အောက်တိုဘာ ၁၀၊ ၂၀၁၇
ဂျာမနီ
ဂျာမနီက ယေဟောဝါသက်သေတွေကို အမြင့်ဆုံး ဥပဒေအဆင့် တရားဝင် အသိအမှတ်ပြု
၂၆ နှစ်ကျော် တရားရင်ဆိုင်ရပြီးနောက် ဂျာမနီနိုင်ငံက ယေဟောဝါသက်သေတွေဟာ ပြည်တွင်းက ဘာသာကြီးတွေလိုပဲ တရားဝင် အသိအမှတ်ပြုခံရပါတယ်။ ၂၀၁၇၊ ဇန်နဝါရီလမှာ မြောက်ပိုင်း ရိုင်း-ဝက်စ်ဖာလီယားပြည်နယ်ဟာ ဂျာမန်ပြည်နယ် ၁၆ ခုထဲမှာ ယေဟောဝါသက်သေတွေကို ပြည်သူ့ ဥပဒေအဆင့် (ပြည်နယ်) အသိအမှတ်ပြုတဲ့ နောက်ဆုံးပြည်နယ် ဖြစ်တယ်။ ဂျာမနီမှာ ယေဟောဝါသက်သေတွေ ရှိနေတာ အနှစ် ၁၀၀ ကျော်ပြီ ဖြစ်တဲ့အပြင် သက်သေခံတွေရဲ့ ပြည်တွင်းဌာနချုပ်၊ ထောင်နဲ့ချီတဲ့ အသင်းတော်တွေ ရှိနေပေမဲ့လည်း ဆုံးဖြတ်ချက်က သက်သေခံတွေအတွက် အရေးပါတယ်။ အခု ယေဟောဝါသက်သေတွေဟာ ဂျာမန်ပြည်နယ်အားလုံးမှာ အသိအမှတ်ပြုခံရပြီမို့ (နိုင်ငံတော်) ဘာသာရေး အဖွဲ့အစည်းတစ်ခုအဖြစ် သတ်မှတ်ခံရပြီး အဲဒီကနေ အကျိုးကျေးဇူးတွေ ခံစားရပါတော့မယ်။
ပြည်နယ်အသိအမှတ်ပြုခံရဖို့ အချိန်အတော်ကြာ ကြိုးစားခဲ့ရ
၁၉၂၁ ခုနှစ်မှာ၊ ဂျာမနီနိုင်ငံ ဥပဒေအရ ယေဟောဝါသက်သေတွေ ပထမဆုံး မှတ်ပုံတင်ခဲ့တယ်။ ဂျာမနီ ပြန်လည်ပေါင်းစည်းတဲ့ ၁၉၉၀ ပြည့်နှစ်နောက်ပိုင်းမှာ ပြည်နယ်မှာ အသိအမှတ်ပြုခံရမှသာ ဘာသာရေး အဖွဲ့အစည်းတွေ အကျိုးရရှိမှာ ဖြစ်တဲ့အတွက် ယေဟောဝါသက်သေတွေလည်း အသိအမှတ်ပြုခံရဖို့ လျှောက်ခဲ့ကြတယ်။
ဘာသာရေးအသင်းအဖွဲ့တစ်ခု ပြည်သူ့ဥပဒေ ကော်ပိုရေးရှင်းအဖြစ် နိုင်ငံအတွင်းမှာ မှတ်ပုံတင်နိုင်ဖို့ အရင်ဆုံး ကိုယ့်ပြည်နယ်မှာ အသိအမှတ်ပြုခံရအောင် လုပ်ဆောင်ဖို့ ဥပဒေက တောင်းဆိုထားတယ်။ ဒါကြောင့် ဂျာမန်ပြည်နယ် ၁၅ ခုမှာ လျှောက်လွှာ တင်ကြရပါမယ်။ ၁၉၉၀ ပြည့်နှစ်မှာ ဂျာမနီနိုင်ငံက ယေဟောဝါသက်သေများ အသင်းအဖွဲ့ဟာ ဥပဒေပြုတောင်းဆိုတဲ့ ဘာလင်ပြည်နယ်မှာ ပထမဆုံး လျှောက်ထားကြတယ်။ တခြားဘာသာရေး အသင်းအဖွဲ့အများစုက တစ်နှစ်၊ နှစ်နှစ်အတွင်း ပြည်နယ်အသိအမှတ်ပြုခံရပေမဲ့ ဘာလင်အစိုးရက ယေဟောဝါသက်သေတွေကိုတော့ နှစ်ပေါင်းများစွာ မပေးဘဲ ငြင်းဆိုခဲ့ကြတယ်။ အစိုးရရဲ့ အကြောင်းပြချက်တစ်ခုက ယေဟောဝါသက်သေတွေ မဲမထည့်တဲ့အတွက်လို့ ဆိုပါတယ်။ ဒါပေမဲ့ အဲဒီအကြောင်းပြချက်က ယုတ္တိမရှိဘူး။ အကြောင်းကတော့ ဥပဒေမှာ ဂျာမန်ပြည်သူတွေ မဖြစ်မနေ မဲထည့်ရမယ်လို့ မတောင်းဆိုထားဘဲ ကိုယ့်စိတ်ဆန္ဒအရသာ မဲထည့်ဖို့ တောင်းဆိုထားလို့ပါပဲ။
နောက်ဆုံး၊ ဒီကိစ္စ တရားရုံး ရောက်လာတယ်။ ၂၀၀၅၊ မတ် ၂၄ ရက်မှာ ဘာလင် အထက်တရားရုံးက ဂျာမနီမှာရှိတဲ့ ယေဟောဝါသက်သေတွေကို “ပြည်သူ့ ဥပဒေအသိအမှတ်ပြု ကော်ပိုရေးရှင်း” တစ်ခုအဖြစ် အသိအမှတ်ပြုဖို့ စီရင်ချက်ချခဲ့တယ်။ တစ်နှစ်ကြာပြီးနောက် ဘာလင်ပြည်နယ်က တင်းမာမှု လျော့နည်းလာပြီး ယေဟောဝါသက်သေတွေကို ပြည်သူ့ ဥပဒေအဆင့် ပေးခဲ့တဲ့အတွက် ဘာလင်အစိုးရနဲ့ ၁၆ နှစ်ကြာ တရားရင်ဆိုင်မှု အဆုံးတိုင်သွားပါတယ်။
အဲဒီနောက် ယေဟောဝါသက်သေတွေဟာ ကျန်ရှိတဲ့ ဂျာမန်ပြည်နယ် ၁၅ ခုမှာ ပြည်နယ် အသိအမှတ်ပြုခံရဖို့ လျှောက်ထားခဲ့ကြတယ်။ ၂၀၀၉ ခုနှစ်မှာ ပြည်နယ် ၁၁ ခု၊ နောက်နှစ်တွေမှာ ပြည်နယ် ၃ ခုမှာ အသိအမှတ်ပြုပေးခဲ့ပေမဲ့ နောက်ဆုံးအနေနဲ့ မြောက်ပိုင်း ရိုင်း-ဝက်စ်ဖာလီယားပြည်နယ်မှာတော့ ၂၀၁၇၊ ဇန်နဝါရီ ၂၇ ကျမှ ယေဟောဝါသက်သေတွေကို အသိအမှတ်ပြုပေးခဲ့တယ်။ ဂျာမနီမှာရှိတဲ့ တခြား ဘာသာရေး အဖွဲ့အစည်းတွေ ရသလို ယေဟောဝါသက်သေတွေလည်း ပြည်နယ် အသိအမှတ်ပြုခံရအောင် မဆုတ်မနစ် ကြိုးစားခဲ့တဲ့အတွက် ၂၆ နှစ်ကြာ တရားရေးရင်ဆိုင်မှု အဆုံးတိုင်သွားပါတယ်။
နိုင်ငံတော် အသိအမှတ်ပြုခံရခြင်းရဲ့ အကျိုးကျေးဇူးများ
အခု ဂျာမနီမှာရှိတဲ့ ယေဟောဝါသက်သေတွေရဲ့ ပြည်တွင်းဌာနချုပ်နဲ့ အသင်းတော် ၂,၀၀၀ ကျော်ဟာ အသင်းအဖွဲ့တစ်ခုအနေနဲ့ လုပ်ကိုင်ဆောင်ရွက်နိုင်ပါပြီ။ အရင်တုန်းက အသင်းတော်တစ်ခုကို သီးခြားဘာသာရေး အဖွဲ့တစ်ခုလို့ ရှုမြင်ကြတယ်။ ဒါကြောင့် အသင်းတော်တစ်ခုအနေနဲ့ ပြည်နယ်ဥပဒေအောက်မှာ ရှိပြီး နှစ်စဉ်မှတ်တမ်း ပို့ခဲ့ရတယ်၊ အခွန်ဆောင်ခဲ့ရတယ်။ အသင်းတော်မှာ အကြီးအကဲ ပြောင်းလဲတာ၊ မြေယာအဆောက်အအုံ ဝယ်ယူတာ၊ အသင်းတော် နာမည်သစ် ပေးတာ၊ အသင်းတော် ပေါင်းတာတွေကို အစိုးရဆီ အစီရင်ခံစာ တင်ခဲ့ရတယ်။ အရင်တုန်းက အကြီးအကဲတွေဟာ အဲဒီလိုကိစ္စတွေ ဆောင်ရွက်ဖို့ အားအင်တွေ၊ အချိန်တွေ အများကြီး သုံးခဲ့ရပေမဲ့ အခုတော့ အသင်းတော်တွေကို ပိုပြီး ကြည့်ရှုစောင့်ရှောက် ပေးနိုင်ကြပြီ။ ပြည်နယ်အသိအမှတ်ပြုခြင်း မခံရခင်တုန်းက အစီရင်ခံစာ တင်တဲ့အလုပ် အဆင့်ဆင့်အတွက် အသင်းတော်တွေအနေနဲ့ ကုန်ကျစရိတ်တွေလည်း ပေးခဲ့ရတယ်။ အသင်းတော်တစ်ခုက သက်တမ်းကြာ အကြီးအကဲတစ်ယောက်က ဒီလိုပြောပါတယ်– “အခုတော့ အသင်းတော် အမှုဆောင်လုပ်ငန်းကို ထောက်ပံ့ပေးဖို့ အလှူငွေတွေကို လွတ်လွတ်လပ်လပ် သုံးနိုင်ပြီ။”
နိုင်ငံတော် အသိအမှတ်ပြုတဲ့ အဆင့်ကို မရခင်တုန်းက ဂျာမနီနိုင်ငံမှာ သက်သေခံ ၂၇၄,၀၀၀ နီးပါးနဲ့ သူတို့ရဲ့ အပေါင်းပါတွေဟာ အစည်းအဝေးတွေကို တက်ရောက်နေကြတာတောင် ယေဟောဝါသက်သေတွေကို ဘာသာရေး အသင်းအဖွဲ့တစ်ခုအဖြစ် မသတ်မှတ်ခဲ့ကြဘူး။ ယေဟောဝါသက်သေတွေရဲ့ ပြည်တွင်းဌာနချုပ်က ရှေ့နေ အာမင် ပီကယ် ဒီလိုပြောတယ်– “ပြည်သူ့ဥပဒေအရ ကော်ပိုရေးရှင်းတစ်ခုအနေနဲ့ အသိအမှတ်ပြုခံရဖို့ ၂၆ နှစ်ကျော်ကြာ တရားရုံးတက် ကြိုးစားနေချိန်အတွင်းမှာ မီဒီယာတွေက ကျွန်တော်တို့ ဘာသာနဲ့ပတ်သက်ပြီး အပတ်တိုင်းလိုလို မဟုတ်မမှန် သတင်းတွေ၊ ရှုတ်ချတဲ့ သတင်းတွေ ထုတ်လွှင့်ခဲ့ကြတယ်။ အခုတော့ မဟုတ်မမှန် သတင်းတွေ၊ ရှုတ်ချတဲ့ သတင်းတွေ နည်းသွားပါပြီ။” သက်တမ်းကြာ သက်သေခံ ဗာနာ ရုကီ ဒီလိုပြောတယ်– “ပြည်သူ့ ဥပဒေ ကော်ပိုရေးရှင်းအဆင့် ရချင်တဲ့ ဘာသာရေး အသင်းအဖွဲ့တစ်ခုဟာ နည်းလမ်းတိုင်းမှာ တရားဥပဒေနဲ့အညီ ဖြစ်ရတဲ့အတွက် သက်သေခံတွေကို မတရား မမှန်မကန် စွပ်စွဲချက်တွေ ပြန်ချေပနိုင်ပြီ။” အရင်တုန်းက ကျောင်းတက်တဲ့ ကလေးတွေ ကြုံရတဲ့ စိန်ခေါ်ချက်တွေနဲ့ပတ်သက်ပြီး သက်သေခံ ပက်ထရာက ဒီလိုပြောတယ်– “ဒီလို အသိအမှတ်ပြုခံရတာ ကျောင်းတက်နေတဲ့ ကလေးတွေအတွက် တကယ် အကျိုးပြုတယ်။ သက်သေခံတွေဟာ ဘာသာရေးအသင်းအဖွဲ့ မဟုတ်ဘူး၊ “ဂိုဏ်း” တစ်ခုပဲလို့ မဟုတ်မမှန် စွပ်စွဲချက်တွေကြောင့် ဆရာ/မတွေက သက်သေခံကလေးတွေကို ခွဲခြားဆက်ဆံခဲ့ကြတယ်။”
ဂျာမနီအစိုးရက ယေဟောဝါသက်သေတွေရဲ့ ဘာသာရေး လုပ်ဆောင်မှုတွေကို နိုင်ငံတော် အသိအမှတ်ပြုဘာသာအဖြစ် သတ်မှတ်ပေးခဲ့လို့ ယေဟောဝါသက်သေတွေ ကျေးဇူးတင်ကြပါတယ်။ ဒီလို အသိအမှတ်ပြုပေးလို့ အရင်တုန်းက ရင်ဆိုင်ခဲ့ရတဲ့ စိန်ခေါ်ချက်တချို့ကို လျော့ပါးသက်သာစေပြီး တစ်ဦးချင်းစီအနေနဲ့ရော၊ ဘာသာရေးအသင်းအဖွဲ့အနေနဲ့ပါ အကျိုးရရှိကြမယ်လို့ သက်သေခံတွေ မျှော်လင့်ကြပါတယ်။