ရုရှားဖယ်ဒရေးရှင်းနိုင်ငံတစ်ဝန်းမှာ ယေဟောဝါသက်သေများရဲ့ လုပ်ငန်းကို ပိတ်ပင်တားဆီးဖို့ ကြိုးစားနေတဲ့ အစိုးရအာဏာပိုင်များထံ အသနားခံစာ ရေးကြဖို့ ၂၀၁၇၊ မတ်လ ၂၁၊ အင်္ဂါနေ့မှာ ယေဟောဝါသက်သေများရဲ့ အုပ်ချုပ်ရေးအဖွဲ့က ကမ္ဘာတစ်ဝန်းက ညီအစ်ကို/မတွေဆီ မေတ္တာရပ်ခံခဲ့တယ်။ ရုရှားအာဏာပိုင်တွေဆီ စာဘယ်နှစောင် ရောက်မယ်ဆိုတာ မသိနိုင်ပေမဲ့ စာရေးပို့သူအများစုဟာ အသိအမှတ်ပြုတဲ့စာတွေကိုတော့ ရရှိကြတယ်။ ရုရှားအစိုးရဟာ ညီအစ်ကို/မတွေရဲ့ အသနားခံစာကို အလေးမထားဘဲ အခွင့်အာဏာ တလွဲသုံးပြီး ကျွန်တော်တို့ရဲ့ ဝတ်ပြုရေးကို တိုက်ခိုက်နေပေမဲ့ ဒီကင်ပိန်းက ယေဟောဝါအဖွဲ့အစည်းရဲ့ ကမ္ဘာချီစည်းလုံးမှုကို ဖော်ပြနေတယ်။ ညီအစ်ကိုအသင်းအပင်း တစ်ရပ်လုံး ရုရှား ညီအစ်ကို/မတွေဘက်မှာရှိကြောင်း အသိပေးရာလည်း ရောက်တယ်။—၁ ပေတရု ၂:၁၇။

ဒီကင်ပိန်းမှာ ယေဟောဝါသက်သေများစွာ ပါဝင်ကြတယ်။ နိုင်ငံတချို့မှာဆိုရင် ရုရှားကို စာပို့ဖို့ဆိုတာ အကုန်အကျ သိပ်များတာ။ ဒါကြောင့် ငွေကြေး ချောင်လည်သူတွေက သိပ်မတတ်နိုင်သူတွေအတွက် မျှဝေကျခံပေးကြတယ်။ ကြေညာသူတချို့ကျတော့ စာပို့ခ သက်သာတဲ့နိုင်ငံတွေက မိတ်ဆွေတွေကတစ်ဆင့် ပေးပို့ကြတယ်။ မိသားစုတွေ၊ အသင်းတော်တွေ အတူစုဆုံ စာရေးပြီး အစုအပုံလိုက် စာပို့တာမျိုးလည်း ရှိတယ်။ ဒါက စာပို့ခ သက်သာရုံမက ညီအစ်ကို/မ အချင်းချင်းနဲ့ရော ဘုရားနဲ့ပါ ပိုရင်းနှီးစေပြီး အမှတ်တရလည်း ဖြစ်စေတယ်။

ဒီကင်ပိန်းကို အားပေးတဲ့ စာတိုက်ဝန်ထမ်းတွေတောင် ရှိတယ်။ ဥပမာ၊ ကိုလံဘီယာနိုင်ငံ၊ ဘာရန်ကွီလာမြို့က ပါဆယ်ထုပ်ပို့တဲ့လုပ်ငန်း မန်နေဂျာတစ်ဦး ဒီလိုပြောတယ်– “ခင်ဗျားတို့ရဲ့ ကမ္ဘာချီစည်းလုံးမှုကို တကယ်သဘောကျတယ်ဗျာ။ ခုလိုကိစ္စမှာ တပေါင်းတစည်း လုပ်ဆောင်ကြတာကိုရောပေါ့။ ဘာရန်ကွီလာမြို့မှာလိုမျိုး နိုင်ငံတိုင်း၊ မြို့တိုင်းမှာ ဖြစ်နေရင် ဘယ်လိုများနေမလဲ စဉ်းစားကြည့်တယ်။ ဘယ်လောက် အရေးကြီးတဲ့ကိစ္စဖြစ်မှန်း လူတိုင်းကို သိစေချင်လိုက်တာ။” တောင်ကိုရီးယား၊ အန်ဆောင်းမြို့က စာတိုက်မှူးဆိုရင် ယေဟောဝါသက်သေတွေအတွက် စာတိုက်ပုံးတစ်လုံး ထားပေးတယ်။ ညီအစ်ကို/မတွေကို တံဆိပ်ခေါင်း ကပ်ပြီးသား စာပို့ခ မပေးရတဲ့စာအိတ်တွေကိုတောင် ပေးလိုက်သေးတယ်။

ယေဟောဝါသက်သေများရဲ့ ပြောဆိုခွင့်ရှိသူ ရာရိုစလာ့ဗ် စီဗူလ်စကီက ဒီလိုပြောတယ်– “ရုရှား ညီအစ်ကို/မတွေဟာ အုပ်ချုပ်ရေးအဖွဲ့က အစပြုလို့ နိုင်ငံအသီးသီးက ယုံကြည်သူချင်းတွေ စာရေးပေးနေကြောင်း ကြားသိရတဲ့အခါ ဘယ်လိုတရားစီရင်ချက်မျိုးပဲ ထွက်လာပါစေ သူတို့ချည်းပဲ မဟုတ်မှန်း ယုံကြည်စိတ်ချနေကြတယ်။”

အုပ်ချုပ်ရေးအဖွဲ့ဝင် မာ့ခ် ဆန်ဒါစန်က “ယေဟောဝါရဲ့လူမျိုး ဘယ်လောက် စည်းလုံးကြမှန်း စာရေးတဲ့ကင်ပိန်းက သိစေတယ်။ ဒီစနစ်ဆုံးခန်း နီးလာချိန်မှာ အသက်ရှင်လွတ်မြောက်ဖို့အတွက် စည်းလုံးမှု မရှိလို့ မဖြစ်ဘူး။ ဒီကိစ္စမှာ ယေဟောဝါ ဘယ်လိုကြားဝင်ဆောင်ရွက်မယ်ဆိုတာ စောင့်ကြည့်နေရင်း ရုရှား ညီအစ်ကို/မတွေအတွက် ရေကုန်ရေခန်း ကြိုးစားကြမယ်။ ယေဟောဝါက သူတို့ကို နည်းအမျိုးမျိုးနဲ့ ကူညီစောင့်ရှောက်ပေးမယ်ဆိုတာ ယုံကြည်စိတ်ချရင်း တညီတညွတ်တည်း ဆက်ပြီး တိုးလျှိုးအသနားခံ ဆုတောင်းကြမယ်။”—ဆာလံ ၆၅:၂။