၂၀၂၃ ခုနှစ်၊ ဧပြီ ၂၅ ကနေ ၂၉ ရက်နေ့ထိ ဇင်ဘာဘွေနိုင်ငံ၊ ဘူလာဝါယိုမြို့မှာ နိုင်ငံတကာ ကုန်စည်ပြပွဲ (ZITF) ကျင်းပခဲ့တယ်။ ဇင်ဘာဘွေနိုင်ငံရဲ့ အကြီးဆုံး ပြပွဲတစ်ခုပါပဲ။ နိုင်ငံပေါင်း ၂၂ နိုင်ငံက လာရောက်ခင်းကျင်းပြသတဲ့ ပြခန်း ၅၀၀ ရှိပြီး လူ ၆၀,၀၀၀ ကျော် လာရောက်ကြည့်ရှုကြတယ်။ ယေဟောဝါသက်သေတွေက ပညာရေးနဲ့ လေ့ကျင့်သင်ကြားရေးကဏ္ဍအောက်မှာ ပြခန်းတစ်ခု ခင်းကျင်းခဲ့တယ်။

နိုင်ငံတကာက လာရောက်ကြည့်ရှုသူတွေအတွက် ကျမ်းစာအခြေပြုစာပေတွေကို ဇင်ဘာဘွေ လက်သင်္ကေတပြ ဘာသာစကားအပါအဝင် ဘာသာစကား ဆယ်မျိုးနဲ့ ခင်းကျင်းပြသထားပြီး ကျမ်းစာလေ့လာမှု တောင်းခံနိုင်တဲ့အကြောင်း စိတ်ဝင်စားသူတွေကို ပြပေးကြတယ်။ ပြပွဲအပြီးမှာ ကျမ်းစာအခြေပြုစာပေပေါင်း ၁၂,၀၀၀ ကျော် ဝေငှနိုင်ခဲ့ပြီး အယောက် ၄၅၀ ကျော်က သူတို့ဆီ ယေဟောဝါသက်သေတွေ လာလည်ပတ်ပေးဖို့ တောင်းဆိုကြတယ်။ ပြခန်းဧည့်ကြိုတစ်ယောက်ဖြစ်တဲ့ ညီအစ်မ ယူစီဘိုင်ယာ မူကူရာ အခုလို ပြောတယ်– “ဧည့်သည် အတော်များများက အခမဲ့ ကျမ်းစာလေ့လာမှု ကမ်းလှမ်းတာကို လက်ခံကြတယ်။ ယေဟောဝါသက်သေတွေ လာလည်ပတ်တာကို မျှော်နေမယ်နော်လို့ ဧည့်သည်တွေ ပြောသွားတာကို ကြားရတာ ဝမ်းသာလိုက်တာ။”

ပြခန်းမှာ ကမ္ဘာသစ်ဘာသာပြန်ကျမ်း ကိုလည်း ပြသခဲ့တယ်။ ကျမ်းစာကို ဒက်ဘယ်လ်စကားနဲ့ အသံထွက်ဖတ်ပြနေတာကို အမျိုးသမီးတစ်ယောက် ကြားတဲ့အခါ နားလည်ရလွယ်တာကို သဘောကျသွားပြီး ကျမ်းစာတစ်အုပ် တောင်းခံခဲ့တယ်။ နောက်မိန်းကလေးတစ်ယောက်ကလည်း ကမ္ဘာသစ်ဘာသာပြန်ကျမ်း လိုချင်လို့ သူ့ဖုန်းထဲမှာ JW Library app ကူးယူလိုက်ပြီဆိုတဲ့အကြောင်း ညီအစ်မတစ်ယောက်ကို ဝမ်းသာအားရ လာပြတယ်။

ဧည့်သည်တွေကို ကူညီပေးခဲ့တဲ့ ညီအစ်မ ဂျီလျံ အယ်လမန် အခုလို ပြောပြတယ်– “စိတ်လှုပ်ရှားစရာ အတွေ့အကြုံပါပဲ။ ပြခန်းမှာ ဧည့်သည် တစ်ချက်မှ မပြတ်ဘူး။ ယေဟောဝါဘုရားကို အကြီးအကျယ် ဂုဏ်တင်ချီးမွမ်းခွင့်ရခဲ့တယ်။”

လူတွေ “အမှန်တရားအကြောင်း တိကျမှန်ကန်စွာ သိရှိစေဖို့” အခွင့်အရေး မှန်သမျှကို ဇင်ဘာဘွေက ညီအစ်ကို/မတွေ မလွတ်တမ်း အသုံးချနေကြတာကို မြင်ရတာ တကယ် အားရှိစရာပါပဲ။—၁ တိမောသေ ၂:၄။