ကွန်ဂို ဒီမိုကရက်တစ် သမ္မတနိုင်ငံနဲ့ ကွန်ဂိုသမ္မတနိုင်ငံက ကျွန်တော်တို့ရဲ့ ညီအစ်ကို/မတွေဟာ ကိုရိုနာကပ်ဘေးကိုသာမက ရေဘေး၊ စစ်ဘေးတွေကိုပါ ရင်ဆိုင်နေရတယ်။ ဒီနှစ်နိုင်ငံရဲ့ ဟောပြောခြင်းလုပ်ငန်းကို ကြီးကြပ်ပေးနေတဲ့ ကွန်ဂို(ကင်ရှာဆာ)ဌာနခွဲရုံးက ညီအစ်ကို/မတွေကို လိုအပ်တဲ့ အကူအညီပေးဖို့၊ ကျမ်းစာနဲ့ နှစ်သိမ့်အားပေးဖို့ စီစဉ်ခဲ့တယ်။ ညီအစ်ကို/မတွေကို လိုအပ်သလို ကူညီပေးနိုင်ဖို့ ဌာနခွဲရုံးနယ်မြေအတွင်း သဘာဝဘေး ကယ်ဆယ်ရေးကော်မတီ (DRCs) ၅၇ ခုကို ဖွဲ့စည်းလိုက်တယ်။ အခုဆိုရင် ညီအစ်ကို/မ ကိုးသောင်းကျော်ကို စားနပ်ရိက္ခာတွေ ထောက်ပံ့ပြီးပါပြီ။

၂၀၂၀၊ ဧပြီ ၁၆-၁၇ အတွင်း မိုးသည်းထန်စွာ ရွာသွန်းလို့ ကွန်ဂို ဒီမိုကရက်တစ် သမ္မတနိုင်ငံ အရှေ့ပိုင်းပြည်နယ်တွေမှာ ရေကြီးရေလျှံခဲ့တယ်။ ဒါကြောင့် ကြေညာသူ ၁၃၉ ဦး မိမိတို့နေအိမ်တွေကနေ ရွှေ့ပြောင်းပြီး ညီအစ်ကို/မတွေအိမ်မှာ တည်းခိုကြရတယ်။ ဒီဒေသက DRCs တွေက ဘေးသင့်ညီအစ်ကို/မတွေ ယာယီနေဖို့ အိမ်တွေ၊ အမြဲတမ်းနေဖို့ အိမ်တွေ စီစဉ်ပေးနေပါတယ်။

ညီအစ်ကို/မတွေကလည်း DRCs ရဲ့ ကယ်ဆယ်ရေးလုပ်ငန်းတွေကို ရက်ရက်ရောရော ကူညီပေးကြတယ်။ ဒေသတစ်ခုမှာဆိုရင် ငှက်ပျောသီး ၇၀၀ ကီလိုဂရမ်၊ ပြောင်းဖူး ၄၀၀ ကီလိုဂရမ်၊ ပီလောပီနံနဲ့ ပီလောပီနံအရွက် ၂၂၀ ကီလိုဂရမ် စုပြီးပေးကြတယ်။

အသင်းတော်တစ်ခုက ကြေညာသူ ၆၀ ဟာ အိုးပစ်အိမ်ပစ် ထွက်ပြေးလာတဲ့ စစ်ဘေးရှောင် ညီအစ်ကို/မ ၅၀ ကို မိမိတို့နေအိမ်မှာ လက်ခံထားကြတယ်။ DRCs က စားနပ်ရိက္ခာတွေ မရောက်လာခင် ရှိတာလေးကို ဝေမျှစားသောက်ကြတယ်။

ကွန်ဂိုသမ္မတနိုင်ငံရဲ့မြို့တော် ဘရာဇီဗီးလ်က အိမ်ထောင်ဦးစီးတစ်ယောက် သူ့အတွေ့အကြုံကို ဒီလိုပြောပြတယ်- “မျက်စိတစ်မှိတ်အတွင်း ဘဝအခြေအနေ ပြောင်းသွားနိုင်တယ်။ ကျွန်တော့်အလုပ်၊ ဇနီးရဲ့ အချိန်ပိုင်းအလုပ် နှစ်ယောက်ပေါင်း လစာနဲ့ စားဝတ်နေရေး ဖူလုံရုံလေးပါပဲ။ ကိုဗစ်လည်းဖြစ်ရော ဘာဝင်ငွေမှ မရှိတော့ဘူး။ ဒါပေမဲ့ ယေဟောဝါကိုပဲ ဆက်ယုံကြည်အားကိုးကြတယ်။ ရှိတဲ့ရိက္ခာလေး ကုန်သွားရင် ဘာဆက်လုပ်ကြမလဲဆိုတာ တိုင်ပင်နေတုန်းမှာပဲ ယေဟောဝါဆီက အကူအညီ ရောက်လာတယ်။”

ကင်ရှာဆာမြို့က မုဆိုးမ ညီအစ်မဘူယီ အက်သာ ဒီလိုပြောတယ်- “ပြီးခဲ့တဲ့လမှာ ကျွန်မခင်ပွန်း ဆုံးပါးသွားတော့ ကလေးသုံးယောက်နဲ့ မလုပ်တတ်မကိုင်တတ် ဖြစ်ကျန်ခဲ့တယ်။ ကျွန်မတို့အိမ်မှာ စားစရာတွေ အခုလို အများကြီး တစ်ခါမှ မရှိခဲ့ဖူးဘူး။ ရက်အတော်ကြာကြာ စားဖို့ ဖူလုံနေပြီ။ ကျေးဇူးတင်ပါတယ်။ ယေဟောဝါ။”

ကယ်ဆယ်ရေးလုပ်ငန်းတွေကို ကောင်းချီးပေးဖို့၊ ညီအစ်ကို/မတွေကို ဆက်ပြီး စောင့်ရှောက်ကူညီပေးဖို့ ယေဟောဝါဆီ ကျွန်တော်တို့ဆုတောင်းပါတယ်။ မြေပေါ်မှာ သီးနှံတွေ ဖောဖောသီသီ စားသောက်နိုင်မယ့် အချိန်ကို ကျွန်တော်တို့ စောင့်မျှော်နေပါတယ်။—ဆာလံ ၇၂:၁၆။