၂၀၂၄ ခုနှစ်၊ ဇန်နဝါရီ ၁၃ ကနေ ဖေဖော်ဝါရီ ၁၁ ရက်အတွင်း အာဖရိကတိုက် တစ်ဝန်းက အားကစားသမားတွေဟာ ၃၄ ကြိမ်မြောက် အာဖရိကဖလား၊ နိုင်ငံတကာဘောလုံးပွဲမှာ ပါဝင်ခဲ့ကြတယ်။ ကို့ဒီဗွားမှာ ကျင်းပတာဖြစ်ပြီး ၂၄ နိုင်ငံက သောင်းနဲ့ချီတဲ့သူတွေ လာကြည့်ကြတယ်။ ယေဟောဝါသက်သေတွေက ဘောလုံးပွဲတွေကျင်းပတဲ့ မြို့ကြီး ငါးမြို့မှာ စာပေလက်တွန်းစင် ၁၂၀ ကျော်ထားပြီး ကျမ်းစာသတင်းစကား ဝေမျှခဲ့တယ်။

အဘီဂျန်မြို့မှာ လူငယ်တစ်ယောက်က လက်တွန်းစင်တစ်ခုနား လာပြီး သင်ချစ်ရသူတစ်ဦး ကွယ်လွန်သည့်အခါ စာပေကို စိတ်ဝင်စားကြောင်း ပြောတယ်။ မကြာသေးခင်က သူငယ်ချင်းတစ်ယောက် ဆုံးသွားတဲ့အကြောင်း သူပြောပြတော့ ညီအစ်ကိုတွေက ယောဟန် ၅:၂၈၊ ၂၉ မှာပါတဲ့ နှစ်သိမ့်မှုဖြစ်စေတဲ့ စကားတွေကို ဖတ်ပြတယ်။ သူအားတက်သွားပြီး ညီအစ်ကိုတွေကို သူ့အိမ်ကိုလာလည်ပတ်ဖို့ ဖိတ်ခေါ်ခဲ့တယ်။

အန်ရာမာမြို့က စာပေလက်တွန်းစင်နားကို ဒေသခံရဲတစ်ယောက် ရောက်လာတယ်။ ဖန်ဆင်းခြင်းနဲ့ သက်ရှိများရဲ့ မူလအစအကြောင်းပါတဲ့ ကျမ်းစာ စာပေကို ဖတ်ရတာ သဘောကျကြောင်း ပြောပြတယ်။ အလုပ်များတဲ့ကြားက ဖုန်းနံပါတ်ပေးပြီး သူ့ကို ပြန်ဆက်သွယ်ဖို့ ညီအစ်ကိုတွေကို တောင်းဆိုတယ်။

သက်လတ်ပိုင်းအရွယ် အမျိုးသားတစ်ယောက်ဟာ အဘီဂျန်မြို့က လက်တွန်းစင်နားကို ရောက်လာပြီး ငယ်ငယ်တုန်းက ယေဟောဝါသက်သေတွေနဲ့ ကျမ်းစာလေ့လာဖူးကြောင်း၊ အသင်းတော်နဲ့ အဆက်အသွယ် ပြတ်သွားတဲ့အကြောင်း ပြောပြတယ်။ နှစ်တွေတစ်လျှောက်မှာ ယေဟောဝါသက်သေတွေနဲ့ တခြားဘာသာတရားတွေ အတော်လေး ကွာခြားတာကို သူသတိထားမိတယ်။ နိုင်ငံရေး မငြိမ်မသက် ဖြစ်နေချိန်အတွင်း ယေဟောဝါသက်သေတွေ ကြားမှာရှိတဲ့ စည်းလုံးငြိမ်သက်မှုကို အထူးအထင်ကြီးလေးစားသွားတယ်။ ကျမ်းစာသင်အံမှုလုပ်ဖို့ သူတောင်းဆိုတဲ့အတွက် အခု ညီအစ်ကိုတွေနဲ့ ပုံမှန် ကျမ်းစာလေ့လာနေပါပြီ။

ကို့ဒီဗွားက ညီအစ်ကို/မတွေဟာ “ဘုရားသခင်ရဲ့ အံ့ဖွယ်အမှုတွေအကြောင်း” လူတွေကို ပြောပြနိုင်တဲ့ အထူးအခွင့်အရေးရခဲ့လို့ ကျွန်တော်တို့ ဝမ်းမြောက်ပါတယ်။—တ ၂:၁၁။