ကမ္ဘာ့​မြို့ကြီး​တွေ​မှာ ယေဟောဝါသက်သေတွေ ထုတ်ဝေတဲ့ ကျမ်းစာ​အခြေပြု စာပေတွေ ပြသထား​တဲ့ လက်တွန်းစင်​တွေကို လမ်းသွားလမ်းလာ​တွေ မြင်တွေ့​နေ​ကျ ဖြစ်နေ​ပါပြီ။ ဂျာမနီ​နိုင်ငံမှာ ဘာလင်၊ ကိုလုံး၊ ဟ​မ်း​ဘာ့ဂ်၊ မြူး​နစ်​မြို့​အပြင် လူစည်ကားတဲ့ တခြား​မြို့တွေမှာ​လည်း သက်သေခံတွေရဲ့ လက်တွန်းစင်​တွေကို တွေ့ရ​တတ်တယ်။

ဒါပေမဲ့ ဂျာမန်​တွေ အပန်းဖြေ​သွားလေ့​ရှိတဲ့ မြို့လေး​တွေ​မှာ​ကော လက်တွန်းစင်​မှာ ပြသထား​တာတွေကို စိတ်ဝင်စားကြ​ရဲ့​လား။ မြောက်ပိုင်း​က အပန်းဖြေ​မြို့​တွေ၊ ကမ်းရိုးတန်း​ဒေသ​တွေ၊ ဘော​လ်​တစ်​နဲ့ မြောက်​ပင်လယ်​မှာ ရှိတဲ့ ကျွန်းတွေမှာ​ကော လက်ခံကြ​သလား။ ဒါကို သိနိုင်ဖို့ ဥရောပ အလယ်ပိုင်း​မှာ ရှိတဲ့ ယေဟောဝါသက်သေများရဲ့ ဌာနခွဲရုံး​က ၂၀၁၆ ခုနှစ်မှာ အထူး​အစီအစဉ် ပြုလုပ်​ကြတယ်။ မြို့ကြီးပြကြီး​တွေ​မှာ လက်တွန်းစင် အသုံးပြု​နေ​ကျ သက်သေခံ ၈၀၀ နီးပါး​ဟာ မေလ​ကနေ အောက်တိုဘာ​လ​အတွင်း ဂျာမနီ​မြောက်ပိုင်း နေရာ ၆၀ နီးပါး​မှာ ပါဝင်​ခဲ့​ကြတယ်။ ဩစတြီးယား၊ ဗီယင်​နာ​မြို့က သက်သေခံ​တချို့​တောင် ပါဝင်​ကြတယ်။

သက်သေခံတွေကို လှိုက်လှိုက်လှဲလှဲ ကြိုဆိုကြတယ်။ ပါဝင်​ခဲ့​သူ​တစ်ဦးက “လူတွေ စိတ်ဝင်စားကြ​ပါတယ်။ ခင်ခင်မင်မင်​ရှိကြတယ်။ စူးစမ်း​မေးမြန်း​ကြတယ်။ စကား​လာ​ပြော​ကြတယ်” လို့ ပြောတယ်။ ပ​လော​န်​မြို့မှာ ပါဝင်​ခဲ့​တဲ့ ဟိုင်းဒီ​က “ရက်​နည်းနည်း​ကြာ​တော့ လူတွေက ကျွန်မတို့ကို မြို့​အင်္ဂါ​အစိတ်အပိုင်း​တစ်ခုလို့ ထင်နေ​ကြ​တာ။ မှတ်မိ​တဲ့​သူတွေက တွေ့​ရင် လက်ပြ​ကြတယ်” လို့ ပြောတယ်။ နားမကြား​တစ်ယောက်​ဆိုရင် “နေရာတကာမှာ မင်းတို့ ရှိနေတယ်” ဆိုပြီး လက်သင်္ကေတ​နဲ့ ပြတယ်။ သူ့​မိတ်ဆွေတွေနဲ့​အတူ ဂျာမနီ​အရှေ့​တောင်ပိုင်း နားမကြား​သူတွေ စုဆုံ​ရာ​ကနေ ပြန်လာ​ကြ​တာ။ ဟို​မှာလည်း ယေဟောဝါသက်သေတွေ​နဲ့ ဆုံခဲ့​ကြလို့ပဲ။

နယ်​ခံ​တချို့က သူတို့ကို အကူအညီ​တောင် ပေး​ကြတယ်။ ဗန်း​ဂ​ရူ​ဂါ​ကျွန်း​က ရဲ​တစ်ယောက်​ဆိုရင် ဘယ်​နေရာမှာ လူ​စ​ည်​တယ်၊ ဘယ်လို​လုပ်ရင် ထိရောက်​မယ်​ဆိုပြီး သက်သေခံတွေကို လာ​အကြံ​ပေးတယ်။ ဗါ​ရန် အန်​ဒါ မြူး​ရ​စ္စ​မြို့ ရှုခင်း​ကြည့် ခရီးစဉ်​တစ်ခုမှာ ရေ​ယာဉ်​မှူး​က စိတ်ဝင်စားစရာ နေရာတွေကို လိုက်​ပြ​ရင်း ခရီးသည်တွေကို ဆိပ်ကမ်း​ပေါ်​က လက်တွန်းစင်​ဆီ ညွှန်ပြ​တယ်။ ပြီးတော့ “ဘုရားသခင်​အကြောင်း သိချင်ရင် အဲဒီမှာ သွားလေ့​လာ​ကြည့်ပါ” လို့ ညွှန်း​တယ်။ အပန်းဖြေ​ခရီးထွက်​သူ အတော်များများ လက်တွန်းစင်​နား လာပြီး ပိုစတာ​ကို ဖတ်​ကြတယ်။

ခရီးသည်​တွေ​ကော နယ်​ခံ​တွေ​ပါ ဒီ​ဘရိုရှာ​သုံးမျိုး​ကို စိတ်ဝင်စား​ကြတယ်-

• ဘုရားသခင်သည် ကျွန်ုပ်တို့အား အမှန်ပင် ဂရုစိုက်​တော်​မူ​သလော။ ခရီးသွား​တစ်ဦးက “ဒီ​မေးခွန်း​ကို မေး​နေတာ ကြာပြီ။ ခုလို အပန်းဖြေ​ခရီး ထွက်​မှ​ပဲ ဒီ​အကြောင်း ဖတ်ရ​တော့​တယ်” လို့​ပြောတယ်။

• လူမျိုး​အားလုံး​အတွက် သတင်းကောင်း။ သက်ကြီးရွယ်အို​တစ်ဦးက ဘာသာတရား​တွေကို စိတ်ပျက်​တဲ့​အကြောင်း ပြောပြတယ်။ လူတွေ ကြုံနေ​ရတဲ့ ပြဿနာတွေကို လူ​လူ​ချင်း မဖြေရှင်း​ပေးနိုင်​ဘူး၊ ဘုရား​သာ​လျှင် ဖြေရှင်း​ပေးနိုင်ကြောင်း သက်သေခံတွေ ပြောပြတဲ့​အခါ ဝမ်းသာ​အားရ​နဲ့ ဘရိုရှာ​ကို ဖတ်ကြည့်ဖို့ ယူ​သွားတယ်။

• ကလေးတို့အတွက် ကျမ်းစာ​သင်ခန်းစာများ။ ဖခင်​တစ်ယောက်က ကလေးတွေ​အတွက် ထုတ်ဝေတဲ့ ဘရိုရှာ​ကို သူ့​သမီးကို ယူ​ခိုင်းတယ်။ သူကတော့ ကျွန်ုပ်​၏ ကျမ်းစာ​ပုံပြင်​စာအုပ်ကို ယူပြီး “မိသားစု​အတွက် ဒီ​စာအုပ် ကောင်းမယ်” လို့ ပြောတယ်။

လမ်းသွားလမ်းလာ​တွေ​က စာအုပ်​စာစောင် ၃,၆၀၀ ကျော် ယူသွား​ကြတယ်။ တချို့က သူတို့ဆီ ပြန်လာပြီး ဆွေးနွေး​ဖို့ ဖိတ်ခေါ်​ကြတယ်။

ဒီ​အစီအစဉ်မှာ ပါဝင်တဲ့ သက်သေခံတွေ သိပ်​ပျော်​ခဲ့​ကြတယ်။ ဘော​လ်​တစ်ပင်​လယ် ကမ်းခြေဒေသ​ကို သွားခဲ့တဲ့ ယော့ဂ်​နဲ့ ဇနီး မာ​ရီး​နာ​က “တကယ့် ကောင်းချီး​တစ်ခု​ပဲ။ ဘုရားရဲ့ ဖန်ဆင်းရာတွေကို မွေ့လျော်​ခံစား​ရင်း​နဲ့ ဘုရားသခင်​အကြောင်းကိုပါ ပြောပြ​ခွင့် ရခဲ့တယ်” လို့​ပြောတယ်။ ၁၇ နှစ်အရွယ် လူး​ကပ်​စ်​က “သိပ်​ကြိုက်တယ်။ ကိုယ်တိုင် ပျော်​ရ​ရုံ​မ​က တခြား​သူတွေကိုပါ အဖိုးတန်​တာ ဝေမျှ​နိုင်​ခဲ့လို့​ပါ” ဆိုပြီး ပြောပြတယ်။