“အမြဲ ဝမ်းမြောက်ကြပါ” ၂၀၂၀ အစည်းအဝေးကြီးဟာ ယေဟောဝါသက်သေတွေရဲ့ သမိုင်းမှာ အထူးခြားဆုံးပါပဲ။ ဘာသာစကား ၅၀၀ ကျော်နဲ့ ဘာသာပြန်ထားတဲ့ အစည်းအဝေးကြီး အစီအစဉ်ကို မိမိတို့အိမ်ကနေ ကြည့်ရှုခဲ့ကြတယ်။ ဒီအတွက် ပစ္စည်းကိရိယာ စုံစုံလင်လင် မရှိတာ၊ အချိန်တိုအတွင်း ပြီးစီးရမှာ စတဲ့ အခက်အခဲတွေကို ဘာသာပြန်တွေ ကြုံခဲ့ရတယ်။

ကင်ညာနိုင်ငံ၊ ကီကူယူ ဘာသာပြန်အဖွဲ့ ညီအစ်မတစ်ဦးက “ဌာနခွဲကို လော့ခ်ဒေါင်းချလိုက်တော့ အသံသွင်းမယ့်သူတွေ မရှိတော့သလောက်ပဲ။ ဒါကြောင့် အဝေးမှာနေတဲ့ ညီအစ်ကို/မတွေကို အကူအညီ တောင်းလိုက်တယ်။ ယေဟောဝါရဲ့ စွမ်းအားတော် ကူညီပေးတာကို မြင်ခွင့်ရတာ တကယ်အခွင့်ထူးပါပဲ” လို့ပြောတယ်။

ကိုရီးယား လက်သင်္ကေတပြအဖွဲ့နဲ့ ဘာသာပြန်အဖွဲ့လည်း အလားတူ အခက်အခဲမျိုး ကြုံခဲ့ရတယ်။ အပြင်က အလုပ်ဆင်းတဲ့သူတွေလည်း အသံသွင်းဖို့ ဗေသလကို မလာနိုင်ကြဘူး။

ဒီအခက်အခဲကို ဖြေရှင်းဖို့ ညီအစ်ကိုတွေက ကိုယ့်အိမ်မှာပဲ စတူဒီယိုတွေ ပြင်ဆင်ကြတယ်။ အသံသွင်းဖို့ လိုအပ်တဲ့ ပစ္စည်းကိရိယာအများစုကို နယ်ခံတွေက ပေးလှူကြတယ်။ စည်းဝေးပွဲတွေ ဖျက်သိမ်းလိုက်တဲ့အတွက် စည်းဝေးပွဲခန်းမတွေမှာ တပ်ဆင်ထားတဲ့ ကင်မရာတွေကို သုံးပြီး လက်သင်္ကေတပြ အစီအစဉ်ကို ရိုက်ကူးနိုင်ခဲ့တယ်။

ဗင်နီဇွဲလားက ဘာသာပြန်တချို့ကျတော့ အင်တာနက်လိုင်း မကောင်းလို့၊ တချို့ကျတော့ ပစ္စည်းကိရိယာ စုံစုံလင်လင် မရှိလို့ အလုပ်မှာ အခက်တွေ့ကြတယ်။ ဒါပေမဲ့ ကြံရည်ဖန်ရည်ရှိတဲ့ ဘာသာပြန်တွေဟာ ရှိတဲ့ပစ္စည်းလေးတွေ သုံးပြီး အလုပ်ပြီးမြောက်အောင် လုပ်ခဲ့ကြတယ်။ တစ်နေရာမှာဆိုရင် ပြင်ပဆူညံသံတွေ မဝင်အောင် မွေ့ယာတွေကို ကာထားပြီး အသံသွင်းခဲ့ကြတယ်။

တောင်ဆူဒန်နိုင်ငံ၊ ဂျူဘာမြို့တော်၊ ဇန်ဒီဘာသာပြန်အဖွဲ့က ဘာသာပြန်တစ်ယောက် ဒီလိုပြောပြတယ်- “အစည်းအဝေးကြီး အစီအစဉ်တစ်ခုလုံးကို အသံသွင်းမယ်ဆိုတာ ကြားသိရတော့ ‘မဖြစ်နိုင်တာ။ ရုပ်သံဗီဒီယို ၉၀ ကျော်ပါတဲ့ အစီအစဉ်တစ်ခုလုံးကို အသံသွင်းဖို့ နှစ်လတည်းနဲ့ မပြီးနိုင်ဘူး’ လို့ ကျွန်တော် တွေးမိတယ်။ ဒီပရောဂျက် ပြီးသွားတာကို မြင်တော့ ယေဟောဝါရဲ့ အလိုရှိရာမှန်သမျှ ပြီးမြောက်အောင် ဘာကမှ မတားဆီးနိုင်မှန်း ယုံကြည်စိတ်ချသွားတယ်။ ဘုရားရဲ့ လုပ်ဆောင်ပုံ တကယ်အံ့ဩစရာပဲ။”—မဿဲ ၁၉:၂၆။

“အမြဲ ဝမ်းမြောက်ကြပါ” ၂၀၂၀ အစည်းအဝေးကြီး အစီအစဉ်ဟာ “လူအမျိုးမျိုးကို ကယ်တင်ခြင်း ရစေဖို့၊ အမှန်တရားအကြောင်း တိကျမှန်ကန်စွာ သိရှိစေဖို့” အလိုရှိတဲ့အရှင်၊ ယေဟောဝါပေးတဲ့ လက်ဆောင်ပါ။”—၁ တိမောသေ ၂:၄။