နိုဝင်ဘာလအတွင်း ကမ္ဘာတစ်ဝန်းက ယေဟောဝါသက်သေတွေဟာ စီးပွားရေး လုပ်ငန်းရှင်တွေ၊ မိသားစုတွေ၊ စိတ်ဝင်စားသူတွေဆီ ၂၀၂၀၊ အမှတ် ၂ ကင်းမျှော်စင် လူထုစာစောင်ကို ဝေငှခဲ့ကြတယ်။ ဒီအထူးကင်ပိန်းရဲ့ အဓိက ရည်ရွယ်ချက်က အစိုးရဌာနအသီးသီးရှိ အာဏာပိုင်တွေဆီ ဒီမဂ္ဂဇင်းကို ပေးပို့ဖို့ ဖြစ်တယ်။ ဒီအတွက် ဌာနခွဲရုံးတွေက တုံ့ပြန်မှုကောင်းများစွာ လက်ခံရရှိနေပါတယ်။

စီရာလီယွန်မှာ မြေယာအိုးအိမ်နဲ့ နိုင်ငံစီမံကိန်း ဝန်ကြီးဌာနရဲ့ လက်ထောက်ဝန်ကြီး ရက်ဇ် ဖိုနဖာက မဂ္ဂဇင်း ပို့ပေးတဲ့အတွက် ကျေးဇူးတင်ကြောင်း စာပြန်တယ်။ “စိတ်အားတက်စေပြီး ပညာပေးတဲ့ မဂ္ဂဇင်းပါ။ နေ့တိုင်းလိုလို ဖတ်ဖြစ်တယ်” လို့ ရေးတယ်။

ဆာမိုအာကျွန်း၊ ဝန်ကြီးချုပ်က သခင့်ဆုတောင်းချက်ရဲ့ အကျိုးကျေးဇူးကို အသိအမှတ်ပြုထားတဲ့ ကျေးဇူးတင်စာကိုလည်း ပို့တယ်။ နိုင်ငံအကြီးအကဲ တူမာလီယာအီဖန်နို ဗာလက်တိုအာ ဆော်လာဗီ ၂ ကလည်း ကျမ်းစာပညာပေး လုပ်ငန်းအတွက် ကျေးဇူးတင်ကြောင်း ဖော်ပြတယ်။ ဒီလုပ်ငန်းဟာ “လူတွေကို ကူညီနေတာ၊ သူတို့ဘဝ တိုးတက်ကောင်းမွန်လာအောင် ကျမ်းစာ သင်ပေးနေတာ” ဖြစ်တယ်လို့ ဆိုတယ်။ ကိုဗစ်-၁၉ ကြောင့် လူချင်းတွေ့တာ၊ တစ်အိမ်တက်ဆင်းသွားတာမျိုး မလုပ်တဲ့အတွက်လည်း ညီအစ်ကိုတွေကို ချီးမွမ်းထားပါတယ်။

ချီလီနိုင်ငံ၊ မြို့တော် စည်ပင်သာယာရေး အတွင်းရေးမှူး အော့စဗလ်ဒို ကာတဂျီနာ ဂရာစီယာက “ဒီကင်ပိန်းက တစ်နိုင်ငံလုံးမှာ ရှိတဲ့ အာဏာပိုင်တွေကို အသိအမြင် တိုးစေမယ်၊ အများပြည်သူ အကျိုးအတွက် လုပ်ဆောင်လာကြမယ်လို့ ကျွန်တော် ထင်တယ်။ ဒီနိုင်ငံမှာတင်မက ကမ္ဘာတစ်ဝန်းမှာ လက်ရှိ ကြုံနေရတဲ့ အခြေအနေတွေနဲ့ ကွက်တိပါပဲ။”

ဂျာမနီနိုင်ငံ၊ ဗဟိုဥရောပဌာနခွဲဆီ ဂျာမန် ပါလီမန် အဖွဲ့ဝင်တစ်ဦး အခုလို ရေးတယ်။ “ခင်ဗျားတို့ ဘာသာရေးအဖွဲ့အကြောင်း ကျွန်တော် သိတာပေါ့။ ခင်ဗျားတို့ဘာသာဝင်တွေ ကိုယ့်ကိုယ်ကိုယ် ယေဟောဝါသက်သေတစ်ဦးအဖြစ် ရဲရဲဝင့်ဝင့် ထုတ်ဖော်ကြတာကို ကျွန်တော် လေးစားတယ်။ နာဇီအုပ်ချုပ်မှုအောက် ခင်ဗျားတို့ဘာသာရေးအဖွဲ့ အဆိုးဝါးဆုံး ဖိနှိပ်ခံခဲ့ရတာလည်း ကျွန်တော် သိတယ်” လို့ ရေးတယ်။

ဂျာမနီ ဖယ်ဒရယ် နိုင်ငံတော် ဝန်ကြီးဌာနတစ်ခုက ကိုဗစ်-၁၉ ကပ်ရောဂါအတွင်း လူတွေကို နှစ်သိမ့်ပေးလို့ ကျေးဇူးတင်ကြောင်း စာပြန်တယ်။ “ခင်ဗျားတို့ အခုလို နှစ်သိမ့်အားပေးတာက ပြည်သူလူထုတစ်ရပ်လုံးကို အကျိုးပြုရာရောက်တယ်” လို့ ရေးတယ်။

ကိုလံဘီယာမှာ ဆီးနိတ်အဖွဲ့ဝင်တစ်ဦးနဲ့ ပြည်သူ့လွှတ်တော် ကိုယ်စားလှယ်တစ်ဦးက မဂ္ဂဇင်းအတွက် ကျေးဇူးတင်ကြောင်း၊ တခြားသူတွေကို ပြန်မျှဝေမှာ ဖြစ်ကြောင်း ဌာနခွဲကို စာရေးတယ်။ သဘာဝပတ်ဝန်းကျင် ဖွံ့ဖြိုးတိုးတက်မှု ဝန်ကြီးဌာန အရာရှိတစ်ဦးက “အသက်ကယ် သတင်း ပါတဲ့ ဒီကင်းမျှော်စင် မဂ္ဂဇင်းကို ပို့ပေးလို့ အလွန် ကျေးဇူးတင်တယ်” ဆိုပြီး စာပြန်တယ်။

ဂျပန်မှာ ရှိတဲ့ ဂိုင်ယာနာ သံအမတ်က ဖရန့် အိုကီရီက “လူတွေ ရင်ဆိုင်နေရတဲ့ ပြဿနာတွေအတွက် ဖြေရှင်းနည်းကို ဖော်ပြထားလို့ ဒီမဂ္ဂဇင်းက သိပ်ကောင်းတယ်” ဆိုပြီး ပြောတယ်။

အဇာဘိုင်ဂျန် သံအမတ်ကလည်း “သံရုံးကို အထူးမဂ္ဂဇင်း ပို့ပေးလို့ အလွန် ကျေးဇူးတင်ပါတယ်။ ကျွန်တော် စိတ်ဝင်တစား ဖတ်ဖြစ်တယ်” လို့ ဆိုတယ်။

မိုဇမ်ဘစ်ဌာနခွဲ လူထုသတင်းအချက်အလက်ဌာန ကြီးကြပ်မှူး ညီအစ်ကို အမာရို တက်စ္စရီယာ ပြောသလိုပါပဲ “ဒီကင်ပိန်းဟာ ထင်ထားတာထက် အောင်မြင်တယ်။ ပုံမှန်အားဖြင့် ရောက်ဖို့ ခက်တဲ့သူတွေဆီ နိုင်ငံတော်သတင်း ရောက်နေပါပြီ။”

“အထက်အာဏာပိုင်တွေ” ဆီ ကျမ်းစာသတင်းတရား ဆက်ရောက်ရှိနေတဲ့အတွက် အာဏာပိုင်တွေနဲ့ တခြားသူတွေဆီကနေ ကျေးဇူးတင်စာတွေ ထပ်ရမယ်ဆိုတာ သေချာပါတယ်။—၁ တိမောသေ ၂:၂။