အဲ​ဘီ​နာ၊ ဂျပန်​—၂၀၁၆၊ ဧပြီ ၁၄ နဲ့ ၁၆ ရက်မှာ ဂျပန်​နိုင်ငံ၊ ကူ​မာ​မို​တို​မှာ လှုပ်​ခဲ့​တဲ့ ငလျင်​ကြောင့် ထိခိုက်​ပျက်စီး​သွားတဲ့ ယုံကြည်သူချင်းတွေရဲ့ အိမ်ပေါင်း ၃၄၈ လုံး​ကို ဂျပန်​က ယေဟောဝါသက်သေတွေ ပြုပြင်​ဆောက်လုပ်ပြီး​ခဲ့​ပြီ။ ၂၀၁၆၊ ဇူလိုင်​လ​ကနေ ၂၀၁၇၊ မတ်လ​အထိ ကြာ​တဲ့ ဒီ​ကယ်ဆယ်ရေး​နဲ့ ဆောက်လုပ်ရေး လုပ်ငန်းမှာ စေတနာ့​ဝန်ထမ်း ၁၅,၀၀၀ ကျော်​ပါဝင်ခဲ့တယ်။

ဒီ​ငလျင်​ကြောင့် သက်သေခံ​တစ်ယောက်မှ သေဆုံး​တာ ​မရှိပေမဲ့ ၁၁၉ ယောက်​ကတော့ သူတို့ရဲ့​ နေအိမ်​တွေကို စွန့်ခွာ​ခဲ့​ရတယ်။ အိမ်တွေကို စေတနာ့​ဝန်ထမ်း​တွေ​ ရှင်းလင်း​ပေးနေ​တုန်း သူတို့ကို ယေဟောဝါသက်သေတွေရဲ့ ဝတ်ပြုရာ​နေရာဖြစ်တဲ့ နိုင်ငံတော်​ခန်းမ ၁၅ လုံး​မှာ တည်းခို​စေခဲ့တယ်။

၂၀၁၆၊ ဇူလိုင် ၂၅ က​စပြီး သက်သေခံ ဆောက်လုပ်ရေး​လုပ်သားတွေ​ဟာ ငလျင်ဒဏ်ခံရတဲ့ အိမ်တွေ​က အက်​ရာတွေ၊ ကြမ်းခင်း​တွေ၊ အတွင်း​နံရံ၊ အမိုး​နဲ့ ရေပိုက်​လိုင်း​တွေကို ပြုပြင်ပေး​ခဲ့​ကြတယ်။ တံခါးတွေ၊ ပြတင်းပေါက်​တွေ​နဲ့ လေ​အေး​ပေး​စက်​တွေကို​လည်း လဲလှယ်​တပ်ဆင်ပေးခဲ့​ကြတယ်။

ဂျပန် ကာကွယ်ရေး​တပ်ဖွဲ့​ရဲ့ အငြိမ်းစား​ အရာရှိ​တစ်ဦး​ဖြစ်သူ မစ္စတာ မီ​နို​ရူ ကို​နို ဟာ ယေဟောဝါသက်သေတွေရဲ့ ကယ်ဆယ်ရေး​လုပ်ငန်းကို တွေ့​ပြီး ဒီလို​ပြောတယ်- “ကျွန်တော့်​အလုပ်မှာ အရေးကြီးဆုံး​က အသက်ကယ်​ဖို့ အမြန်ဆုံး​ လုပ်​ရတာပဲ။ ယေဟောဝါ​သက်သေတွေဟာ ကူ​မာ​မို​တို​ငလျင်​ပြီးနောက် အဲဒီလို လုပ်ခဲ့ကြတယ်၊ ဘေးသင့်​တဲ့ နေရာ​က ငလျင်ဒဏ်​ခံရသူတွေကို ချက်ချင်း ကူညီပေး​ကြတယ်။ ကယ်ဆယ်ရေး​နဲ့ ဆောက်လုပ်ရေး လုပ်ငန်းကို သက်သေခံတွေ စ​လုပ်ကြ​တော့​လည်း ဂျပန်​နိုင်ငံတစ်ဝန်းလုံး​ကနေ ဆောက်လုပ်ရေး ကျွမ်းကျင်သူတွေ ရောက်​လာတာ တွေ့လို့ ကျွန်တော် အံ့သြ​သွားတယ်။ သက်သေခံ စေတနာ့​ဝန်ထမ်း​တွေ​က တကယ့်ကို အားကြိုးမာန်တက် အလုပ်​လုပ်တဲ့​သူတွေ​ပဲ။”

ဂျပန်​နိုင်ငံက ယေဟောဝါသက်သေတွေရဲ့ ပြောရေးဆိုခွင့်​ရှိသူ အိ​ချီ​ကီ မာ​စု​နာ​ဂါ က “လွန်ခဲ့တဲ့ လအနည်းငယ်​အတွင်းမှာ ထောင်နဲ့​ချီတဲ့ ငလျင်​ဘေးသင့်​သူတွေနဲ့​အတူ ကျွန်တော်တို့ ပြန်လည်​တည်ဆောက်ရေး​လုပ်ငန်း​တွေ လုပ်​နေပါတယ်။ ဒီ​သဘာဝဘေး ကြုံရပြီး​နောက် ယုံကြည်သူချင်းတွေ​ပေးတဲ့ လက်တွေ့ကျ အကူအညီ​တွေဟာ ကျွန်တော်တို့ကို တန်ဖိုးမဖြတ်​နိုင်တဲ့ နှစ်သိမ့်မှုနဲ့ ခွန်အား ရရှိစေ​ပါတယ်။”

သတင်း​အချက်အလက် ဆက်သွယ်​ရန်-

နိုင်ငံတကာ- David A. Semonian, Office of Public Information, +1-845-524-3000

ဂျပန်- Ichiki Matsunaga, +81-46-233-0005