JW ရုပ်သံထုတ်လွှင့်မှုရဲ့ လစဉ် ဘုရားရေးရာအစီအစဉ်ကနေ ကမ္ဘာချီ ညီအစ်ကိုအသင်းအပင်း အကျိုးခံစားလာခဲ့တာ ငါးနှစ်ရှိပါပြီ။ ၂၀၂၀ လုပ်ငန်းတော်နှစ်နဲ့ နောက်ပိုင်းနှစ်တွေအတွက် ရုပ်သံထုတ်လွှင့်မှုတွေကို စောင့်မျှော်နေပါတယ်။ အခုတော့ ၂၀၁၄၊ အောက်တိုဘာလရဲ့ ပထမဆုံး ထုတ်လွှင့်မှုကနေစပြီး ထူးခြားတဲ့ ပြီးမြောက်အောင်မြင်မှုတွေအကြောင်း သုံးသပ်ရအောင်။

ဘာသာစကား ၁၈၅ မျိုးနဲ့ ဘာသာပြန်ဆို။ အစပိုင်းမှာ လစဉ်ရုပ်သံထုတ်လွှင့်မှုတွေကို အင်္ဂလိပ်လိုပဲ ရနိုင်တယ်။ နောက်တော့ ၂၀၁၅၊ မေလမှာ ဘာသာစကား ၄၀ ကျော်နဲ့ ဘာသာပြန်ဖို့ အုပ်ချုပ်ရေးအဖွဲ့ ခွင့်ပြုခဲ့တယ်။ လေးနှစ်အတွင်းမှာပဲ ပျမ်းမျှအနေနဲ့ ဘာသာစကား ၁၈၅ မျိုးနဲ့ ရရှိနေပါပြီ။

အပြည်ပြည်ဆိုင်ရာ အကြောင်းအရာများ။ ရုပ်သံထုတ်လွှင့်မှုဟာ တစ်ကမ္ဘာလုံးက ညီအစ်ကိုတွေအတွက် ရည်ရွယ်ထားတာမို့ နိုင်ငံအသီးသီးက ဗီဒီယိုအဖွဲ့တွေ ရိုက်ကူးပေးတဲ့ ဗီဒီယိုအပိုင်းတွေ များများလာပြီ။ သီးခြားနေရာမှာရှိတဲ့ အသင်းတော်တွေအကြောင်း ဗီဒီယိုပြကွက်တွေနဲ့ ရုပ်သံထုတ်လွှင့်မှု အစီအစဉ်ကို နိဂုံးချုပ်လေ့ရှိတယ်။ အဲဒီထဲမှာ အီသီယိုးပီးယား၊ အိုက်စလန်၊ မွန်ဂိုလီးယား၊ စိုက်ပန်၊ တူဗာလူ နဲ့ ယူဂန္ဓာ အသင်းတော်တွေ ပါတယ်။ JW ရုပ်သံထုတ်လွှင့်မှု အစီအစဉ်ကို ဝေးလံတဲ့နေရာတွေ အပါအဝင် နိုင်ငံပေါင်း ၂၃၀ မှာ ကြည့်ရှုနေကြတယ်။ အဲဒီထဲမှာ အခြေချနေထိုင်သူမရှိတဲ့ ကမ္ဘာ့တောင်ဘက်စွန်း အန္တာတိတ်အနားက ဟာ့ဒ်ကျွန်းနဲ့ မက်ဒေါ်နယ်ကျွန်းတွေလည်း ပါဝင်တယ်။ ရုပ်သံအသစ် ထုတ်လွှင့်တိုင်း အဲဒီလမှာပဲ ပျမ်းမျှ ကြည့်ရှုမှု၊ ကူးယူမှု ၈.၆ သန်းလောက်ရှိတယ်။

အကြောင်းအရာ စုံပြီး အရေအတွက်များပြား။ ဟောပြောချက်၊ လူတွေ့မေးမြန်းခန်း၊ တွေ့ကြုံမှု၊ နောက်ဆုံးရသတင်း၊ သရုပ်ဖော်ဇာတ်လမ်းတွေ စသဖြင့် တင်ဆက်ခဲ့တာ နာရီပေါင်း ၆၀ ကျော် ရှိပါပြီ။ ပထမဆုံး မူရင်းသီချင်းဖြစ်တဲ့ အကောင်းဆုံးအသက်တာ ထွက်လာကတည်းက လစဉ်ရုပ်သံထုတ်လွှင့်မှုမှာ တေးဗီဒီယို ပုံမှန်ပါဝင်လာတယ်။ ဒီသီချင်းတွေကို ဘာသာစကား ၃၆၈ မျိုးနဲ့ ဘာသာပြန်ဆိုခဲ့ပြီ။

တင်ဆက်သူများ။ အစပိုင်းမှာ အုပ်ချုပ်ရေးအဖွဲ့ဝင်တွေပဲ အစီအစဉ်တွေကို တင်ဆက်တာ။ နောက်ပိုင်းမှာ ကော်မတီအကူတွေက အုပ်ချုပ်ရေးအဖွဲ့နဲ့ တွဲတင်ဆက်လာတယ်၊ တစ်ခါတလေတော့ သူတို့ကိုယ်တိုင် တင်ဆက်တယ်။ လစဉ်ရုပ်သံထုတ်လွှင့်မှုကို တင်ဆက်သူ၊ ပူးတွဲတင်ဆက်သူ ညီအစ်ကိုပေါင်း ၂၉ ယောက်ရှိတယ်။

ကျေးဇူးတင် စကားများ။ လေဖြတ်ပြီး နောက်ဆက်တွဲဆိုးကျိုးတွေ ခံစားနေရတဲ့ အမေရိကန် ညီအစ်ကိုက မူရင်းသီချင်းတွေအတွက် အထူးကျေးဇူးတင်တယ်။ သူ ဒီလိုပြောတယ်- “ယေဟောဝါနဲ့ ကျမ်းစာအပေါ် ယုံကြည်ခြင်း ခိုင်ခံ့စေပြီး နားဝင်ချိုတဲ့ တေးဗီဒီယိုတွေဟာ ကျွန်တော့်ကို အကောင်းမြင်စိတ်ရှိစေတယ်။ လက်ရှိအခက်အခဲကို ရင်ဆိုင်နိုင်အောင် တကယ် ကူညီပေးတယ်။ ဒီတေးဗီဒီယိုတွေက ကျွန်တော့်ရဲ့ ခရစ်ယာန်အရည်အသွေးတွေကို တိုးတက်လာစေလို့ အံ့ဩရတယ်။ ဒီပြင်ဆင်ပေးမှုအတွက် သိပ်ကျေးဇူးတင်တယ်။”

၂၀၁၆၊ နိုဝင်ဘာ ရုပ်သံထုတ်လွှင့်မှုကို ကြည့်ရှုပြီးတဲ့နောက် ကင်ဆာကြောင့် သားလေးကို ဆုံးရှုံးလိုက်ရတဲ့ မိသားစုတစ်စု ဒီလို စာရေးလာတယ်- “လက်တစ်ကမ်း တေးဗီဒီယိုကို ကြည့်ရင်း မျက်ရည်တွေ စီးကျလာတယ်။ ကမ္ဘာသစ်ထဲ ရောက်နေတဲ့ အဲဒီမိဘတွေရဲ့ နေရာမှာ ဝင်ခံစားမိတယ်။ နာကျင်လွန်းလို့ မခံရပ်နိုင်တော့ဘူးဆိုပြီး တွေးတိုင်း ယေဟောဝါက နားလည်ပေးတယ်၊ ခံရပ်စေမယ်ဆိုတာ တစ်နည်းနည်းနဲ့ အမြဲ စိတ်ချစေတယ်။ စိတ်ရင်းမှန်နဲ့ ဆုတောင်းတာတွေကို ဒီဗီဒီယိုနဲ့ ယေဟောဝါ ဖြေကြားပေးလိုက်တာပဲ။”

ယူကရိန်းက မောင်နှံတစ်စုံက လစဉ်ရုပ်သံထုတ်လွှင့်မှုအတွက် ဒီလို ကျေးဇူးတင်စကား ပြောခဲ့တယ်- “JW ရုပ်သံထုတ်လွှင့်မှုကြောင့် အုပ်ချုပ်ရေးအဖွဲ့ဟာ မိသားစုဝင်တွေ ဖြစ်လာပြီ။”

ကမ္ဘာတစ်ဝန်းက ကိုယ်တော့်လူမျိုးကို ဆက်စည်းလုံးစေတဲ့ ဒီအချိန်တန် ပြင်ဆင်ပေးမှုအတွက် ယေဟောဝါကို ကျွန်တော်တို့ ကျေးဇူးတင်တယ်။—၁ ပေတရု ၂:၁၇။