မကြာသေးခင်က စပိန်ဌာနခွဲမှာ ရုံးခန်းအဆောက်အအုံတစ်ခု ပြုပြင်မွမ်းမံတာ ပြီးစီးသွားပါတယ်။ အဆောက်အအုံကို ဘာသာပြန်ဌာနအတွက် အဓိက အသုံးပြုပါမယ်။ ရုံးခန်းအဆောက်အအုံကို ပြုပြင်မွမ်းမံတာက ဌာနခွဲပြုပြင်မွမ်းမံခြင်းရဲ့ တစ်စိတ်တစ်ပိုင်းဖြစ်ပြီး ၂၀၂၅ ခုနှစ်မှာ အားလုံးပြီးစီးပါမယ်။

အဆောက်အအုံထဲမှာ ဘာသာပြန်လုပ်ငန်းအတွက် စာအုပ် ၄,၀၀၀ ထားရှိနိုင်တဲ့ စာကြည့်တိုက်တစ်ခု ပါရှိတယ်။ အီလက်ထရောနစ်စာပေအသွင်နဲ့ မရနိုင်တဲ့ စာအုပ်တွေကို စာကြည့်တိုက်မှာ ထားရှိပါတယ်။

ဌာနခွဲကော်မတီဝင် ညီအစ်ကို ဂျွန် ဘာစနယ် ဒီလိုပြောတယ်– “စပိန်ဌာနခွဲက အလုပ်တွေဟာ လွန်ခဲ့တဲ့ ၂၅ နှစ်အတွင်း အတော်လေး ပြောင်းလဲသွားတယ်။ ဌာနခွဲဟာ အရင်တုန်းကလို ပုံနှိပ်တာ၊ စာပေသိုလှောင်တာတွေ အဓိကမလုပ်တော့ဘဲ ဥရောပဘာသာစကားများစွာနဲ့ မျက်မမြင်စာပေတွေအပြင် စပိန်ဘာသာစကား၊ စပိန်လက်သင်္ကေတပြစကားနဲ့ ဘာသာပြန်ပေးနေတယ်။ ဒါကြောင့် ရုံးခန်းတွေရှိဖို့ လိုအပ်နေတာ။ ဒီပြုပြင်မွမ်းမံရေး လုပ်ငန်းစဉ်ကြောင့် ကမ္ဘာတစ်ဝန်းက ညီအစ်ကို၊ ညီအစ်မတွေ အကျိုးများစွာ ရရှိမယ်ဆိုတာ သေချာပါတယ်။”

လူနေအဆောက်အအုံ လေးလုံးကို ပြုပြင်မွမ်းမံခြင်း စတင်နေပါပြီ။ ဆောက်လုပ်ရေးမှာ စေတနာ့ဝန်ထမ်း အယောက် ၂၀၀ နီးပါး လုပ်အားပေးပါလိမ့်တယ်။ ဌာနခွဲခြံဝင်းထဲမှာ စေတနာ့ဝန်ထမ်းတွေနေဖို့ ရွှေ့ပြောင်းရလွယ်တဲ့ နေအိမ်အလုံး ၇၀ ကို နေရာချထားပါတယ်။

စပိန်မှာ ဆက်လက်တိုးတက်နေပါတယ်။ လက်ရှိမှာ ကြေညာသူ ၁၂၀,၅၃၀ ရှိပြီး မှန်မှန်ရှေ့ဆောင် ၂၃,၅၆၅ ယောက် ရှိပါတယ်။ အများဆုံး မှန်မှန်ရှေ့ဆောင် အရေအတွက် ရရှိလာတာ လွန်ခဲ့တဲ့ လုပ်ငန်းတော်နှစ်အထိဆိုရင် ရှစ်နှစ် ဆက်တိုက်ရှိပါပြီ။

ဘုရားနာမတော်ကို ဂုဏ်တင်စေမယ့် ဒီအဆောက်အအုံတွေ ပြုပြင်မွမ်းမံခြင်းလုပ်ငန်းကို ယေဟောဝါဘုရား ဆက်လက်ထောက်မပေးမယ်ဆိုတာ စိတ်ချပါတယ်။—ဆာလံ ၆၁:၈။