၂၀၂၄ ခုနှစ်၊ မတ်လ ၁ ရက်ကနေ ဇွန်လ ၃၀ ရက်အထိ ဘရာဇီးနိုင်ငံအနှံ့မှာ ဟောပြောခြင်းကင်ပိန်း ပြုလုပ်ခဲ့ပြီး ယေဟောဝါသက်သေ ၁,၀၀၀ ကျော် ပါဝင်ခဲ့တယ်။ ဘရာဇီး တိုင်းရင်းဘာသာစကား ၁၁ မျိုးနဲ့ ပျော်စရာဘဝ ထာဝရ စံစားကြ ထုတ်ဝေချိန်အပြီးမှာ ဒီကင်ပိန်းကို ကျင်းပခဲ့တာပါ။ ရလဒ်အနေနဲ့ ကျမ်းစာသင်အံမှု တောင်းခံသူ ၃၀၀ နီးပါး ရှိခဲ့တယ်။

ဇဗန်တေစကားပြောတဲ့ အမျိုးသမီးက ကြေညာသူတွေနဲ့ စကားပြောရင်း အခုလို မေးတယ်– “ကျွန်မရဲ့ ဘာသာစကားနဲ့ ဗီဒီယိုတွေ ထုတ်ပေးနေတာ ရှင်တို့ အဖွဲ့လား။ ရှင်တို့ကို ကျွန်မ ရှာနေတာ ကြာပြီ။ အခုမှပဲ တွေ့တော့တယ်။” အရင်က ယေဟောဝါသက်သေတွေနဲ့ ကျမ်းစာလေ့လာခဲ့ပေမဲ့ ပေါ်တူဂီစကား နားမလည်လို့ သင်အံမှု ရပ်လိုက်တဲ့အကြောင်း ရှင်းပြတယ်။ ကျမ်းစာအခြေပြုစာပေတွေကို ဇဗန်တေစကားနဲ့ ရနေပြီလို့ ကြားတော့ ယေဟောဝါသက်သေတွေကို လိုက်ရှာခဲ့တယ်။ အခု သူကျမ်းစာ ပြန်သင်နေပါပြီ။

ဆန်တာ မာရီယာ ဒဲ ဂျဲတီဘာမြို့မှာ ညီအစ်မတစ်ယောက်က ပေါ်မီရေနီယားစကားပြော အမျိုးသမီးတစ်ယောက်နဲ့ သုံးကြိမ် စကားပြောဖြစ်တယ်။ တတိယအကြိမ် ပြန်လည်ပတ်တဲ့အခါ အမျိုးသမီးက ညီအစ်မနဲ့ မဆုံခင်တစ်ရက်မှာ ဘုရားဆီဆုတောင်းခဲ့တဲ့အကြောင်း ဖွင့်ပြောလာတယ်။ ဘုရားသခင်ကို နည်းမှန်လမ်းကျ ဝတ်ပြုနိုင်ပုံ သင်ပေးပါဆိုပြီး ဆုတောင်းခဲ့တာ။ ကျမ်းစာသင်အံမှုကို သူ ဝမ်းသာအားရ လက်ခံခဲ့တယ်။

ဘရာဇီးနိုင်ငံ တောင်ပိုင်းက ရွာလေးတစ်ရွာမှာ ယေဟောဝါသက်သေတွေအကြောင်း တစ်ခါမှ မကြားဖူးတဲ့ ခိန်ဂန်စကားပြော အမျိုးသမီးတစ်ယောက်နဲ့ ဆုံတယ်။ ညီအစ်ကိုတွေက ဆာလံ ၈၃:၁၈ ကို ဖတ်ပြပြီး ဘုရားနာမည် ယေဟောဝါဖြစ်ကြောင်း ရှင်းပြတဲ့အခါ သူ တအား စိတ်ထိမိသွားတယ်။ ဘုရားမှာ ကိုယ်ပိုင်နာမည်ရှိမှန်း သူ့ကို ဘယ်သူမှ မသင်ပေးဖူးဘူးလို့ ပြောတယ်။ ကျမ်းစာသင်အံမှုကို ချက်ချင်း လက်ခံခဲ့တယ်။

လူများစွာက “ထာဝရသတင်းကောင်း” အကြောင်း လေ့လာပြီး ယေဟောဝါကို ဂုဏ်တင်ချီးမွမ်းလာကြလို့ ဘရာဇီး ညီအစ်ကို ညီအစ်မတွေနဲ့ ထပ်တူထပ်မျှ ဝမ်းသာရပါတယ်။—ဗျာဒိတ် ၁၄:၆၊ ၇။