၂၀၂၁၊ ဧပြီ ၇ ရက်မှာ ကိုလံဘီယာ ဖွဲ့စည်းပုံ အခြေခံဥပဒေဆိုင်ရာ ခုံရုံးက အရွယ်မရောက်သေးတဲ့ ယေဟောဝါသက်သေတစ်ဦးရဲ့ ဆေးကုသမှုနဲ့ပတ်သက်တဲ့ ကိုယ်ပိုင် ဆုံးဖြတ်ပိုင်ခွင့်ကို အသိအမှတ်ပြုကြောင်း စီရင်ချက် ချလိုက်ပါတယ်။ ဒီအမှုမှာ သွေးမသွင်းဘဲ တခြား ဆေးကုသမှုတွေ ခံယူဖို့ လူနာ တောင်းဆိုထားတယ်။ ဖွဲ့စည်းပုံ အခြေခံဥပဒေဆိုင်ရာ ခုံရုံးက အရွယ်မရောက်သေးသူတွေ လက်မှတ်ထိုးထားတဲ့ ဆေးဘက်ဆိုင်ရာ ညွှန်ကြားချက် ကတ်ပြား တရားဝင်ကြောင်း၊ ဒီကလေးသူငယ်တွေရဲ့ မိဘတွေဟာ ဆေးကုသမှုကို လျစ်လျူရှုမထားကြောင်း လက်ခံတယ်။

၂၀၂၀၊ မေ ၂၇ မှာ အသက် ၁၆ နှစ်အရွယ် ညီအစ်မ ဒဲန်ယဲလာ ခိုင်စီဒိုမှာ သွေးကင်ဆာ ရှိနေမှန်း သိလိုက်ရတယ်။ ဆေးဝန်ထမ်းတွေက သွေးသွင်းတာ၊ ကင်ဆာဆေးသွင်းတာ လုပ်စေချင်တယ်။ ဒဲန်ယဲလာက အားနည်းနေပေမဲ့ ကျမ်းစာယုံကြည်ချက်အရ လုံးဝ သွေးမသွင်းချင်ကြောင်း လေးစားစွာ ရှင်းပြတယ်။—တမန်တော် ၁၅:၂၉။

၂၀၂၀၊ ဇွန် ၂၄ မှာ ကိုလံဘီယာ မိသားစု လူမှုဖူလုံရေးအဖွဲ့ (ICBF) က ဒဲန်ယဲလာ သဘောမတူရင်တောင် သွေးသွင်းဖို့ ဆေးဝန်ထမ်းတွေကို ခွင့်ပြုမိန့်ပေးခဲ့တယ်။ ဒဲန်ယဲလာရဲ့ စိတ်ကျန်းမာရေး ဆေးစစ်ချက်ကိုလည်း တောင်းတယ်။ ဆေးစစ်ချိန်အတွင်း ဒဲန်ယဲလာဟာ ဘယ်ကုသမှုကို လက်ခံမယ်၊ လက်မခံဘူးဆိုတာ ဆုံးဖြတ်နိုင်တဲ့အထိ စိတ်ဓာတ်ရင့်ကျက်ကြောင်း သိရတယ်။ သွေးမသွင်းဖို့ ဖိအားပေးခံရလို့ မဟုတ်ဘဲ ဒဲန်ယဲလာကိုယ်တိုင် ဘာသာရေး ယုံကြည်ချက်ကြောင့် ဆုံးဖြတ်ခြင်း ဖြစ်တယ်လို့လည်း စိတ်ကျန်းမာရေး ဆေးစစ်ချက်က ဖော်ပြတယ်။

အောက်တရားရုံးက အရွယ်မရောက်သေးသူအနေနဲ့ သွေးမသွင်းဖို့ ငြင်းဆိုပိုင်ခွင့် ရှိကြောင်း ထောက်ခံတယ်။ ဒါပေမဲ့ သွေးသွင်းသင့်တယ်လို့ ဆရာဝန်တွေ ယူဆခဲ့ရင် သွင်းနိုင်တယ်လို့ အယူခံရုံးက ဆုံးဖြတ်တယ်။ မိဘတွေအကူအညီနဲ့ ဒဲန်ယဲလာဟာ သွေးမသွင်းဖို့ ငြင်းဆိုပိုင်ခွင့်အတွက် ဖွဲ့စည်းပုံ အခြေခံဥပဒေဆိုင်ရာ ခုံရုံးဆီ အယူခံဝင်တယ်။

အပြီးသတ် စီရင်ချက်မှာ ဖွဲ့စည်းပုံ အခြေခံဥပဒေဆိုင်ရာ ခုံရုံးက “ဘုရားနဲ့ ရင်းနှီးတဲ့ ဆက်ဆံရေး ရှိခြင်း၊ ဝတ်ပြုကိုးကွယ်ခြင်းကို ကာကွယ်ပေးတဲ့” ဘာသာရေး လွတ်လပ်ခွင့်ကို အသိအမှတ်ပြုကြောင်း ဆုံးဖြတ်လိုက်တယ်။ အတင်းအကျပ် သွေးသွင်းတာက ဒဲန်ယဲလာနဲ့ ဘုရားရဲ့ ဆက်ဆံရေးကို ဖျက်ဆီးခြင်း၊ လူ့အခွင့်အရေး ချိုးဖောက်ခြင်း၊ ဂုဏ်သိက္ခာ မလေးစားခြင်း ဖြစ်တယ်လို့ ဖော်ပြတယ်။ သွေးသွင်းစရာ မလိုတဲ့ တခြား ဆေးကုသမှုတွေ လက်ခံပိုင်ခွင့် ရှိတယ်လို့လည်း တရားရုံးက ဆုံးဖြတ်တယ်။

အရေးပါတဲ့ ဒီဆုံးဖြတ်ချက်က အရွယ်မရောက်သေးတဲ့ ယေဟောဝါသက်သေတွေရဲ့ ဘာသာရေး ယုံကြည်ချက်နဲ့ ကိုက်ညီတဲ့ ဆေးကုသမှု ခံယူပိုင်ခွင့်ကို ကျန်းမာရေး ဝန်ထမ်းတွေ လေးစားရမယ်ဆိုတဲ့ အချက်ကို အတည်ပြုလိုက်တယ်။ ဒီအမှုအတွက် လိုက်ပါဆောင်ရွက်ပေးတဲ့ ရှေ့နေတွေအနက် တစ်ဦးက “ဖွဲ့စည်းပုံ အခြေခံဥပဒေဆိုင်ရာ ခုံရုံးက အရွယ်မရောက်သေးသူတွေရဲ့ အသက်ရေးနဲ့ဆိုင်တဲ့ အခြေခံ အခွင့်အရေးဟာ လူ့ဂုဏ်သိက္ခာနဲ့ ဆက်စပ်နေကြောင်း အသိအမှတ်ပြုတယ်။ ဒါကြောင့် အရွယ်မရောက်သေးသူတွေ ပျော်ရွှင်တဲ့ဘဝ ပိုင်ဆိုင်နိုင်ဖို့ဆိုရင် သူတို့ရဲ့ ဘာသာရေး ယုံကြည်ချက်ကို လေးစားရမယ်။ တရားသူကြီးတွေ၊ ဆရာဝန်တွေရဲ့ ယုံကြည်ချက်နဲ့ မကိုက်ညီရင်တောင် လေးစားရမယ်” လို့ ပြောတယ်။

ဖွဲ့စည်းပုံ အခြေခံဥပဒေဆိုင်ရာ ခုံရုံးရဲ့ ဆုံးဖြတ်ချက်ကို ကြားနာပြီးတဲ့နောက် ဒဲန်ယဲလာက “ယေဟောဝါရဲ့ နာမည် ထင်ရှားသွားလို့ ကျွန်မ သိပ်ပျော်တယ်။ စမ်းသပ်မှုတွေ ကြုံတဲ့အခါ ဘုရားကို ဘယ်လောက် ချစ်တယ်ဆိုတာ ပြနိုင်မယ့် အခွင့်အရေး ဖြစ်အောင် ယေဟောဝါ ပြောင်းလဲပေးနိုင်မှန်း ကိုယ်တွေ့ သိလိုက်ရတယ်” လို့ ပြောတယ်။

ဒဲန်ယဲလာ ကျန်းမာရေး ကောင်းနေပါတယ်။ ဆေးကုသမှု ဆက်လက်ခံယူနေပါတယ်။ ၂၀၂၁၊ သြဂုတ်မှာ ရှေ့ဆောင်သင်တန်း တက်ပါမယ်။ လူငယ်တွေ လုပ်ရပ်နဲ့ ယေဟောဝါဘုရားကို ဂုဏ်တင်နေတာ မြင်ရတဲ့အခါ ဘုရား ဝမ်းမြောက်နေမယ်ဆိုတာ ကျွန်တော်တို့ ယုံတယ်။—ဆာလံ ၁၄၈:၁၂၊ ၁၃။