၁ ကောရိန္သု ၁၄:၁-၄၀
၁၄ မေတ္တာထားဖို့ အမြဲကြိုးစားပါ။ ဘုရားသခင်ဆီက ဆုကျေးဇူးတွေရဖို့၊ အထူးသဖြင့် ပရောဖက်ပြုနိုင်တဲ့ ဆုကျေးဇူးရဖို့+ ကြိုးစားအားထုတ်ပါ။
၂ တခြားဘာသာစကားနဲ့ ပြောဆိုတဲ့သူက လူတွေကို မပြော၊ ဘုရားသခင်ကို ပြောတယ်။ မြင့်မြတ်တဲ့ လျှို့ဝှက်ချက်တွေအကြောင်း+ စွမ်းအားတော်အားဖြင့် သူပြောနေပေမဲ့ ဘယ်သူမှ နားမလည်ဘူး။+
၃ ပရောဖက်ပြုတဲ့သူကျတော့ လူတွေကို သူ့စကားတွေနဲ့ အားပေးတည်ဆောက်တယ်၊ နှစ်သိမ့်တယ်။
၄ တခြားဘာသာစကားနဲ့ ပြောဆိုနိုင်စွမ်းရှိသူက ကိုယ့်ကိုယ်ကိုယ်ပဲ အားပေးတည်ဆောက်တယ်။ ပရောဖက်ပြုတဲ့သူကတော့ အသင်းတော်ကို အားပေးတည်ဆောက်တယ်။
၅ ခင်ဗျားတို့အားလုံးကို ဘာသာစကား အမျိုးမျိုး ပြောဆိုနိုင်စွမ်း ရှိစေချင်တယ်။+ ဒါပေမဲ့ ပရောဖက်ပြုနိုင်တဲ့ ဆုကျေးဇူးကို ပိုပြီးရစေချင်တယ်။+ ပရောဖက်ပြုတဲ့သူဟာ ဘာသာစကားအမျိုးမျိုး ပြောတဲ့သူထက် သာတယ်။ ဘာသာစကားအမျိုးမျိုး ပြောတဲ့သူဟာ ဘာသာပြန်ပေးသူ မရှိရင် အသင်းတော်ကို အားပေးတည်ဆောက်နိုင်မှာ မဟုတ်ဘူး။
၆ ညီအစ်ကိုတို့၊ အခုချိန်မှာ ကျွန်တော်က ခင်ဗျားတို့ကို ဘာသာစကား အမျိုးမျိုးနဲ့ ပြောခဲ့ရင်လည်း ဗျာဒိတ်တော်အကြောင်း ဟောတာ၊+ အသိပညာပေးတာ၊+ ပရောဖက်ပြုတာ၊ သွန်သင်တာတွေ မလုပ်ဘူးဆိုရင် ခင်ဗျားတို့ ဘာအကျိုးရနိုင်မှာလဲ။
၇ အလားတူပဲ၊ ပလွေဖြစ်စေ၊ စောင်းဖြစ်စေ သက်မဲ့တူရိယာတွေတောင် အသံ မပီပြင်ရင် ပလွေသံမှန်း၊ စောင်းသံမှန်း ဘယ်လိုလုပ် သိနိုင်မလဲ။
၈ ခရာမှုတ်သံ မပီပြင်ရင် တိုက်ပွဲအတွက် ဘယ်သူ အသင့်ပြင်နိုင်မလဲ။
၉ အလားတူပဲ၊ နားလည်လွယ်တဲ့စကားနဲ့ မပြောဘူးဆိုရင် ဘာပြောနေမှန်း ဘယ်သူသိနိုင်မလဲ။ လေထဲကို ပြောသလို ဖြစ်နေမှာပေါ့။
၁၀ ဒီလောကမှာ ဘာသာစကားအမျိုးမျိုး ပြောကြတယ်။ အဓိပ္ပာယ်မရှိတဲ့ ဘာသာစကားဆိုတာ မရှိဘူး။
၁၁ ကျွန်တော် နားမလည်တဲ့ ဘာသာစကားကို ပြောဆိုသူအတွက် ကျွန်တော်ဟာ တိုင်းတစ်ပါးသား ဖြစ်နေမှာပေါ့။ ပြောဆိုသူကလည်း ကျွန်တော့်အတွက် တိုင်းတစ်ပါးသား ဖြစ်နေမှာပေါ့။
၁၂ ခင်ဗျားတို့လည်း အလားတူပဲ။ စွမ်းအားတော် ဆုကျေးဇူးတွေ လိုချင်တောင့်တနေတာဆိုတော့ အသင်းတော်ကို အားပေးနိုင်ဖို့ ဆုကျေးဇူး များများရအောင် ကြိုးစားကြပါ။+
၁၃ ဒါကြောင့် တခြားဘာသာစကားနဲ့ ပြောဆိုနိုင်စွမ်းရှိသူဟာ ဘာသာပြန်နိုင်အောင် ဆုတောင်းပါစေ။+
၁၄ တခြားဘာသာစကားနဲ့ ကျွန်တော် ဆုတောင်းနေတယ်ဆိုရင် စွမ်းအားတော် ဆုကျေးဇူးကြောင့် ဆုတောင်းတာမှန်ပေမဲ့ အဓိပ္ပာယ်ကိုတော့ ကျွန်တော် နားမလည်ဘူး။
၁၅ ဒီတော့ ဘယ်လို လုပ်ရမလဲ။ ကျွန်တော်က စွမ်းအားတော် ဆုကျေးဇူးကြောင့် ဆုတောင်းမယ်။ ကျွန်တော်နားလည်တဲ့ စကားနဲ့လည်း ဆုတောင်းမယ်။ စွမ်းအားတော်ဆုကျေးဇူးကြောင့် ချီးမွမ်းသီချင်း ဆိုမယ်။ ကျွန်တော်နားလည်တဲ့ စကားနဲ့လည်း ချီးမွမ်းသီချင်းဆိုမယ်။
၁၆ ခင်ဗျားက စွမ်းအားတော် ဆုကျေးဇူးကြောင့်ပဲ ကျေးဇူးတော်ချီးမွမ်းမယ်ဆိုရင် သာမန်လူတွေက ခင်ဗျား ဘာတွေပြောနေမှန်း နားမလည်တဲ့အတွက် “အာမင်”* လို့ဘယ်လိုပြောနိုင်မလဲ။
၁၇ ခင်ဗျားက ကျေးဇူးတော်ကို ကောင်းကောင်းမွန်မွန် ချီးမွမ်းပါရဲ့၊ ခက်တာက တခြားသူအတွက် အားပေးမှု မဖြစ်ဘူး။
၁၈ ဘာသာစကားအမျိုးမျိုးကို ခင်ဗျားတို့ထက် ကျွန်တော်ပြောဆိုတတ်လို့ ဘုရားသခင်ကို ကျေးဇူးတင်ပါတယ်။
၁၉ ဒါပေမဲ့ ကျွန်တော်က အသင်းတော်မှာ တခြားဘာသာစကားနဲ့ စကားအခွန်း တစ်သောင်း ပြောမယ့်အစား သူတစ်ပါးကို သွန်သင်ဖို့ နားလည်နိုင်တဲ့စကား ငါးခွန်းပဲ ပြောချင်တယ်။+
၂၀ ညီအစ်ကိုတို့၊ ကလေးငယ်တွေလို မစဉ်းစားပါနဲ့။+ မကောင်းမှုမှာတော့ ကလေးငယ်တွေလို ဖြစ်ကြပါ။+ အရွယ်ရောက်သူတွေလို စဉ်းစားပါ။+
၂၁ “‘တိုင်းတစ်ပါးသားတွေရဲ့ ဘာသာစကား၊ သူစိမ်းတွေရဲ့ ဘာသာစကားနဲ့ ဒီလူမျိုးကို ငါပြောမယ်။ ဒါတောင် သူတို့ နားထောင်မှာ မဟုတ်ဘူး’ ဆိုပြီး ယေဟောဝါ* ဘုရား ပြောတယ်”+ လို့ ပညတ်ကျမ်းမှာရေးထားတယ်။
၂၂ ဒါကြောင့် ဘာသာစကားအမျိုးမျိုး ပြောဆိုနိုင်စွမ်းဟာ ယုံကြည်သူတွေအတွက် မဟုတ်ဘဲ မယုံကြည်သူတွေအတွက် အထောက်အထားပဲ။+ ပရောဖက်ပြုနိုင်စွမ်းကတော့ မယုံကြည်သူတွေအတွက် မဟုတ်ဘဲ ယုံကြည်သူတွေအတွက် အထောက်အထားပဲ။
၂၃ အသင်းတော်တစ်ခုလုံး တစ်နေရာမှာ အတူစုဝေးပြီး ဘာသာစကားအမျိုးမျိုးနဲ့ ပြောဆိုနေတုန်း သာမန်လူတွေ ဒါမှမဟုတ် မယုံကြည်သူတွေ ရောက်လာရင် ခင်ဗျားတို့ကို စိတ်မမှန်သူတွေလို့ ပြောကြမယ် မဟုတ်လား။
၂၄ ဒါပေမဲ့ ခင်ဗျားတို့ ပရောဖက်ပြုနေတုန်း မယုံကြည်သူ ဒါမှမဟုတ် သာမန်လူ ရောက်လာရင် ခင်ဗျားတို့ရဲ့ စကားတွေဟာ သူ့ကို ဆုံးမသလိုဖြစ်ပြီး သူ့ကိုယ်သူ ဝေဖန်ဆန်းစစ် စေလိမ့်မယ်။
၂၅ အဲဒီအခါ သူ့စိတ်ထဲ ကိန်းအောင်းနေတာတွေကို သူကိုယ်တိုင် သိလာလိမ့်မယ်။ ဒါကြောင့် “ခင်ဗျားတို့နဲ့အတူ ဘုရားသခင် တကယ်ရှိတာပဲ”+ ဆိုပြီး ဘုရားသခင်ကို ပျပ်ဝပ်ကိုးကွယ်လိမ့်မယ်။
၂၆ ဒါဆိုရင် ညီအစ်ကိုတို့၊ ဘယ်လိုလုပ်မလဲ။ ခင်ဗျားတို့ စုဝေးကြတဲ့အခါ တစ်ယောက်က ဆာလံသီချင်းဆိုတယ်၊ တစ်ယောက်က သွန်သင်တယ်၊ တစ်ယောက်က ဗျာဒိတ်တော်ကို ဖော်ပြတယ်၊ တစ်ယောက်က တခြားဘာသာစကားနဲ့ ဟောပြောတယ်၊ တစ်ယောက်က ဘာသာပြန်တယ်။+ ဘယ်ဆုကျေးဇူးပဲဖြစ်ပါစေ သူတစ်ပါးကို အားပေးမှုဖြစ်စေပါ။
၂၇ တခြားဘာသာစကားနဲ့ ဟောပြောတဲ့သူရှိရင် နှစ်ယောက်၊ အလွန်ဆုံး သုံးယောက်ပဲ ထားပါ။ သူတို့ အလှည့်ကျ ဟောပြောပါစေ။ တစ်ယောက်က ဘာသာပြန်ပေးရမယ်။+
၂၈ ဘာသာပြန်ပေးမယ့်သူ မရှိရင်တော့ တခြားဘာသာစကားနဲ့ ဟောပြောတဲ့သူက အသင်းတော်မှာ တိတ်ဆိတ်စွာနေပြီး စိတ်ထဲမှာပဲ ဘုရားသခင်ကို ပြောပါစေ။
၂၉ ပရောဖက် နှစ်ယောက် ဒါမှမဟုတ် သုံးယောက်+ ဟောပြောပါစေ။ ကျန်တဲ့သူတွေကတော့ နားထောင်ပြီး အဓိပ္ပာယ်ကို နားလည်ကြပါစေ။
၃၀ ဒါပေမဲ့ ထိုင်နားထောင်သူတွေထဲမှာ တစ်ယောက်က ဗျာဒိတ်တော် ရပြီဆိုရင် အရင်ဟောနေတဲ့သူက တိတ်ဆိတ်စွာ နေပါစေ။
၃၁ ဒါမှ ခင်ဗျားတို့အားလုံး တစ်ယောက်တစ်လှည့် ပရောဖက်ပြုနိုင်ကြလိမ့်မယ်။ ကျန်တဲ့သူတွေအားလုံးလည်း သင်ယူခွင့်ရပြီး အားပေးခံရလိမ့်မယ်။+
၃၂ ပရောဖက်ပြုနိုင်စွမ်းဆိုတဲ့ စွမ်းအားတော်ဆုကျေးဇူးကို အသုံးပြုတဲ့အခါ ပရောဖက်တွေဟာ ကိုယ့်ကိုယ်ကိုယ် ထိန်းချုပ်နိုင်ရမယ်။
၃၃ ဘာလို့လဲဆိုတော့ ဘုရားသခင်ဟာ စည်းစနစ်မရှိတဲ့ဘုရား မဟုတ်ဘူး၊ ငြိမ်သက်ခြင်းလိုလားတဲ့ ဘုရားသခင်ပဲ။+
သန့်ရှင်းသူတွေရဲ့ အသင်းတော်တိုင်းမှာလိုပဲ၊
၃၄ အသင်းတော်တွေမှာ အမျိုးသမီးတွေ တိတ်ဆိတ်စွာ နေကြပါစေ။ သူတို့ ဟောပြောခွင့် မရှိဘူး။+ ပညတ်တရားမှာ ဖော်ပြထားတဲ့အတိုင်း သူတို့ လက်အောက်ခံကြပါစေ။+
၃၅ သူတို့ နားမလည်တာရှိရင် အိမ်မှာ ခင်ပွန်းကို မေးမြန်းကြပါစေ။ အမျိုးသမီးတစ်ယောက်က အသင်းတော်မှာ ဟောပြောရင် ဒါဟာ အရှက်ကင်းမဲ့တဲ့ လုပ်ရပ်ပဲ။
၃၆ ဘုရားသခင်ရဲ့ တရားစကားဟာ ခင်ဗျားတို့ဆီကနေ အစပြုတာလား။ ခင်ဗျားတို့ဆီကိုပဲ ရောက်လာတာလား။
၃၇ တစ်ယောက်ယောက်က ကိုယ့်ကိုယ်ကိုယ် ပရောဖက်ဖြစ်တယ်၊ စွမ်းအားတော်ဆုကျေးဇူး ရရှိထားသူဖြစ်တယ်လို့ ထင်နေရင် ကျွန်တော်ရေးလိုက်တာတွေဟာ သခင့်မိန့်မှာချက်တွေပဲဆိုတာ သူ လက်ခံရမယ်။
၃၈ တစ်ယောက်ယောက်က ဒီအချက်ကို အရေးမလုပ်ဘူးဆိုရင်တော့ ဘုရားသခင်ကလည်း သူ့ကို အရေးလုပ်မှာ မဟုတ်ဘူး။*
၃၉ ဒါကြောင့် ညီအစ်ကိုတို့၊ ပရောဖက်ပြုနိုင်တဲ့ ဆုကျေးဇူးရဖို့ အမြဲ ကြိုးစားအားထုတ်ကြပါ။+ ဘာသာစကားအမျိုးမျိုးနဲ့ ဟောပြောနေသူတွေကိုလည်း မတားမြစ် ကြပါနဲ့။+
၄၀ အရာရာကို နည်းလမ်းတကျ၊ စည်းစနစ်တကျ လုပ်ဆောင်ကြပါ။+
အောက်ခြေမှတ်ချက်များ
^ ဒါမှမဟုတ်၊ “ပြောတဲ့အတိုင်း ဖြစ်ပါစေ။”
^ နောက်ဆက်တွဲ က၅ ကိုကြည့်။
^ “ဒါကို မသိတဲ့သူက မသိတဲ့အတိုင်း ရှိပါစေ” လည်းဖြစ်နိုင်။
