၂၀၂၃ ခုနှစ်၊ ဇူလိုင်လမှာ ဂျမေကာ ကရီအောလ် ဘာသာစကား၊ ပင်စီဗေးနီးယား ဂျာမန်ဘာသာစကားနဲ့ ပထမဆုံး ခရိုင်အစည်းအဝေးတွေ ကျင်းပခဲ့တယ်။ ကြာရှည်စွာ စောင့်ဆိုင်းခဲ့ရတဲ့၊ မိခင်ဘာသာစကားတွေနဲ့ ကျင်းပတဲ့ “စိတ်ရှည်ကြပါ” ခရိုင်အစည်းအဝေးကို လူကိုယ်တိုင်တက်ရောက်သူ အယောက် ၂,၀၀၀ နီးပါးရှိတယ်။

ဂျမေကာကျွန်းမှာ အင်္ဂလိပ်စကားက ရုံးသုံးဘာသာစကားပါ။ ဒါပေမဲ့ ကျွန်းသူကျွန်းသား အများစုက ဂျမေကာ ကရီအောလ် ဘာသာစကားကိုလည်း ပြောကြတယ်။ ခရိုင်အစည်းအဝေး တက်ရောက်သူ ၁,၇၀၀ ထဲက တချို့ဟာ ယူနိုက်တက်ကင်းဒမ်းနဲ့ အမေရိကန်ပြည်ထောင်စုက လာကြတာဖြစ်တယ်။ အစီအစဉ်ကို ဂျမေကာကျွန်း ဆိပ်ကမ်းအဟောင်းမှာရှိတဲ့ မာလီနည်းပညာခန်းမမှာ ၂၀၂၃၊ ဇူလိုင် ၁၄ ကနေ ၁၆ ရက်အထိ ကျင်းပခဲ့တယ်။ တစ်ဆယ့်နှစ်ယောက် နှစ်ခြင်းခံတယ်။

ဂျမေကာ ကရီအောလ် ဘာသာစကားပြော ညီအစ်ကို/မတွေဟာ ကိုယ့်မိခင်ဘာသာစကားနဲ့ အစည်းအဝေးကြီးကို ဦးဆုံးအကြိမ် တက်ရလို့ သိပ်ဝမ်းသာကြတယ်။ ညီအစ်မ တနီရှာ ဂေါ်ဒန် ဒီလိုပြောတယ်– “အစီအစဉ်စဖို့ ညီအစ်ကိုက စင်မြင့်ပေါ်ကနေ ဂျမေကာ ကရီအောလ် ဘာသာစကားနဲ့လည်း နှုတ်ဆက်လိုက်ရော ကျွန်မ မျက်ရည်တွေ ကျလာတယ်။ ကိုယ့်နားကိုတောင် ကိုယ်မယုံနိုင်ဘူး။ အစည်းအဝေးကြီးကို မပြီးစေချင်ဘူး။”

ကနေဒါနဲ့ အမေရိကန်ပြည်ထောင်စုမှာ ပင်စီဗေးနီးယား ဂျာမန်ဘာသာစကားပြောသူ ၄၀၀,၀၀၀ လောက်ရှိတယ်။ ဒီဂျာမန်ဘာသာစကားကို အထူးသဖြင့် အာမစ်ရှ်နဲ့ မဲန္နနိုက် ကျေးလက်ဒေသတွေမှာ ပြောကြတယ်။ ပင်စီဗေးနီးယား ဂျာမန်ဘာသာစကားပြော အသင်းတော် ငါးခု၊ အုပ်စုတစ်ခုက ညီအစ်ကို/မတွေဟာ အစည်းအဝေးကြီး တက်ဖို့ ပြည်နယ်အတော်များများကနေ ခရီးနှင်လာကြတယ်။ ၂၀၂၃၊ ဇူလိုင် ၇ ကနေ ၉ ရက်အထိ အမေရိကန်နိုင်ငံ ပင်စီဗေးနီးယား၊ ပစ္စဘတ်မြို့၊ ကော်ရာပိုလစ် စည်းဝေးပွဲခန်းမမှာ ကျင်းပတဲ့ အစီအစဉ်ကို အယောက် ၂၀၀ ကျော် တက်ရောက်တယ်။

ညီအစ်ကို ဒေးဗစ် မီလာဟာ ပင်စီဗေးနီးယား ဂျာမန်ဘာသာစကားပြောသူပါ။ လွန်ခဲ့တဲ့ ၂၅ နှစ်ကတည်းက ယေဟောဝါသက်သေတွေနဲ့ ကျမ်းစာကို အင်္ဂလိပ်ဘာသာစကားနဲ့ လေ့လာခဲ့တယ်။ ပင်စီဗေးနီးယား ဂျာမန်ဘာသာစကားနဲ့ အသင်းတော်ဖြစ်လာမယ်၊ အစည်းအဝေးအစီအစဉ် တစ်ခုလုံးကို ကိုယ့်မိခင်ဘာသာစကားနဲ့ ကျင်းပမယ်လို့ သူတစ်ခါမှ မမျှော်လင့်ခဲ့မိဘူး။ သူဒီလိုပြောတယ်– “သိပ်ကောင်းတာပဲ။ အစီအစဉ်တစ်ခုလုံးမှာ နစ်မျောနေခဲ့တာ။ ကိုယ့်ဘာသာစကားနဲ့ဆိုတော့ သွန်သင်ချက်တွေက နှလုံးထဲကို တန်းရောက်သွားတယ်။”

ဒီသမိုင်းဝင် အစည်းအဝေးကြီးတွေကို တက်ရောက်ခဲ့ကြတဲ့ ညီအစ်ကို/မတွေအတွက် ကျွန်တော်တို့ ဝမ်းသာပါတယ်။ စင်ကြယ်တဲ့ ဘာသာစကားပြောပြီး စည်းလုံးနေနိုင်အောင် လုပ်ဆောင်ပေးတဲ့ ယေဟောဝါဘုရားကို ကျေးဇူးတင်ပါတယ်။—ဇေဖနိ ၃:၉။