၂၀၁၉၊ အောက်တိုဘာ ၁ ရက်နေ့မှာ နိုးလော့! မဂ္ဂဇင်း နှစ်တစ်ရာ ပြည့်သွားပါပြီ။ နှစ်စဉ် ဘာသာစကား ၂၁၁ မျိုးနဲ့ စောင်ရေ သန်း ၂၈၀ ကျော် ထုတ်ဝေခဲ့တဲ့ အဲဒီစာစောင်ဟာ ကမ္ဘာပေါ်မှာ ကင်းမျှော်စင် ပြီးရင် ဒုတိယအများဆုံး ဘာသာပြန် ထုတ်ဝေတဲ့စာစောင် ဖြစ်တယ်။

အုပ်ချုပ်ရေးအဖွဲ့ဝင် ညီအစ်ကို ဆမ်မြူအယ်လ် ဟာ့ဒ် ဒီလို ပြောတယ်– “နိုးလော့! မှာ အကြောင်းအရာ အမျိုးမျိုး ဆွေးနွေးထားလို့ ကျမ်းစာကို လူတွေ စိတ်ဝင်စားလာအောင် ကူညီပေးနိုင်ခဲ့တယ်။ နှစ်တွေတစ်လျှောက် မဂ္ဂဇင်းပုံစံ ပြောင်းလဲခဲ့ပေမဲ့ သတင်းကောင်း ဟောပြောသူတွေအတွက် ထိရောက်တဲ့ ကိရိယာဖြစ်နေဆဲပါ။ နှစ်တစ်ရာတိုင်ခဲ့တာ စိတ်လှုပ်ရှားစရာပါပဲ။ ဘုရားသခင့် စွမ်းအားတော် ထောက်မနေတယ်ဆိုတဲ့ သက်သေအထောက်အထား ဖြစ်ပါတယ်။”

၁၉၁၉၊ စက်တင်ဘာလတုန်းက အမေရိကန်နိုင်ငံ၊ အိုဟိုင်အိုပြည်နယ်၊ စီဒါပွိုင့်မြို့မှာ ကျင်းပတဲ့ သမိုင်းဝင်အစည်းအဝေးမှာ ဒီမဂ္ဂဇင်းကို ရွှေခေတ်ဆိုတဲ့ နာမည်နဲ့ ထုတ်ဝေကြောင်း စတင်ကြေညာခဲ့တယ်။ လူတွေ နှစ်သိမ့်မှုလိုအပ်တယ်ဆိုတာ ပေါ်လွင်စေဖို့ ၁၉၃၇ ခုနှစ်မှာ ဒီမဂ္ဂဇင်းရဲ့ နာမည်ကို နှစ်သိမ့်မှုလို့ ပြောင်းလိုက်တယ်။ နောက်ဆုံး၊ ကမ္ဘာ့အဖြစ်အပျက်တွေနဲ့ ပတ်သက်ပြီး ကျမ်းစာ ဖော်ပြထားချက်တွေကို စာဖတ်သူတွေ သတိပြုစေဖို့ ၁၉၄၆ ခုနှစ်မှာ နိုးလော့! လို့ ပြောင်းလိုက်တယ်။

“သတင်းကောင်းအကြောင်း စေ့စေ့စပ်စပ် သက်သေခံ” တဲ့ ကျမ်းစာပညာပေး လုပ်ငန်းမှာ နိုးလော့! ကို အနှစ်တစ်ရာ ကြာအောင် ဆက်အသုံးပြုနိုင်ခဲ့လို့ ကျွန်တော်တို့ သိပ်ဝမ်းသာပါတယ်။—တမန်တော် ၂၀:၂၄။