ယေရှုက “သင်တို့​သည် အခမဲ့​ရကြ​သည်​ဖြစ်​၍ အခမဲ့​ပေးကမ်း​ကြလော့”​ လို့ သွန်သင်​ခဲ့တယ်။ (မ. ၁၀:၈) ဒါကြောင့် ကျွန်တော်တို့ဟာ ဒီ​ရှင်းလင်း​တဲ့ ညွှန်ကြားချက်ကို လိုက်နာ​ပြီး ကျမ်းစာ ဒါမှမဟုတ် ကျမ်းစာအခြေပြု စာပေတွေကို ဝေငှ​တဲ့အခါ အဖိုးအခ​မယူ​ကြဘူး။ (၂ ကော. ၂:၁၇) ဒါပေမဲ့ ဒီစာအုပ်​စာပေ​တွေ​ထဲမှာ ကျမ်းစာပါ အဖိုးတန်​အမှန်တရား​တွေ ရှိတယ်။ စာပေ​တွေ ထုတ်​လုပ်နိုင်ဖို့ ကြိုးစားအားထုတ်​ရတဲ့​အပြင် ကုန်ကျစရိတ်​လည်း အများကြီး​ရှိတယ်။ စာပေတွေကို ပုံနှိပ်​ပြီးနောက် ကမ္ဘာ​တစ်ဝန်း​မှာရှိတဲ့ အသင်းတော်တွေ​ဆီ ပို့​ပေးတယ်။ ဒါကြောင့် လို​သ​လောက်​ပဲ​ယူ​သင့်တယ်။

လူထုရှေ့​သက်သေခံ​တဲ့ နေရာတွေ​မှာတောင် စာပေတွေကို ဆင်​ဆင်ခြင်​ခြင် ဝေငှပါ။ (မ. ၇:၆) လမ်း​သွား​လမ်း​လာ​တွေကို စာပေ​တွေ အရမ်း​ဝေငှ​မယ့်အစား သူတို့ စိတ်ဝင်စားမှု​ရှိ​မရှိ သိ​နိုင်အောင် စကားစမြည် ပြောဆို​ကြည့်ဖို့ ကြိုးစားပါ။ လေးထောင့်ကွက်​ထဲက မေးခွန်း အနည်းဆုံး​တစ်ခုကို “ဟုတ်ကဲ့” လို့ ဖြေနိုင်​မလား။ တကယ်​စိတ်ဝင်စားမှု​ရှိ​မရှိ မသေချာ​ရင် ဝေစာ​လောက်​ပဲ ဝေငှပါ။ ဒါပေမဲ့ မဂ္ဂဇင်း ဒါမှမဟုတ် တခြား​စာပေ​တစ်ခုခုကို သူ​လိုချင်​တယ်ဆိုရင် ပေးလိုက်​ပါ။—သု. ၃:၂၇၊ ၂၈။