နိုင်ငံပေါင်း ၁၁ နိုင်ငံမှာရှိတဲ့ ထိုင်းအသင်းတော်နဲ့ အုပ်စုတွေက ညီအစ်ကို/မတွေဟာ ၂၀၁၉၊ ဒီဇင်ဘာ ၁ ကနေ ၂၀၂၀၊ ဇန်နဝါရီ ၃၁ အထိ အထူး ဟောပြောခြင်း ကင်ပိန်းအတွက် ထိုင်းနိုင်ငံကို ရောက်လာကြတယ်။ မြို့တော်ဘန်ကောက်နဲ့ အနီးဝန်းကျင်က ထိုင်းစကားပြောသူတွေကို ဟောပြောရာမှာ ထိုင်းစကားပြော ကြေညာသူ ၄,၈၀၀ ခန့်ကို ကူညီပေးဖို့ပါ။ ကြေညာသူ ၆၀၀ ကျော်ဟာ ဟောပြောခြင်းမှာ နာရီပေါင်း ၃၄,၆၂၅ နာရီ ပါဝင်ကြတယ်။ စာပေဝေငှမှု ၃၂,၇၁၈၊ ဗီဒီယိုပြသမှု ၆,၆၃၇ ခု ရှိပြီး သင်အံမှု ၃၁၀ စတင်နိုင်ခဲ့ကြတယ်။

ဒါဟာ လွန်ခဲ့တဲ့ နှစ်နှစ်အတွင်း ဒုတိယအကြိမ်မြောက် ကင်ပိန်းပါ။ ၂၀၁၈ ဒီဇင်ဘာကနေ ၂၀၁၉ ဇန်နဝါရီမှာ လုပ်တဲ့ ပထမကင်ပိန်းပြီးတဲ့နောက် ထိုင်းဌာနခွဲ ကော်မတီဝင် ညီအစ်ကို ပလေကွန် ပက်စတန်ရီက “ကျမ်းစာသင်အံမှု အများကြီး စတင်ခဲ့တယ်။ နယ်ခံ အသင်းတော်တွေကို အလွန့်အလွန် အားရှိစေတယ်” လို့ ပြောတယ်။ ဒါကြောင့် ဌာနခွဲက ဒီဒုတိယကင်ပိန်းကို စီစဉ်ရခြင်း ဖြစ်တယ်။

အခုကင်ပိန်းမှာ ရပ်ဝေးကနေ လာတဲ့ ကြေညာသူတချို့ဟာ ယေဟောဝါအကြောင်း သိချင်သူတွေကို ထပ်ကူညီနိုင်ဖို့ အိမ်ပြန်ချိန်ကို နောက်ဆုတ်လိုက်ကြတယ်။ ကိုရီးယားက မောင်နှံတစ်စုံဆိုရင် ထိုင်းနိုင်ငံမှာ တစ်လကြာ နေဖို့ စီစဉ်တယ်။ စိတ်ဝင်စားသူများစွာကို ရှာတွေ့ပြီးတဲ့နောက်မှာတော့ နောက်နှစ်ပတ် ထပ်နေဖို့ ဆုံးဖြတ်ကြတယ်။ ကင်ပိန်းမှာ ပါဝင်နိုင်ဖို့ အလုပ်ထွက်လိုက်တဲ့ ကိုရီးယားက ညီအစ်မတစ်ယောက်လည်း ထိုင်းနိုင်ငံကို ပြောင်းရွှေ့နေထိုင်ဖို့ ဆုံးဖြတ်ထားတယ်။

ဒီကင်ပိန်းမှာ ကြေညာသူတွေရဲ့ ကြိုးစားမှု သိပ်အောင်မြင်တယ်။ သက်သေခံ သားအမိနှစ်ယောက်က အလုပ်မှာ အမျိုးသမီးတစ်ဦးကို သက်သေခံတယ်။ ပထမအကြိမ် လည်ပတ်မှုမှာ “ကလေးတွေ သင်ယူရမယ့် သင်ခန်းစာ ခြောက်ခု” ခေါင်းစဉ်ပါ ၂၀၁၉ နိုးလော့! အမှတ် ၂ ကို ဝေတယ်။ နောက်တစ်ကြိမ် ပြန်လာတဲ့အခါ အဲဒီအမျိုးသမီးက ဝမ်းသာအားရ ကြိုဆိုတယ်။ ညီအစ်မတွေ ပေးခဲ့တဲ့ နိုးလော့! ကို မြှောက်ပြပြီး “သိပ်ကောင်းတာပဲ။ ထပ်သိချင်သေးလို့ ကူညီပါဦး” ဆိုပြီး တောင်းဆိုတယ်။ ကြေညာသူတွေက တစ်ပတ် တစ်ကြိမ် သူ့ရုံးခန်းမှာပဲ နေ့လည် နားချိန်အတွင်း ကျမ်းစာ သင်ပေးဖို့ စီစဉ်တယ်။ JW Library app ကို ဒေါင်းလုတ် ဆွဲနိုင်ဖို့ ကူညီတယ်။ အဲဒီအမျိုးသမီးက တစ်ပတ် နှစ်ကြိမ် ကျမ်းစာ လေ့လာတဲ့အပြင် သူ့ကလေးတွေကို ကာတွန်းသရုပ်ဖော် ဗီဒီယိုတွေ ပြပေးနေပြီ။

နောက်ကြေညာသူတစ်ယောက်က သက်သေခံတွေ ယဉ်ယဉ်ကျေးကျေး ဝတ်ဆင်တာ၊ ဖော်ရွေတာကို သဘောကျတဲ့ အမျိုးသမီးနဲ့ ဆုံတယ်။ သူငယ်ချင်း လိုချင်လို့ ဘုရားကျောင်းတွေ သွားတက်ပေမဲ့ အလကားပဲလို့ ပြောတယ်။ ကြေညာသူက အဲဒီနေ့မှာပဲ အစည်းအဝေး ဖိတ်ခေါ်လိုက်တယ်။ သူ လာတက်ပြီး နောက်ခံ၊ ယဉ်ကျေးမှုပေါင်းစုံက ညီအစ်ကို/မတွေနဲ့ သိကျွမ်းခွင့်ရတယ်။ လူအားလုံးအတွက် သတင်းကောင်း စာစောင်ကို လေ့လာနေပြီး အစည်းအဝေးတွေကို ဆက်တက်ဖို့ ဆန္ဒရှိနေပြီ။

ညီအစ်မတစ်ယောက်က ဘန်ကောက်၊ ဘန်နာနယ်မှာ သက်လတ်ပိုင်း အမျိုးသမီးတစ်ဦးနဲ့ ဆုံတယ်။ သူက ဘုရားကျောင်း တက်ဖူးပေမဲ့ ကိုယ်ပိုင် ကျမ်းစာ မရှိဘူးတဲ့။ ညီအစ်မက JW Library app ကနေ ကမ္ဘာသစ် ဘာသာပြန်ကျမ်းစာ ဆွဲဖို့ ကူညီပေးတယ်။ သူ့ဆီ နောက်တစ်ကြိမ် လာတဲ့အခါ ဒေါင်းလုတ်ဆွဲထားတဲ့ ကျမ်းစာကို ဖတ်နေကြောင်း ပြောပြတယ်။ ညီအစ်မတွေက သတင်းကောင်း စာစောင် နောက်ကျောမှာပါတဲ့ မေးခွန်းတွေကို ပြပြီး တစ်ခုချင်းစီ ဖတ်ပြတယ်။ မေးခွန်းအားလုံး သိချင်တယ်လို့ ပြောတဲ့အတွက် ညီအစ်မတွေက ကျမ်းစာသင်အံမှု စလိုက်တယ်။ အခုဆို နယ်ခံ ညီအစ်မတစ်ယောက်နဲ့ ဆက်လေ့လာနေပါပြီ။ ဘဝမှာ ပထမဆုံးအကြိမ် ဘုရားနဲ့ ကျမ်းစာအကြောင်း ကိုယ်တိုင် ဖတ်ရှုလေ့လာခွင့် ရလို့ သိပ်ဝမ်းသာတယ်ဆိုပြီး ပြောပြတယ်။

တစ်အိမ်မှ တစ်အိမ် ဟောပြောချိန်မှာ ညီအစ်မတစ်ယောက်က မောင်နှံတစ်စုံနဲ့ ဆုံတယ်။ ယောက်ျားက ထိုင်း။ မိန်းမက လာအို။ ဘဝမှာ ဘာအရေးကြီးဆုံးလဲလို့ သူတို့ကို မေးတဲ့အခါ “မိသားစု” လို့ ဖြေကြတယ်။ လူအားလုံးအတွက် သတင်းကောင်း စာစောင်မှာ မိသားစုအကြောင်း ဆွေးနွေးတဲ့အခါ သူတို့ သဘောကျပြီး လက်ခံတယ်။ ကျမ်းစာသင်အံမှုလည်း လက်ခံတယ်။ သိပ်မကြာခင် အသင်းတော် အစည်းအဝေးတွေ လာတက်တယ်။ ယောက်တိုင်း ဖော်ရွေကြလို့ အစည်းအဝေး တက်ရတာ ပျော်တယ်၊ နောက်လည်း တက်မယ်လို့ ပြောတယ်။

ထိုင်းနိုင်ငံ ကင်ပိန်းက ဒီတွေ့ကြုံမှုတွေနဲ့ တခြားတွေ့ကြုံမှုတွေက ဒီနောက်ဆုံးကာလအတွင်း ယေဟောဝါရဲ့ လူတွေ “သခင့်အလုပ်မှာ အမြဲ အလုပ်များနေကြ” တယ်ဆိုတာ ဖော်ပြတယ်။—၁ ကောရိန္သု ၁၅:၅၈။