ့လူတွေအားလုံး ဖြောင့်မတ်လာမယ်။
ဒီပြည်ကို ထာဝစဉ် ပိုင်ဆိုင်ရလိမ့်မယ်။
သူတို့ဟာ ငါစိုက်ပျိုးထားတဲ့ အညှောက်ပဲ။
ငါ့ကို ကျက်သရေတိုးစေမယ့်+ ငါ့လက်ရာတွေပဲ။+
၂၂ လူနည်းစုလေးဟာ လူတစ်ထောင် ဖြစ်လာမယ်။
အရေးမပါတဲ့သူဟာ အားကြီးတဲ့လူမျိုး ဖြစ်လာမယ်။
အချိန်တန်တဲ့အခါ ဒီလိုဖြစ်လာအောင် ငါယေဟောဝါကိုယ်တိုင် အရှိန်အဟုန် မြှင့်မယ်။”
