တေ​မူ အခါ​မေ​ဒေါ့ဗ်​ရဲ့ ကျန်းမာရေး​ကို မိသားစုနဲ့ မိတ်ဆွေ​တွေ ပို​စိုးရိမ်​လာ​ကြပါတယ်။ ယေဟောဝါ​သက်သေ​တစ်ဦး​ဖြစ်တဲ့ မစ္စတာ အခါ​မေ​ဒေါ့ဗ်​ဟာ အသက် ၆၁ နှစ် ရှိပြီး ထောင်​မကျ​ခင် တစ်နှစ်ကျော်​ကတည်းက ကျန်းမာရေး မကောင်း​ဘူး။ ၂၀၁၈၊ ဖေဖော်ဝါရီ ၈ ရက်​နေ့မှာ အကျိတ်​နှစ်ခု ခွဲစိတ်​ခဲ့​ရ​ပါတယ်။ တစ်ခုက အသက်​အန္တရာယ်​တောင် ရှိတယ်။ ပါ​လို​ဒါ ပြုပြင်​ထိန်းသိမ်းရေး အကျဉ်းထောင် အခြေအနေ​အပြင် ဆေးဝါး​ကုသမှု ထပ်​လိုအပ်​နေတဲ့​အတွက် မိသားစုနဲ့ ရှေ့နေ​တွေ​က အစိုးရ​အာဏာပိုင်တွေ​ဆီ အခါ​မေ​ဒေါ့ဗ်​ကို လွှတ်​ပေးဖို့ အသနားခံ​ကြပေမဲ့ လျစ်လျူရှု​ခံ​နေရ​ပါတယ်။

ကာဇက်​စ​တန်​တရားရုံး​က တေ​မူ အခါ​မေ​ဒေါ့ဗ်​ကို ငါးနှစ် ပြစ်ဒဏ်ချ​တဲ့​အတွက် ၂၀၂၂ ခုနှစ်​မှ ထောင်​ကနေ လွတ်​ပါ​မယ်။ မစ္စတာ အခါ​မေ​ဒေါ့ဗ်​ဟာ ဘာသာရေး​လွတ်လပ်ခွင့်ကို ကျင့်သုံး​တာ​က​လွဲလို့ ဘာ​ပြစ်မှု​မှ မကျူးလွန်​ခဲ့​ပါဘူး။ ဒါပေမဲ့ အာဏာပိုင်တွေ​က သူ့ကို ဖမ်းဆီး​ပြီး တရားစွဲ​ဆို​ခဲ့​ကြတယ်။ အကြမ်းဖက်​သ​မား​တွေ​နဲ့ ဆက်သွယ်တယ်​ဆိုတဲ့ ယူဆချက်​နဲ့ သူ့​နာမည်​နဲ့ ဘဏ်​စာရင်းကို​ပါ ပိတ်​လိုက်ကြတယ်။ အယူခံဝင်​မှု​အားလုံးကိုလည်း ကာဇက်​စ​တန်​တရားရုံး​က ပယ်ချ​ခဲ့တယ်။

မတရား​ဖမ်းဆီး​ထိန်းသိမ်း​ခြင်း​ဆိုင်ရာ ကုလသမဂ္ဂ​လုပ်ငန်း​အဖွဲ့က မစ္စတာ အခါ​မေ​ဒေါ့ဗ်​ကို လွှတ်​ပေးဖို့၊ မှားယွင်းစွာ စွဲချက်​တင်ထား​တာ​ကို ရုပ်သိမ်း​ပေးဖို့ ကာဇက်​စ​တန်​အစိုးရကို တိုက်တွန်းခဲ့တယ်။ ကုလသမဂ္ဂ လူ့​အခွင့်အရေး ကော်မတီက​လည်း မစ္စတာ အခါ​မေ​ဒေါ့ဗ် ကျန်းမာရေး မကောင်းတဲ့​အတွက် လွှတ်​ပေးဖို့ အရေးတကြီး တောင်းဆိုခဲ့တယ်။

မစ္စတာ အခါ​မေ​ဒေါ့ဗ်​ရဲ့ ရှေ့နေ ဒီလို​ပြောတယ်– “တေ​မူ​ဟာ မတရား ထောင်ချ​ခံရတဲ့​အပြင် ကျန်းမာရေး​လည်း မကောင်း​ပါဘူး။ ဆေး​ကုသမှု ခံယူဖို့လည်း လို​နေတဲ့​အတွက် တရား​မျှတ​စွာ ကိုင်တွယ်​စေ​ချင်​ပါတယ်။ ကုလသမဂ္ဂ အဖွဲ့အစည်းတွေရဲ့ တိုက်တွန်းချက်​တွေ​နဲ့​အညီ ကာဇက်​စ​တန် အာဏာပိုင်တွေ​အနေနဲ့ တေ​မူကို ထောက်ထား​စာနာ​ပြီး ထောင်​ကနေ လွှတ်​ပေးဖို့ ကျွန်တော်တို့ အသနားခံ​ပါတယ်။”