၂၀၁၇၊ ဇွန် ၂၉ ရက်မှာ ကာဇက်စတန်နိုင်ငံ၊ အယ်လ်မတီမြို့တော် တရားရုံးက ယေဟောဝါသက်သေတွေရဲ့ ကာဇက်စတန် ခရစ်ယာန် ဗဟိုဌာနကို ဒဏ်ငွေရိုက်ပြီး လုပ်ငန်းအားလုံးကို သုံးလရပ်စဲဖို့ အမိန့်ထုတ်ခဲ့တယ်။ အစိုးရအရာရှိတွေက အဲဒီခရစ်ယာန် ဗဟိုဌာနကို ဝင်စစ်ဆေးခဲ့တယ်၊ လုံခြုံရေးကင်မရာ ၂၅ ခု တပ်ဆင်ထားနှင့်ပြီးသားဖြစ်ပေမဲ့ လူအများသုံး အဆောက်အဦနဲ့ဆိုင်တဲ့ ဥပဒေနဲ့အညီ နောက်ထပ် ၃ ခု တပ်ဆင်ဖို့ လိုတယ်လို့ ပြောပြီး နောက်ပိုင်းမှာ တရားရုံးက အဲဒီဆုံးဖြတ်ချက် ချခဲ့တာ ဖြစ်တယ်။ တကယ်တော့ ၂၀၁၇၊ ဖေဖော်ဝါရီ ၆ ရက်နေ့မှာ ဗဟိုဌာနရဲ့ မြေကွက် အဆောက်အအုံတွေမှာ လုံခြုံရေးကင်မရာတွေ တပ်ဆင်ထားတဲ့ နေရာတွေကို တင်ပြပြီးသား၊ အစိုးရအရာရှိတွေကလည်း သဘောတူ လက်ခံပြီးသား ဖြစ်တယ်။ အစိုးရအရာရှိတွေ အဲဒီလို သဘောတူလက်ခံခဲ့တာက ဗဟိုဌာနဟာ ဥပဒေလိုက်နာတယ်လို့ အတည်ပြုရာ ရောက်တယ်။

ဗဟိုဌာနရဲ့ ဥက္ကဌ ပိုလတ် ဘက်ဇာန်က ဒီလိုပြောတယ်– “ဥပဒေချိုးဖောက်ပါတယ်ဆိုတဲ့ စွဲချက်နဲ့ ကျွန်တော်တို့ ဗဟိုဌာနရဲ့ လုပ်ငန်းတွေကို ရပ်ဆိုင်းလိုက်တာဟာ မတရားတဲ့ ပြစ်ဒဏ်ဖြစ်တယ်။ သက်သေခံတွေအပေါ် စိတ်စွန်းကွက်မှုကြောင့်သာ အဲဒီဆုံးဖြတ်ချက် ချတာဖြစ်လို့ ကျွန်တော်တို့ အယူခံဝင်ကြမယ်။”

ကာဇက်စတန်နိုင်ငံက ယေဟောဝါသက်သေတွေကို ဥပဒေအရာရှိတွေ ပိုပိုနှောင့်ယှက် နေကြတယ်။ တရားသူကြီး အန်၊ အမ်၊ ပါကီဒီနောဗ်ရဲ့ ဇွန် ၂၉ ရက် ဆုံးဖြတ်ချက်မတိုင်ခင် အစိုးရအရာရှိတွေက ဗဟိုဌာနကို လုံခြုံရေးအကြောင်းပြချက်နဲ့ မေ ၁၇ ရက်၊ နေ့ခင်းကြောင်တောင်အချိန်မှာ ဝင်ရောက်စစ်ဆေးခဲ့တယ်။ (အရင်က ကေဂျီဘီ လို့ခေါ်တဲ့) ပြည်တွင်းလုံခြုံရေးတပ်ဖွဲ့နဲ့ မျက်နှာဖုံးစွပ်ထားတဲ့ လက်နက်ကိုင် SWAT ရဲတပ်ဖွဲ့တွေအပါအဝင် အယောက် ၃၀ ကျော်ဟာ အက်စ်တာနာမြို့တော်မှာ ကျင်းပမယ့် ၂၀၁၇ ပြပွဲ လုံခြုံရေးအတွက် ဆိုတဲ့ အကြောင်းပြချက်နဲ့ လူထုအဆောက်အဦတွေကို ဝင်ရောက်စစ်ဆေးတာလို့ ပြောကြတယ်။

၂၀၁၇၊ ဇွန် ၂၃-၂၅ ရက်မှာ ယေဟောဝါသက်သေတွေက အထူးအစည်းအဝေး တစ်ခု ကျင်းပဖို့ စီစဉ်ထားတယ်။ အမေရိကန်၊ ဥရောပ၊ ယူကရိန်း၊ ဂျော်ဂျီယာ၊ ကာဂျစ္စတန်နဲ့ တခြားနိုင်ငံတွေကနေ လာတက်ရောက်ခဲ့ကြတယ်။ ဒါပေမဲ့ အစိုးရအရာရှိတွေ နှောင့်ယှက်တဲ့အတွက် အစည်းအဝေး ကျင်းပမယ့်နေရာတွေအတွက် စာချုပ်ချုပ်ထားတာကို သူတို့တွေ ဖျက်သိမ်းလိုက်ကြတယ်။ အဲဒါကြောင့် ကိုယ်စားလှယ် ၁,၅၀၀ ဟာ ဒေသခံ သက်သေခံတွေနဲ့အတူ ဗဟိုဌာနမှာပဲ ကျင်းပတဲ့ အစည်းအဝေးကို တက်ရောက်ခဲ့ကြရတယ်။

အစည်းအဝေးရဲ့ ပထမရက်မှာ ရဲတွေဟာ နိုင်ငံခြားက ကိုယ်စားလှယ် ၅၀၀၊ ဟိုတယ်ကနေ မထွက်ခင် ဘတ်စကားယာဉ်မောင်းတွေရဲ့ စာရွက်စာတန်းတွေကို စစ်ဆေးသလိုနဲ့ ဘတ်စကား ၁၁ စီးကို ထိန်းထားပြီး နှစ်နာရီ ကြန့်ကြာစေခဲ့တယ်။ ဒုတိယနေ့မှာဆိုရင် ယာဉ်မောင်းတွေရဲ့ စာရွက်စာတန်းတွေကို စစ်ဆေးသလိုနဲ့ ရဲတွေက ဘတ်စကား အစီး ၂၀ ကို ရပ်ခိုင်းထားပြီး ကိုယ်စားလှယ် ၉၀၀ ကို သုံးနာရီ ကြန့်ကြာစေခဲ့တယ်။

ဒီကိစ္စကို ဗဟိုဌာနက အယ်လ်မတီတရားရုံးကို တိုင်ကြားပေမဲ့ ဘာမှ အရေးမယူခဲ့ဘူး။ ဒါပေမဲ့ အစည်းအဝေး တတိယနေ့မှာတော့ ရဲတွေ အနှောင့်အယှက် မပေးတော့ဘူး။ အစည်းအဝေးပြီးနောက် လေးရက်အကြာမှာ အယ်လ်မတီ တရားရုံးက ဗဟိုဌာနရဲ့ လုပ်ငန်းတွေကို ရပ်စဲလိုက်ကြောင်း အမိန့်ထုတ်ခဲ့တယ်။

၂၀၁၂၊ ဒီဇင်ဘာလကတည်းက ကာဇက်စတန်အစိုးရဟာ တစ်နိုင်ငံလုံးမှာ ယေဟောဝါသက်သေတွေရဲ့ ဘာသာရေးလွတ်လပ်ခွင့်ကို ပိုပြီးချုပ်ချယ်လာတယ်။ မှတ်ပုံမတင်ဘဲ “သာသနာပြု” လုပ်ငန်းလုပ်နေတယ်ဆိုပြီး ယေဟောဝါသက်သေ ၆၀ ကျော်ကို အစိုးရက အဆမတန် ဒဏ်ရိုက်တယ်။

၂၀၁၇၊ ဇန်နဝါရီလမှာ ကိုယ့်ဘာသာရေးခံယူချက်ကို လိုက်ပြောတယ်ဆိုပြီး ယေဟောဝါသက်သေ နှစ်ယောက်ကို ကာဇက်စတန် အစိုးရအရာရှိတွေက ဖမ်းဆီးခဲ့တယ်။ မေလတုန်းက တေမူ အခါမေဒေါ့ဗ်ဟာ ဘာသာရေးလုပ်ငန်းလုပ်တဲ့အပြစ်နဲ့ ငါးနှစ်ထောင်ဒဏ်ချခဲ့တယ်။ နောက်အမှုတစ်ခုမှာတော့၊ ရုရှားအစိုးရက “အစွန်းရောက်” စာပေဆိုပြီး ပိတ်ပင်ထားတဲ့ ဘာသာရေးစာစောင်ကို ဝေငှလို့ ဘာသာရေးမုန်းတီးမှု ဖြစ်ပွားစေတယ်ဆိုပြီး သက်သေခံတစ်ယောက် စစ်ဆေးခံနေရတယ်။

ယေဟောဝါသက်သေတွေဟာ လွတ်လပ်စွာ ဝတ်ပြုကိုးကွယ်ခွင့်နဲ့ ပတ်သက်ပြီး သာသနာရေးဌာနနဲ့ အကြိမ်ကြိမ် ဆွေးနွေးခဲ့ပေမဲ့ မအောင်မြင်သေးဘူး။ ဒါပေမဲ့လည်း ယေဟောဝါသက်သေ တစ်ယောက် ဖြစ်တဲ့ အန်ဒြေ ကိုရိုယော့ဗ်က သူ့ရဲ့ ဘာသာရေးခံယူချက်တွေကို ဟောပြောလို့ သူ့အမှုကို အထွေထွေအစိုးရ ရှေ့နေရုံးက တင်လိုက်လို့ ကာဇက်စတန် တရားရုံးချုပ်က ကိုင်တွယ်ခဲ့တယ်။ ၂၀၁၇၊ ဇွန် ၁ ရက်၊ တရားဆုံးဖြတ်ချက်အရ ကိုရိုယော့ဗ်ဟာ အပြစ်မရှိကြောင်းနဲ့ ဘာသာရေးလွတ်လပ်ခွင့်ထဲမှာ ကိုယ့်ခံယူချက်ကို အေးအေးဆေးဆေး ပြောဆိုခွင့်ရှိတာကို အသိအမှတ်ပြုတယ်။ ယေဟောဝါသက်သေတွေကို တရားရုံးချုပ် အနိုင်ပေးတဲ့ ဆုံးဖြတ်ချက် ရှိပေမဲ့ အောက်တရားရုံးတွေက အဲဒီဆုံးဖြတ်ချက်ကို မလိုက်နာဘဲ “တရားမဝင် သာသနာပြုလုပ်ငန်း” လုပ်တယ်ဆိုပြီး ယေဟောဝါသက်သေတွေကို ဆက်လက် တရားစွဲနေကြတုန်းပဲ။

ယေဟောဝါသက်သေတွေအတွက် လက်ထောက်ရှေ့နေဖြစ်တဲ့ ဂရက်ဂရီ အယ်လင် ဒီလိုပြောတယ်– “နိုင်ငံတကာက အသိအမှတ်ပြုတဲ့ ဘာသာရေးလွတ်လပ်ခွင့်ကို မပေးဘဲ ကာဇက်စတန်နိုင်ငံဟာ ရုရှားလို အခြေအမြစ်မရှိတဲ့ စွဲချက်တွေတင်တာဟာ ဝမ်းနည်းစရာပဲ။ ဗဟိုဌာနရဲ့ လုပ်ငန်းကို ရပ်စဲဖို့ ဇွန် ၂၉ ကချတဲ့ ဆုံးဖြတ်ချက်ဟာ ဒီလောက်နဲ့ပဲ ပြီးသွားမှာမဟုတ်ဘူးလို့ ထင်တယ်။ ဒီဆုံးဖြတ်ချက်အတွက် ကျွန်တော်တို့ အယူခံဝင်တာကို တရားသဖြင့် စီရင်ကြလိမ့်မယ်လို့ မျှော်လင့်ပါတယ်။”

ရုရှားက ယေဟောဝါသက်သေတွေကို ပိတ်ပင်ဖို့ ကြိုးစားသလိုပဲ ကာဇက်စတန်က ယေဟောဝါသက်သေတွေရဲ့ လုပ်ငန်းကို ပိတ်ပင်ဖို့ ကြိုးစားနေပုံပေါက်နေလို့ ကမ္ဘာတစ်ဝန်းက ယေဟောဝါသက်သေတွေ စိုးရိမ်နေကြပါတယ်။