ဒီနှစ် ၂၀၂၂ ခုနှစ်မှာ ဂျပန်ဌာနခွဲရဲ့ ပုံနှိပ်လုပ်ငန်း အနှစ် ၅၀ ပြည့်ခဲ့ပါပြီ။

၁၉၅၀ နဲ့ ၁၉၇၀ အတွင်းမှာ ဂျပန်နိုင်ငံက ညီအစ်ကို၊ ညီအစ်မတွေဟာ သာသနာပြု အယောက် ၇၀ ရဲ့အကူအညီနဲ့ ဟောပြောခြင်းလုပ်ငန်းကို ထက်ထက်သန်သန် လုပ်ဆောင်ခဲ့ကြလို့ ကြေညာသူအရေအတွက် တစ်ဟုန်ထိုး မြင့်တက်လာတယ်။ ဂျပန်စကားနဲ့ ကျမ်းစာအခြေပြုစာပေတွေ ပိုလိုအပ်လာလို့ ကင်းမျှော်စင်နဲ့ နိုးလော့! မဂ္ဂဇင်းတွေကို ဂျပန်ဌာနခွဲမှာ စတင်ပုံနှိပ်ဖို့ ဆုံးဖြတ်ခဲ့တယ်။

၁၉၆၉ ခုနှစ်၊ အောက်တိုဘာလ၊ တိုကျိုမှာ ကျင်းပတဲ့ “မြေကြီးပေါ် ငြိမ်သက်ခြင်း” အပြည်ပြည်ဆိုင်ရာ အစည်းအဝေးအတွင်း ညီအစ်ကို နေသန် အိပ်ချ် နောရ်က ဖူဂျီတောင်ခြေနားက နူးမာဇူးမြို့မှာ ပုံနှိပ်စက်ပါတဲ့ ဌာနခွဲအသစ် ဆောက်လုပ်မယ်လို့ ကြေညာခဲ့တယ်။

၁၉၇၂ ခုနှစ်၊ ဇန်နဝါရီလမှာ ဆောက်လုပ်ရေး စတင်တယ်။ ၁၉၇၂ ခုနှစ်၊ ဩဂုတ် ၁၅ ရက်မှာ အလုပ်သမားတွေက ပုံနှိပ်စက်ကြီးနဲ့ တခြားလိုအပ်တဲ့ကိရိယာတွေကို တပ်ဆင်ကြတယ်။ ၁၉၇၂ ခုနှစ်၊ အောက်တိုဘာ ၈ ရက်မှာ ဂျပန်စကားနဲ့ နိုးလော့!မဂ္ဂဇင်းကို စတင်ပုံနှိပ်တယ်။ အဲဒီတုန်းက ပုံနှိပ်စက်ကိုင်ခဲ့တဲ့ ညီအစ်ကိုတစ်ယောက် အခုလို သတိတရ ပြောပြတယ်– “တင်ပို့ဖို့ အဆင်သင့်ဖြစ်နေတဲ့ ပုံနှိပ်ပြီးခါစ မဂ္ဂဇင်းပုံးတွေကိုကြည့်ပြီး ဝမ်းသာလွန်းလို့ မျက်ရည်တောင် လည်မိတယ်။”

၁၉၈၂ ခုနှစ်မှာ ဌာနခွဲကို အဲဘီနာမြို့ကို ပြောင်းရွှေ့ဖွင့်လှစ်တယ်။ ဆောက်လုပ်ပြီးခါစ အဲဒီဌာနခွဲအသစ်က နူးမာဇူးမြို့က ဌာနခွဲထက် သုံးဆကြီးပြီး ပိုမြန်တဲ့ ပုံနှိပ်၊ ချုပ်လုပ်စက်အသစ်တွေကို အသုံးပြုထားတယ်။ ကင်းမျှော်စင်နဲ့ နိုးလော့! မဂ္ဂဇင်းတွေအပြင် ကမ္ဘာသစ်ဘာသာပြန်ကျမ်းကိုလည်း စတင်ပုံနှိပ်တယ်။ ကျမ်းစာအခြေပြုစာပေတွေကို ဘာသာစကား ၂၀၀ ကျော်နဲ့လည်း စတင်ပုံနှိပ်ခဲ့တယ်။

အခုဆိုရင် ဂျပန်ဌာနခွဲ ပုံနှိပ်စက်က ကင်းမျှော်စင်နဲ့ နိုးလော့! မဂ္ဂဇင်း ၁၃.၂ သန်းကို လစဉ် ပုံနှိပ်ပေးနေပါတယ်။ ၂၀၁၃ ခုနှစ်ကစလို့ ကျမ်းစာအုပ်ရေ သန်း ၂၀ ကျော်ကို ဘာသာစကား ၁၀၀ ကျော်နဲ့ ပုံနှိပ်ပြီး ကမ္ဘာတစ်ဝန်း နိုင်ငံပေါင်း ၅၀ ကျော်ကို တင်ပို့ပေးခဲ့တယ်။

၁၉၇၂ ခုနှစ်တုန်းက ဂျပန်မှာ ကြေညာသူ ၁၃,၀၀၀ လောက်ပဲ ရှိတယ်။ အနှစ် ၅၀ ကြာပြီးနောက် ၂၀၂၂ ခုနှစ်မှာတော့ ကြေညာသူပေါင်း ၂၁၃,၀၀၀ ကျော်ရှိနေပြီ။ ဒီပုံနှိပ်လုပ်ငန်းက ဂျပန်နိုင်ငံနဲ့ ကမ္ဘာတစ်ဝန်းက နိုင်ငံတော်ဟောပြောခြင်းလုပ်ငန်းကို ထောက်မပေးနေတာကို မြင်ရတာ ဝမ်းသာစရာပါပဲ။—မဿဲ ၂၈:၁၉၊ ၂၀။