ဂွါတီမာလာက အာဏာပိုင်တွေဟာ မီးသတ်ဌာန၊ ရဲဌာနတွေမှာ ကျမ်းစာအခြေပြု ဆွေးနွေးပွဲတွေ လုပ်ပေးဖို့ ၂၀၁၉၊ မေလမှာ ညီအစ်ကိုတွေကို ခွင့်ပြုချက်ပေးခဲ့တယ်။ အခုလောလောဆယ်အထိ ကိုအက်တီပက်ကီ၊ ကိုလံဘာ ကော်စတာ ကူးကာ၊ မာလာကက်တန်၊ စန် ရာဖေး ပက်ဇယ်မြို့တွေမှာ ကျင်းပတဲ့ ဆွေးနွေးပွဲတွေကို မီးသတ်ဌာန၊ ရဲဌာနက အရာရှိ ၄၅၀ တက်ရောက်ခဲ့ကြပါတယ်။

ဆွေးနွေးပွဲမှာပါတဲ့ အကြီးအကဲ ဟွမ် ကားလို့စ် ရိုဒါ ဒီလို ရှင်းပြတယ်– “လွန်ခဲ့တဲ့ ၁၅ နှစ်လုံးလုံး ယေဟောဝါသက်သေတွေဟာ ဂွါတီမာလာက အကျဉ်းထောင် သုံးခုမှာ ထောင်သားတွေအတွက် ကျမ်းစာဆွေးနွေးပွဲတွေ လုပ်ပေးခဲ့တယ်။ ကျွန်တော်တို့နဲ့ ကျမ်းစာလေ့လာတဲ့ ထောင်သားတွေရဲ့ အကျင့်စရိုက်တွေ သိသိသာသာ ပြောင်းလဲလာတာကို ထောင်အရာရှိတွေ တွေ့ရှိကြတယ်။ ဒါကြောင့် ရဲစခန်းတွေနဲ့ မီးသတ်ဌာနတွေမှာလည်း ကျမ်းစာအခြေပြု ဆွေးနွေးပွဲတွေ လုပ်ပေးဖို့ သူတို့ ထောက်ခံပေးကြတယ်။”

ဗဟိုအမေရိက ဌာနခွဲရုံးရဲ့ ညွှန်ကြားချက်နဲ့ တစ်ပတ်နှစ်ကြိမ်၊ ၁၅ မိနစ်ကြာတဲ့ ဆွေးနွေးပွဲတွေ ကျင်းပပေးခဲ့တယ်။ တခြားသူတွေနဲ့ ဆက်ဆံရေးကောင်းရှိဖို့၊ အခွင့်အာဏာကို သင့်တော်စွာ သုံးဖို့၊ အဖွဲ့လိုက် လုပ်ဆောင်တတ်ဖို့ စတဲ့ အကြောင်းအရာတွေ ဆွေးနွေးကြတယ်။ ညီအစ်ကိုတွေက ဆွေးနွေးခဲ့တဲ့အရာနဲ့ ကိုက်ညီတဲ့ စာပေတွေ ဝေငှတယ်။ ကျွန်တော်တို့ ဝက်ဘ်ဆိုက်ထဲက ဗီဒီယိုတွေ ပြတယ်။ JW Library app မှာပါတဲ့ အထောက်အကူပြု အချက်အလက် ရှာဖွေနိုင်ပုံတွေကို ပြပေးကြတယ်။

ရဲဌာန၊ မီးသတ်ဌာနမှာ ဒီလို ဆွေးနွေးပွဲတွေ လုပ်ပေးရတာကို အခွင့်ထူးအဖြစ် ယေဟောဝါသက်သေတွေ ယူမှတ်ကြပါတယ်။ ကျမ်းစာမှာပါတဲ့ လက်တွေ့ကျ အကြံဉာဏ်တွေကနေ ဆက် အကျိုးရရှိကြမယ်လို့ မျှော်လင့်ပါတယ်။—၂ တိမောသေ ၃:၁၆။