မှန်​ကာ​ပါတဲ့ အခန်းငယ်​ကို လုပ်သားတွေ က​ရိန်း​ကား​နဲ့ ချ​နေကြပါတယ်။ ဒီ​ရှုခင်း​ကြည့်မျှော်​စင် အခန်းငယ်​ကို လုပ်ငန်းခွင်​ရဲ့ ဘေးကင်း​တဲ့​နေရာမှာ ထားရှိ​ပါတယ်။ ဧည့်သည်တွေ လည်ပတ်​ကြည့်ရှုဖို့ ၂၀၁၇၊ မေလ​မှာ ဖွင့်လှစ်​ပေးခဲ့တယ်။ ဆောက်လုပ်ရေး စီမံကိန်း​ကို ကြည့်ရှုဖို့ ဩဂုတ်​လ​အထိ ဧည့်သည် ၁၇,၀၀၀ ကျော် ကြိုတင်​စာရင်း​ပေးခဲ့​ကြတယ်။

ကွန်ကရစ်​အောက်ခံပြား​ကို ဝန်ချီစက် သုံးပြီး ပထမဆုံး ဆောက်​မယ့် လူနေ​ဆောင် F ဘက် ပြောင်းရွှေ့​ကြတယ်။ အဆောက်အအုံ​ပတ်လည်မှာ နေရာလွတ် ရှိတဲ့​အတွက် အောက်ခံပြား​ကို ဖြုတ်​စ​ရာ မလို​ဘဲ အလျင်အမြန် ရွှေ့​လို့​ရတယ်။

လူနေ​ဆောင် ငါးခု​ကို တစ်ပြိုင်နက် ဆောက်လုပ်​နေကြပါတယ်။ အရှေ့​ဆုံး​မှာ လူနေ​ဆောင် B အုတ်မြစ် ကွန်ကရစ်​လောင်း​ဖို့ လုပ်သားတွေ သံ​ချည်​သံ​ကွေး လုပ်​နေကြတယ်။ အနောက်​တောင်ဘက်မှာ လူနေ​ဆောင် D မြေညီထပ်​ကို လုပ်သားတွေ ကွန်ကရစ်​လောင်း​နေကြတယ်။ အနောက်မြောက်​ဘက်မှာ လူနေ​ဆောင် E ဓာတ်​လှေကား​နဲ့ လှေကား ကွန်ကရစ်​နံရံ​ကို ဝန်ချီစက်​နဲ့ နေရာချ​နေကြတယ်။

မီး​သတ် ပလတ်စတစ်​ပိုက်ဆက်​ရာ ချော​အောင် လုပ်သား​တစ်ဦး အချော​ကိုင်​နေတယ်။ အပူ​ပေး​စနစ်​နဲ့ ဆက်​တဲ့​အတွက် ပလတ်စတစ် အရည်ပျော်​ပြီး ဆက်​သွားတယ်။ ဘုထ​နေတဲ့ နေရာ​လေး​တွေကို အချော​ကိုင်​ပေးပြီး​နောက် ပိုက်ဆက် ခိုင်​မ​ခိုင်၊ အရည်အသွေး ကောင်းမကောင်း စစ်ဆေး​ရတယ်။ စုစုပေါင်း မီး​သတ်​ပိုက်​အရှည် ၄ ကီလိုမီတာ (၂ မိုင်) နီးပါး ရှိတယ်။

မြောက်​အောက်​မြောင်း​သစ်​ကို လုပ်သား​တစ်ဦး သန့်ရှင်းရေး လုပ်​နေပါတယ်။ မြေအောက်​မြောင်း ဖောက်​ထားလို့ လမ်းပေါ်မှာ ရေ​မ​ဝပ်​ဘဲ မိုး​ရေ​တွေ ရေ​လွှဲ​ကန်​ထဲ စီးဝင်​သွားစေတယ်။

ဗိသုကာ​အဖွဲ့​မှ ဇနီးမောင်နှံ မြေညီထပ် လူ​သွား​စင်္ကြံ နံရံ​နေရာကို မှတ်သား​နေကြတယ်။

ဆောက်လုပ်​ဆဲ လူနေ​ဆောင်​ငါးခု အပေါ်​စီး​မြင်ကွင်း ဖြစ်တယ်။ စက်တင်ဘာလမှာ ကွန်ကရစ်​ဘောင်​တွေ ပြီးစီး​သွားတယ်။ လူနေ​ဆောင် F (အနောက်​တောင်ဘက်) အတွင်း​နံရံ​တွေကို ဆောက်လုပ်ပြီး ပ​လာ​စ​တာ ကိုင်၊ ဆေး​စ​သုတ်​နေပါ​ပြီ။ ဒီ​အတောအတွင်း လုပ်သားတွေ​က လူနေ​ဆောင် E (အနောက်​မြောက်ဘက်) အတွင်း​နံရံ​တွေ၊ ပြတင်းပေါက်​တွေကို စ​တပ်ဆင်​နေကြပါတယ်။ အရှေ့ပိုင်း​က လူနေ​ဆောင် B, C, D တို့ကို ဗိသုကာ​ပိုင်း၊ လျှပ်စစ်​ပိုင်း၊ စက်​ပိုင်း​ဆိုင်ရာ​အဖွဲ့၊ ငြ​မ်း​ဆင်​တဲ့​အဖွဲ့​တွေ အလုပ်​စ​လုပ်ဖို့ ပြင်ဆင်​နေကြပါတယ်။

အုပ်ချုပ်ရေးအဖွဲ့ရဲ့ ပုံနှိပ်​ထုတ်ဝေရေး ကော်မတီ​အကူ၊ ကမ္ဘာချီ ဒီဇိုင်း/ဆောက်လုပ်ရေး​ဌာန (WDC) ကြီးကြပ်ရေးမှူး ရောဘတ် လူ​စ​ယို​နီ​က ဆောက်လုပ်ရေး အဖွဲ့သားတွေကို ကျမ်းစာ​အခြေပြု ဟောပြောချက်​ပေးပြီး အားပေး​နေပါတယ်။ WDC က ဌာနခွဲ​အဆောက်အအုံ​သစ် ဒီဇိုင်းဆွဲ​ခြင်း၊ ဆောက်လုပ်ခြင်း​ကို ကြီးကြပ်​ပေးတယ်။ အရည်အသွေး ပြည့်မီ​ပြီး အကုန်အကျ နည်း​ဖို့ စီမံပေး​ပါတယ်။

ဓာတ်ငွေ့၊ ဒေ​တာ၊ လျှပ်စစ်ပစ္စည်း​တွေ ထား​မယ့်​နေရာ​အတွက် လုပ်သားတွေ ကွန်ကရစ် လောင်း​နေကြပါတယ်။ ညာဘက်မှာ ဆူညံသံ လျှော့ချ​ပေးတဲ့ ခြံစည်းရိုး အုတ်မြစ်​အတွက် ကွန်ကရစ်​ကား​နဲ့ ကွန်ကရစ် လောင်း​နေပါတယ်။

စ​တီး​ဘောင် တပ်​ဖို့ ကြမ်းပြင်​မှာ အမှတ်အသား မ​လုပ်​ခင် ပုံကြမ်း​ကို ဗိသုကာ​အဖွဲ့က ပြန်​စစ်ဆေး​နေတယ်။

အပြင်​နံရံ စ​တီး​ဘောင်​တွေကို လုပ်သား​တစ်ဦး တပ်ဆင်​နေပါတယ်။

အပြင်​နံရံ​တွေကို တည်ဆောက်တဲ့​အခါ လွယ်ကူ​စေဖို့ လူနေ​ဆောင် E ပတ်လည်​ကို လုပ်သားတွေ ငြ​မ်း​ဆင်​နေကြတယ်။

တပ်ဆင်​ခါ​စ ပြတင်းပေါက်​တွေကို မှန်​မ​ကွဲ​ဆေး သုတ်​နေပါတယ်။ ဆေးခြောက်​သွားတဲ့အခါ ပလတ်စတစ် ဖလင်​ပြား​လို ဖြစ်သွားပြီး ဆောက်လုပ်ရေး ကာလ​အတွင်း မတော်တဆ ထိခိုက်​ကွဲအက်​တာ​မျိုး မဖြစ်အောင် ကာကွယ်ပေး​ပါတယ်။ ပြီးသွားတဲ့အခါ ခွာထုတ်​လိုက်လို့ ရတယ်။

စက်​ပိုင်း​ဆိုင်ရာ​အဖွဲ့က လူနေ​ခန်း ကြမ်းခင်း​အောက်မှာ ထား​မယ့် အပူ​ပေး​စနစ်ကို စစ်ဆေး​နေကြပါတယ်။ လိုအပ်​သလို ချိန်ညှိ​ပြီးသွား​ရင် အပူ​ပေး​ပိုက်​တွေကို ဖုံးအုပ်​ဖို့ အပြီးသတ် ကွန်ကရစ် လောင်း​နိုင်​ပါပြီ။

ဥယျာဉ်​ခင်းကျင်း​သူက ဌာနခွဲ​အဆောက်အအုံ ပင်မ​ဝင်ပေါက် အဝိုင်း မြက်ခင်း​ပေါ်​က တောပန်း​တွေကို ရှင်းထုတ်​နေပါတယ်။ အဲဒါက လမ်းမ​ဘေး စိမ်းစိုနေ​အောင် ပြုစု​စောင့်ရှောက်​ချိန်​နဲ့ လုပ်အား​ကို သက်သာ​စေပါ​တယ်။

မြေ​တိုင်း​သူက GPS မြေ​တိုင်း​ကိရိယာ​ကို သုံးပြီး ရုံးခန်း​မြေကွက် ဝင်ပေါက်​နေရာကို အမှတ်အသား လုပ်၊ တိုင်​စိုက်​ပြီး တိုင်​ကို မြင်သာအောင် ဆေး​မှုတ်​နေပါတယ်။ ဒီ​မြေကွက်​မှာ မီးဖိုဆောင်၊ ထမင်းစားခန်း၊ ခန်းမ ပါတဲ့ အဆောက်အအုံ တည်ဆောက်ပါ​မယ်။ နောက်ဘက်​မှာ လူနေ​ဆောင်​တွေကို တွေ့နေရ​ပါတယ်။

ရေနုတ်မြောင်း​စနစ် ရေ​ထိန်း​ကန် ကွန်ကရစ်​လောင်း​ဖို့ ဇနီးမောင်နှံ​နှစ်ယောက် ပုံစံ​ချ ပြင်ဆင်​နေပါတယ်။ နောက်ဘက်​မှာ ရာသီဥတုဒဏ်​ကို အကာအကွယ်​ပေးဖို့ ပလတ်စတစ်​တွေ ကာ​ထားတဲ့ လူနေ​ဆောင် E နဲ့ F ကို တွေ့ရ​ပါတယ်။ ဆောင်းတွင်း​အတွက် သင့်တော်​ပါတယ်။

လေ​အား​သုံး ဝန်ချီစက် ကိုင်တွယ်ပုံ​ကို လုပ်သား​တစ်ဦး သင်ယူ​နေပါတယ်။ ဒီ​စက်​နဲ့ ၇၀ ကီ​လို​ဂ​ရမ် (၁၅၄ ပေါင်) လေး​တဲ့ ကွန်ကရစ်​တုံး​တွေကို မပြီး နေရာချ​ပါတယ်။ ကွန်ကရစ်​တုံး​တွေ နေရာ​မှန် ရောက်​သွားပြီ​ဆိုရင် တစ်ခုနဲ့ တစ်ခု​ကြား ကွန်ကရစ်​နဲ့ ဆက်​လိုက်ပါ​တယ်။

ရေပိုက်​လိုင်း​ကို ဆွဲယူ​ပြီး စက်​ကိုင်​အဖွဲ့သား​တစ်ဦးက နေရာချ​ပေး​နေတယ်။ ဌာနခွဲရုံး​သစ်​အတွက် ငါး​ကီလိုမီတာ (၃ မိုင်) ခန့်​ရှည်​တဲ့ ရေပိုက် လိုအပ်တယ်။

လုပ်သား​တစ်ဦး လျှပ်စစ်​ဖြတ်​စက်​နဲ့ အုတ်​ခဲ​တွေကို ဖြတ်​နေပါတယ်။ လူနေ​ဆောင် အဆောက်အအုံ အစွန်း​ဘက်မှာ အုတ်​စီ​ပြီး အကွက်​ဖော်​မှာ​ဖြစ်လို့ အုတ်​ခဲ​တွေကို နှစ်​ပိုင်း ပိုင်း​ဖို့ လိုတယ်။ လူနေ​ဆောင်​တွေ​အတွက် အုတ်​ခဲ​ပေါင်း ၃၀၀,၀၀၀ စီ​ဖို့ လိုတယ်။