၂ ဘုရင်များ ၃:၁-၂၇
၃ ယုဒဘုရင် ယောရှဖတ် နန်းစံ ၁၈ နှစ်မြောက်မှာ အာဟပ်ရဲ့သားတော် ယောရံက+ အစ္စရေးပြည်မှာ နန်းတက်လာပြီး ရှမာရိမြို့မှာ ၁၂ နှစ် စိုးစံတယ်။
၂ ယောရံမင်းဟာ ယေဟောဝါရှေ့မှာ မကောင်းတာကို ဆက်လုပ်တယ်။ ခမည်းတော်လုပ်ခဲ့တဲ့ ဗာလရဲ့ ကိုးကွယ်ရာကျောက်တိုင်ကို ဖယ်ရှားပစ်တဲ့အတွက် ခမည်းတော်နဲ့ မယ်တော်လောက်တော့ မဆိုးဘူး။+
၃ ဒါပေမဲ့ အစ္စရေးတွေကို အပြစ်ကျူးလွန်စေတဲ့ နေဗတ်သား ယေရောဗောင်ရဲ့ လမ်းစဉ်ကို+ မစွန့်ဘဲ ဆက်လိုက်တယ်။
၄ မောဘဘုရင် မေရှာဟာ သိုးတွေကို မွေးမြူပြီး အစ္စရေးဘုရင်ကို ဆက်ကြေးအဖြစ် သိုးသငယ် ၁၀၀,၀၀၀၊ အမွေးမညှပ်တဲ့သိုးထီး ၁၀၀,၀၀၀ ပေးလေ့ရှိတယ်။
၅ အာဟပ်ကွယ်လွန်တာနဲ့+ မောဘဘုရင်က အစ္စရေးဘုရင်ကို ပုန်ကန်တော့တယ်။+
၆ အဲဒီအချိန်မှာ ယောရံက ရှမာရိမြို့ကနေ ထွက်ပြီး အစ္စရေးစစ်သည်တွေကို စုရုံးလိုက်တယ်။
၇ ပြီးတော့ “မောဘဘုရင် ပုန်ကန်နေပြီ။ မောဘကိုတိုက်ဖို့ ငါနဲ့အတူ စစ်ချီမလား” ဆိုပြီး သတင်းပို့လိုက်တော့ ယုဒဘုရင် ယောရှဖတ်က “စစ်ချီမယ်။+ ကျုပ်ဟာ မင်းကြီးနဲ့ တစ်စိတ်တစ်ဝမ်းတည်းပါပဲ။ ကျုပ်ရဲ့လူတွေလည်း မင်းကြီးရဲ့လူတွေနဲ့ တစ်စိတ်တစ်ဝမ်းတည်းပါပဲ။ ကျုပ်ရဲ့မြင်းတွေလည်း မင်းကြီးရဲ့မြင်းတွေလိုပါပဲ”+ လို့ပြောပြီး၊
၈ “ဘယ်လမ်းနဲ့ စစ်ချီမလဲ” လို့မေးတယ်။ ယောရံမင်းက “ဧဒုံတောကန္တာရလမ်းအတိုင်း စစ်ချီမယ်” ဆိုပြီးပြောတယ်။
၉ အဲဒီနောက် အစ္စရေးဘုရင်က ယုဒဘုရင်၊ ဧဒုံဘုရင်နဲ့အတူ ထွက်လာတယ်။+ ခုနစ်ရက်လုံး ကွေ့ပတ်၊ ချီတက်လာပြီးတဲ့နောက် လိုက်ပါလာတဲ့စစ်သည်တွေ၊ တိရစ္ဆာန်တွေ သောက်ဖို့ ရေမရှိဘူး။
၁၀ အစ္စရေးဘုရင်က “ဒုက္ခတော့ ရောက်ပြီ။ ယေဟောဝါဘုရားက ဒို့ဘုရင်သုံးပါးကို မောဘတွေလက်ထဲ အပ်ချင်လို့ ခေါ်လာတာပဲ” လို့ပြောတယ်။
၁၁ အဲဒီအခါ ယောရှဖတ်က “ဒီမှာ ယေဟောဝါဘုရားရဲ့ ပရောဖက်တစ်ယောက်မှ မရှိဘူးလား။ သူကတစ်ဆင့် ယေဟောဝါဘုရားကို မေးကြည့်ရအောင်”+ လို့ပြောတော့ အစ္စရေးဘုရင်ရဲ့ မင်းမှုထမ်းတစ်ယောက်က “ရှာဖတ်ရဲ့သား ဧလိရှဲ ရှိပါတယ်။+ သူဟာ ဧလိယလက်ဆေးတဲ့အခါ ရေလောင်းပေးတဲ့သူပဲ”+ လို့ပြောတယ်။
၁၂ ယောရှဖတ်က “သူကတစ်ဆင့် ယေဟောဝါဘုရား အသိပေးတတ်တယ်” လို့ပြောတဲ့အတွက် ဘုရင်သုံးပါးစလုံး ဧလိရှဲဆီ ဆင်းသွားကြတယ်။
၁၃ ဧလိရှဲက “မင်းကြီးက ကျွန်တော်နဲ့ ဘာဆိုင်လို့လဲ။+ မင်းကြီးရဲ့ခမည်းတော်နဲ့ မယ်တော်ရဲ့ ပရောဖက်တွေကို သွားမေးပါလား”+ လို့ပြောတဲ့အခါ အစ္စရေးဘုရင်က “ဒီလိုမပြောပါနဲ့။ ဒို့ဘုရင်သုံးပါးကို မောဘတွေလက်ထဲ အပ်ချင်လို့ ခေါ်လာတဲ့သူဟာ ယေဟောဝါဘုရားပဲ” လို့ပြောတယ်။
၁၄ ဒါနဲ့ ဧလိရှဲက “ကျွန်တော်ကိုးကွယ်တဲ့ ဗိုလ်ခြေတို့ရဲ့အရှင်၊ အသက်ရှင်နေတဲ့ဘုရား ယေဟောဝါကို တိုင်တည်ပြီး ပြောမယ်။ ယုဒဘုရင် ယောရှဖတ်ကြောင့်သာ+ မဟုတ်ရင် မင်းကြီးကို ကျွန်တော် လှည့်တောင်မကြည့်ဘူး။ အရေးလည်း မစိုက်ဘူး။+
၁၅ အခု၊ စောင်းသမားတစ်ယောက်+ ခေါ်လာခဲ့” လို့ပြောတယ်။ စောင်းသမား စပြီးတီးခတ်တာနဲ့ ယေဟောဝါရဲ့လက်တော် ဧလိရှဲအပေါ် သက်ရောက်လာတယ်။+
၁၆ အဲဒီအခါ ဧလိရှဲက “ယေဟောဝါဘုရား ပြောတာက ‘ဒီသဲချောင်းမှာ မြောင်းတွေ တူးကြ။
၁၇ “လေမလာ၊ မိုးမရွာဘဲ ဒီသဲချောင်းမှာ ရေတွေပြည့်သွားပြီး+ မင်းတို့ရော တိရစ္ဆာန်တွေပါ ရေသောက်ရမယ်” လို့ ယေဟောဝါပြောထားတယ်။’
၁၈ ဒါဟာ ယေဟောဝါဘုရားအတွက်တော့ အသေးအဖွဲလေးပါ။+ ဘုရားက မောဘတွေကိုလည်း မင်းကြီးလက်ထဲ အပ်ဦးမှာ။+
၁၉ မင်းကြီးက ခံတပ်မြို့၊+ အထင်ကရမြို့တွေကို ဖြိုဖျက်ပြီး ကောင်းတဲ့အပင်တွေကိုလည်း ခုတ်လှဲရမယ်။ စမ်းရေတွင်းတွေကို ပိတ်ဆို့ပြီး မြေကောင်းမြေသန့်တွေကိုလည်း ကျောက်တုံးတွေနဲ့ ဖျက်ဆီးရမယ်”+ ဆိုပြီးပြောတယ်။
၂၀ မနက်ကျတော့ မနက်ပိုင်းကောက်နှံအလှူ ဆက်သချိန်မှာ+ ဧဒုံပြည်ဘက်ကနေ ရေတွေ ဒလဟောစီးလာပြီး သဲချောင်းမှာ ရေတွေပြည့်သွားတယ်။
၂၁ မောဘပြည်သားတွေကတော့ ဘုရင်တွေ စစ်ချီလာပြီဆိုတဲ့သတင်း ကြားတဲ့အခါ လက်နက်ကိုင်နိုင်တဲ့ ယောက်ျားအားလုံးကို စုရုံးခိုင်းပြီး နယ်စပ်မှာ နေရာယူလိုက်တယ်။
၂၂ မနက်စောစော ထတဲ့အခါ ရေကို နေထိုးတဲ့အတွက် တစ်ဖက်မှာရှိတဲ့ မောဘတွေရဲ့အမြင်မှာ ရေဟာ သွေးလိုနီရဲနေတယ်။
၂၃ ဒါနဲ့ မောဘတွေက “သွေးတွေပါလား။ ဘုရင်အချင်းချင်း ဓားနဲ့သတ်ဖြတ်ကုန်ပြီ။ မောဘပြည်သားတို့၊ တိုက်ရာပါဥစ္စာတွေကို သွားယူကြစို့”+ ဆိုပြီး ပြောကြတယ်။
၂၄ အစ္စရေးတပ်စခန်းကို ရောက်လာတဲ့အခါ အစ္စရေးတွေ ထတိုက်တဲ့အတွက် မောဘတွေ ထွက်ပြေးရတယ်။+ အစ္စရေးတွေလည်း မောဘပြည်အထိ လိုက်ပြီး တိုက်ခိုက်ချေမှုန်းတယ်။
၂၅ အစ္စရေးတွေက မြို့တွေကို ဖြိုဖျက်တယ်။ မြေကောင်းမြေသန့်တွေပေါ် ကျောက်တုံးတွေ ပစ်ချပြီး ဖျက်ဆီးပစ်တယ်။ စမ်းရေတွင်းတွေကို ပိတ်ဆို့ပြီး+ ကောင်းတဲ့အပင်တွေကို ခုတ်လှဲကြတယ်။+ နောက်ဆုံး၊ ကိရဟရက်မြို့ရဲ့ တံတိုင်းတွေပဲ ကျန်တယ်။+ အဲဒီအခါ လောက်လွှဲသမားတွေက မြို့ကိုဝိုင်းပြီး ပစ်ခတ်ကြတယ်။
၂၆ မောဘဘုရင်က စစ်ရှုံးတော့မယ်ဆိုတာ သိတဲ့အခါ ဓားကိုင်စစ်သည် ၇၀၀ ကို ခေါ်ပြီး ဧဒုံဘုရင်ရဲ့တပ်ကို+ ထိုးဖောက်ဖို့ ကြိုးစားပေမဲ့ မအောင်မြင်ဘူး။
၂၇ ဒါနဲ့ ထီးနန်းဆက်ခံမယ့် သားဦးကို မြို့ရိုးပေါ်မှာ မီးရှို့ပူဇော်လိုက်တယ်။+ မောဘပြည်သားတွေက အစ္စရေးတွေကို အကြီးအကျယ် ဒေါသထွက်တယ်။ အစ္စရေးတွေလည်း ဆုတ်ခွာပြီး ကိုယ့်တိုင်းပြည်ဆီ ပြန်လာကြတယ်။
