ဖိလစ်ပိုင်၊ မ​နီ​လာ​မြို့။ နော့ခ်​တဲ​န်း မုန်တိုင်းကြီး (ဒေသခံတွေက “နီ​နာ” လို့​ခေါ်) တိုက်ခတ်​သွား​လို့ ပျက်စီးခဲ့​တဲ့ အိမ်တွေကို ​ပြုပြင်ဆောက်လုပ်​ပေးဖို့ သဘာဝဘေးဒဏ် ကယ်ဆယ်ရေး​ စီမံကိန်း​ကြီးတစ်ခုကို ဖိလစ်ပိုင်​က ယေဟောဝါသက်သေတွေ ဆောင်ရွက်​ခဲ့ကြတယ်။

၂၀၁၆ ဒီဇင်ဘာ ၂၅ ရက်​နေ့မှာ အဆင့် ၄ ရှိတဲ့ ​နော့ခ်​တဲ​န်း ​မုန်တိုင်းဟာ ဘီ​ကို​လ်​ဒေသ​ကို တိုက်ခတ်​သွား​လို့ အကြီးအကျယ် ထိခိုက်​ပျက်စီး​ခဲ့တယ်။ သတင်းတွေ​အရ လူ ၁၀ ဦး သေဆုံး​တယ်၊ အဆောက်အဦ ၃၉၀,၀၀၀ ပျက်စီး​သွားတယ်။ အဲဒီ​ဒေသမှာ ယေဟောဝါ​သက်သေ တစ်ယောက်မှ အပြင်းအထန် ဒဏ်ရာရတာ၊ သေဆုံးတာ မရှိ​ပေမဲ့ သက်သေခံတွေရဲ့​ အိမ် ၃၀၀ ကျော်နဲ့ (နိုင်ငံတော်​ခန်းမ​ လို့​ခေါ်တဲ့) ဝတ်ပြုစည်းဝေးတဲ့​နေရာ ၂၄ လုံး​ဟာ အနည်း​ငယ် ပျက်စီးတာ ဒါမှမဟုတ် လုံးဝ ​ပျက်စီးတာမျိုး ရှိတယ်။ ဘေးသင့်​တဲ့ သက်သေခံ မိသားစု​တွေကို ကူညီ​ပေးနိုင်​ဖို့ ယေဟောဝါသက်သေတွေရဲ့ ဖိလစ်ပိုင်​ ဌာနခွဲရုံး​က သဘောဝဘေး​ ကယ်ဆယ်ရေး​ ကော်မတီ​ကို နာ​ဂါ​မြို့မှာ ဖွဲ့စည်း​ခဲ့​သည်။

“ကယ်ဆယ်ရေး​လုပ်ငန်းမှာ ပါဝင်​ကူညီပေး​ကြ​တဲ့ စေတနာ့​ဝန်ထမ်း​တွေဟာ အခုအချိန်အထိ ယုံကြည်သူချင်းတွေရဲ့ အိမ် ၂၇၁ လုံး​နဲ့ နိုင်ငံတော်​ ခန်းမ​ ​၂၂ လုံး​ကို ပြုပြင်ပေး​ခဲ့​ကြပြီ။ ကယ်ဆယ်ရေး​အဖွဲ့မှာ​ပါတဲ့ ဆောက်လုပ်ရေး ညီအစ်ကို​တွေဟာ ကျန်တဲ့ အိမ် ၃၈ လုံး​နဲ့ နိုင်ငံတော်​ခန်းမ ၂ လုံး​ကို ၂၀၁၇ ဧပြီလ အကုန်​မှာ အပြီး​ဆောက်​ပေးဖို့ ပန်းတိုင်​ထားတယ်” ဆိုပြီး ဖိလစ်ပိုင်​က ယေဟောဝါသက်သေတွေ​အတွက် ပြောရေးဆိုခွင့်​ရှိသူ ဒင်း​ဂျေ​စက်​က ပြောတယ်။

ယေဟောဝါသက်သေတွေရဲ့ ကမ္ဘာချီ​လုပ်ငန်း​ထဲမှာ သဘာဝဘေးဒဏ် ကယ်ဆယ်ရေး​လုပ်ငန်းလည်း ပါဝင်တယ်။ အဲဒီ​ကမ္ဘာချီ​လုပ်ငန်းကို အုပ်ချုပ်ရေး​အဖွဲ့က စေတနာအလျောက် ထည့်ဝင်တဲ့ အလှူငွေတွေနဲ့ လုပ်ဆောင်​နေပါတယ်။ တစ်ကမ္ဘာလုံးမှာ ယေဟောဝါသက်သေ ရှစ်သန်းကျော်ရှိတဲ့အနက် ၂၀၉,၀၀၀ ကျော်ဟာ ဖိလစ်ပိုင်​မှာ ရှိကြတယ်။

သတင်း​အချက်အလက် ဆက်သွယ်​ရန်-

နိုင်ငံတကာ- David A. Semonian, Office of Public Information, +1-845-524-3000

ဖိလစ်ပိုင်- ဒင်း ဂျေ​စက်, +63-2-224-4444