ပြင်သစ်​နိုင်ငံ ဖြတ်ကျော်​တဲ့ ကမ္ဘာကျော် စက်ဘီး​စီး​ပြိုင်ပွဲ ၁၀၃ ကြိမ်​မြောက်​ကို ၂၀၁၆၊ ဇူလိုင် ၂ ရက်​ကနေ ၂၄ ရက်​အထိ အခြေအနေ တင်းမာ​နေတဲ့​ကြား ကျင်းပ​ခဲ့တယ်။ ပြီး​ခဲ့​တဲ့​နှစ်​အတွင်း ပြင်သစ်​နိုင်ငံမှာ အကြမ်းဖက်မှု အကြိမ်ကြိမ် ဖြစ်ပွား​ပြီး လူ ၁၀၀ ကျော် သေဆုံးခဲ့တယ်။ ၂၀၁၆၊ ဇူလိုင် ၁၄ ရက်၊ နို​က်စ်​မြို့မှာ အမျိုးသား​နေ့ ကျင်းပ​နေချိန် မီးရှူး​မီး​ပန်း​ဖောက်​တာ​ကို ကြည့်နေ​တဲ့ လူအုပ်​ကြားထဲ အကြမ်းဖက်​သ​မား​တစ်ဦး ထရပ်ကား​နဲ့ မောင်း​ဝင်လာတဲ့​အတွက် ၈၆ ယောက် သေဆုံး​ပြီး အများအပြား ဒဏ်ရာ​ရသွား​ပါတယ်။

ဝမ်းနည်းပူဆွေး​နေတဲ့ အခြေအနေ​မှာ ယေဟောဝါ​သက်သေတွေဟာ ထိတ်လန့်​တုန်လှုပ်​နေကြ​တဲ့ ပြင်သစ်​နိုင်ငံသားတွေ​ကို မျှော်လင့်ချက်​နဲ့ နှစ်သိမ့်မှု​ပေးဖို့ ကြိုးစား​ခဲ့​ကြတယ်။ ဒါကြောင့် စက်ဘီး​စီး​ပြိုင်ပွဲ ကြား​အချိန်တွေမှာ ယေဟောဝါ​သက်သေတွေဟာ စာပေ​လက်တွန်းစင်​တွေ ထားပြီး သက်သေခံ​ခဲ့​ကြတယ်။ ဒီ​အစီအစဉ်မှာ စေတနာ့​ဝန်ထမ်း ၁,၄၀၀ ကျော် ပါဝင်​ကြပြီး ဘဝနဲ့​ပတ်သက်တဲ့ အရေး​အကြီးဆုံး မေးခွန်းတွေရဲ့ အဖြေ ရှာဖွေ​နေသူတွေကို ကျမ်းစာ​အခြေပြု​စာပေ ၂,၀၀၀ ကျော် ဝေငှ​ခဲ့တယ်။

တစ်မြို့​ပြီး​တစ်မြို့ လိုက်​အားပေး​ကြ​တဲ့ အားကစား ဝါသနာအိုး​တွေဟာ နေရာ​အတော်များများမှာ ယေဟောဝါ​သက်သေတွေကို တွေ့ရလို့ အံ့အားသင့်​ကြတယ်။ စက်ဘီး​စီး​ပြိုင်ပွဲ​ကို စီမံ​အုပ်ချုပ်သူ အဖွဲ့ဝင်တွေ​က ယေဟောဝါ​သက်သေ အဖွဲ့အစည်းရဲ့ လုပ်ဆောင်မှုကို တစ်ကြိမ်​မ​က ချီးမွမ်းခဲ့တယ်။ “ခင်ဗျားတို့ကို စက်ဘီး​ပြိုင်ပွဲ ကျင်းပတဲ့ နေရာတိုင်းမှာ တွေ့နေရ​ပါလား” လို့ ပြောခဲ့တယ်။ ပရိသတ်​တွေ​က “ဒီ​နေရာမှာ​လည်း ယေဟောဝါသက်သေတွေ ရှိနေ​ပါလား” လို့ အံ့ဩ​တ​ကြီး ပြော​ကြတယ်။ ပြိုင်ပွဲ​စပြီး ရက်​အတော်ကြာ​တဲ့အခါ ဘတ်စကား​ယာဉ်မောင်း​ကို ဝေစာ​ဝေ​တော့ သူက ယဉ်ကျေး​စွာ ငြင်းပြီး ဝေစာ​လေးစောင် ရထား​ပြီးပြီ​လို့ ရှင်းပြတယ်။

နေရာတကာမှာ ယေဟောဝါ​သက်သေတွေကို တွေ့ရတဲ့​အတွက် တချို့ စိတ်ဝင်စား​လာပြီး ဦးဆုံး​အနေနဲ့ လက်တွန်းစင်​ကနေ စာစောင်​တွေ လာ​ယူ​ကြတယ်။ ရုပ်မြင်သံကြား အားကစားလိုင်း​မှာ အလုပ်လုပ်​နေ​သူ တစ်ယောက်ဟာ မ​နှစ်​က စက်ဘီး​စီး​ပြိုင်ပွဲ​မှာ သက်သေခံတွေကို တွေ့ခဲ့​တာ သတိရ​သွားတယ်။ ဒီ​နှစ်မှာ​တော့ လက်တွန်းစင်​ဆီ သွားပြီး စာစောင် ယူဖို့ ဆုံးဖြတ်​လိုက်တယ်။ သူ​စိတ်ဝင်စားတဲ့ အကြောင်းအရာ​တစ်ခု ပါတဲ့ မိသားစု​ပျော်ရွှင်မှု​၏ လျှို့ဝှက်ချက် စာအုပ်ကို ယူ​လိုက်တယ်။ ကား​ထဲမှာ ထိုင်​နေရင်း စာအုပ်​ပါ အကြောင်းအရာ​တချို့ ဖတ်​ပြီးနောက် လက်တွန်းစင်​အကြောင်း အလုပ်ဖော်တွေကို ပြောပြတဲ့​အတွက် သူတို့လည်း လက်တွန်းစင်​ကို လာပြီး စာစောင်​တွေ ယူ​ကြတယ်။

ဒီ​ပွဲကို လာတဲ့ ဧည့်သည်​တချို့က ယေဟောဝါ​သက်သေတွေကို ရှာပြီး ရင်ဖွင့်​ကြတယ်။ အမျိုးသမီးငယ်​တစ်ဦးက မျှော်လင့်ချက် မဲ့​နေလို့ အဲဒီ​နေ့မှာပဲ ရထား​တိုက်ခံ​ပြီး ကိုယ့်ကိုယ်ကိုယ် သတ်​သေ​ဖို့ စဉ်းစား​ထားကြောင်း ရင်ဖွင့်​တယ်။ ဒါပေမဲ့ အနာဂတ် ဘုရား​နိုင်ငံတော်​အောက်မှာ ရရှိမယ့် ငြိမ်သက်ခြင်း​အကြောင်း ယုံကြည်​စိတ်ချ​ရတဲ့ ကျမ်းစာ​သတင်းစကားကို ကြား​ပြီးနောက် နှစ်သိမ့်မှု ခံစား​ရပြီး ကိုယ့်ကိုယ်ကိုယ် မ​သတ်​သေတော့​ဖို့ ဆုံးဖြတ်​လိုက်တယ်။ နောက်​အမျိုးသမီး​တစ်ယောက်က “တကယ် မွန်မြတ်တဲ့ ဒီ​အလုပ်ကို ဆက်လုပ်​ကြပါ” လို့ ပြောခဲ့တယ်။

ချိုင်းထောက်​နဲ့ အမျိုးသား​တစ်ယောက်က သူစိမ်းတွေကို အမြဲ သံသယဝင်​တတ်​ကြောင်း ဝန်ခံတယ်။ ဒါပေမဲ့ ဣန္ဒြေရှိရှိ ဝတ်စား​ထားပြီး ယေဟောဝါ​သက်သေ​ပါလို့ ပြောတဲ့ အမျိုးသမီး​တစ်ယောက်ရဲ့ အကူအညီကို သူ​လက်ခံတယ်။ “ခင်ဗျားရဲ့​အပြုံး၊ ဝတ်စားဆင်ယင်ပုံ​တွေ​အတွက် ကျေးဇူး​တင်တယ်။ အဲဒါတွေကြောင့် ခင်ဗျားကို ယုံကြည်​စိတ်ချ​တာ” လို့ ပြောခဲ့တယ်။