မေ ၁၇၊ ၂၀၁၇
ကာဇက်စတန်
ကာဇက်စတန်မှာ နာမကျန်းဖြစ်နေတဲ့ ယေဟောဝါသက်သေကို ထောင်ချပြီး ကိုးကွယ်မှုကို ပိတ်ပင်
ကာဇက်စတန်၊ အယ်လမာတီ။ သင့်မြတ်ငြိမ်းချမ်းစေတဲ့ ကျမ်းစာ ပညာပေးလုပ်ငန်း လုပ်ဆောင်မှုအတွက် တေမူ အခါမေဒေါ့ဗ်ကို “ဘာသာရေးသဘောထားကွဲလွဲမှုကို လှုံ့ဆော်တယ်၊” “[ဘာသာရေးအရ] သာလွန်မှုကို အားပေးထောက်ခံတယ်” ဆိုပြီး ကာဇက်စတန်မြို့တော် အက်စတာနာ တရားရုံးက ၂၀၁၇၊ မေ ၂ ရက်မှာ ထောင်ဒဏ်ငါးနှစ် ချမှတ်လိုက်ပါတယ်။ တရားရုံးက မစ္စတာ အာခါမေဒေါ့ဗ်ကို ထောင်ဒဏ်အပြင် ကျမ်းစာပညာပေးလုပ်ငန်းမှာ မပါဝင်ဖို့လည်း သုံးနှစ်ပိတ်ပင်ထားပါတယ်။ သားသုံးယောက်ရဲ့ ဖခင်၊ အသက် ၆၁ နှစ်ရှိ ခင်ပွန်းဖြစ်သူ မစ္စတာ အာခါမေဒေါ့ဗ်ဟာ သွေးထွက်နေတဲ့ အကျိတ်အတွက် ဆေးကုသမှု လိုအပ်နေပေမဲ့ ဆေးကုသမှုခံယူခွင့် မပြုတဲ့အတွက် အထူးစိုးရိမ်ရတဲ့ အခြေအနေ ဖြစ်နေပါတယ်။ တရားရုံး ဆုံးဖြတ်ချက်ကို မစ္စတာ အခါမေဒေါ့ဗ်က အယူခံဝင်မှာ ဖြစ်ပါတယ်။ အယူခံမှုကို မေလကုန်ပိုင်းမှာဖြစ်ဖြစ်၊ ဇွန်လအစပိုင်းမှာဖြစ်ဖြစ် ကြားနာနိုင်စရာ ရှိပါတယ်။
ဒီဆုံးဖြတ်ချက်ဟာ တရားရေးကိစ္စမှာ စိုးရိမ်စရာကောင်းတဲ့ နောက်ဆုံး အခြေအနေ ဖြစ်ပါတယ်။ ဒီအမှုဟာ ကာဇက်စတန်အမျိုးသား လုံးခြုံရေးကော်မတီက မစ္စတာ အခါမေဒေါ့ဗ်ကို ဖမ်းဆီးပြီး ကာဇက်စတန်ရဲ့ အငြင်းပွားဖွယ် ပုဒ်မ ၁၇၄(၂) နဲ့ စွဲချက်တင်လိုက်တဲ့ ၂၀၁၇၊ ဇန်နဝါရီ ၁၈ ရက်မှာ စတင်ခဲ့ပါတယ်။ အဲဒီအချိန်ကတည်းက မစ္စတာ အခါမေဒေါ့ဗ်ဟာ ချုပ်နှောင်ခံနေရပြီး ဆေးဝါးကုသခွင့်လည်း ပိတ်ပင်ခံထားရပါတယ်။ ယေဟောဝါသက်သေများရဲ့ ကမ္ဘာ့ဌာနချုပ်က ပြောရေးဆိုခွင့်ရှိသူ ဒေးဗစ် ဆီမိုနီယန်က ဒီလိုပြောပါတယ်- “မစ္စတာ တေမူကိစ္စကို ကမ္ဘာတစ်ဝန်းက ယေဟောဝါသက်သေတွေ အင်မတန် စိုးရိမ်နေကြပါတယ်။ အာဏာပိုင်တွေအနေနဲ့ ဒီအကြောင်းမဲ့ စွဲဆိုချက်တွေကို ပယ်ချပေးမယ်၊ ဥပဒေလိုက်နာတဲ့ ဒီသစ္စာရှိခရစ်ယာန်တစ်ယောက်ကို မိသားစုနဲ့ ပြန်လည်ပေါင်းစည်းခွင့်၊ အရေးပေါ် လိုအပ်နေတဲ့ ဆေးဝါးကုသခွင့် ပြန်ပေးမယ်လို့ ကျွန်တော်တို့ မျှော်လင့်ပါတယ်။”
ရုရှားနိုင်ငံက ချမှတ်တဲ့ ဘာသာရေး ညှဉ်းပန်းနှိပ်စက်မှုပုံစံ၊ အထူးသဖြင့် ရုရှားနိုင်ငံရှိ ယေဟောဝါသက်သေများရဲ့ အုပ်ချုပ်ရေးဌာနကို ဖျက်သိမ်းဖို့ ရုရှားဖယ်ဒရေးရှင်း တရားရုံးချုပ်ရဲ့ မကြာသေးခင်က ဆုံးဖြတ်ချက်အတိုင်း ကာဇက်စတန်နိုင်ငံအနေနဲ့ လိုက်လျှောက်ကျင့်သုံးနေတဲ့ အထောက်အထားအဖြစ် အက်စတာနာ တရားရုံးရဲ့ လုပ်ရပ်တွေကို ယေဟောဝါသက်သေတွေ ရှုမြင်ကြပါတယ်။ မစ္စတာ ဆီမိုနီယန်က ဒီလိုရှင်းပြပါတယ်- “ရုရှားနိုင်ငံမှာရှိတဲ့ ကျွန်တော်တို့ရဲ့ ကိုးကွယ်မှုဘာသာအမှုလိုပဲ တေမူ အခါမေဒေါ့ဗ်ဟာ ကျွန်တော်တို့ရဲ့ ကိုးကွယ်မှုကို အစွန်းရောက်ဝါဒအဖြစ် တလွဲသတ်မှတ်ဖော်ပြတဲ့ ဥပဒေရဲ့ သားကောင် ဖြစ်သွားရတာပါ။ ကာဇက်စတန်နိုင်ငံအနေနဲ့ အဲဒီဥပဒေတွေကို အလွဲသုံးစားလုပ်ပြီး ငြိမ်းချမ်းစွာ ကိုးကွယ်မှုကို နှိပ်စက်ညှဉ်းပန်းနေတာမျိုးကို ရပ်တန့်ပေးဖို့ ကုလသမဂ္ဂ လူ့အခွင့်အရေး ကော်မတီနဲ့ နိုင်ငံတကာ ဘာသာရေး လွတ်လပ်မှုဆိုင်ရာ အမေရိကန်ပြည်ထောင်စု ကော်မရှင်အပါအဝင် နိုင်ငံတကာ အဖွဲ့အစည်းတွေကလည်း တောင်းဆိုနေကြပါတယ်။ ကာဇက်စတန်နိုင်ငံမှာရှိတဲ့ ကျွန်တော်တို့ရဲ့ ဘာသာဝင်အားလုံးအတွက် စိုးရိမ်နေကြပါတယ်။ ကမ္ဘာတစ်ဝန်းက လူတွေကို ကူညီပေးနေတဲ့ ကျမ်းစာပညာပေးလုပ်ငန်း ဆောင်ရွက်တဲ့အတွက် နှောင့်ယှက်မခံရတော့ဖို့လည်း မျှော်လင့်နေကြတယ်။ ဒီအမှုကို ကျွန်တော်တို့ အင်မတန် စိတ်ဝင်စားနေကြပါတယ်။”
Media Contacts:
International: David A. Semonian, Office of Public Information, +1-845-524-3000
Kazakhstan: Bekzat Smagulov, +7-747-671-45-01