စ​န်​တာ​ခရုဇ်​မြို့၊ ဘိုလီးဗီးယား။ ဘိုလီးဗီးယား​နိုင်ငံ၊ ကို​ချာ​ဘ​န်​ဘာ​မြို့မှာ ၂၀၁၇၊ အောက်တိုဘာ ၂၇-၂၉ အထိ ကျင်းပတဲ့ ယေဟောဝါသက်သေများရဲ့ အစည်းအဝေးကြီး​မှာ နိုင်ငံ ၂၀ ကနေ လူပေါင်း ၁၇,၀၀၀ နီးပါး တက်ရောက်​ကြတယ်။ ယေဟောဝါသက်သေတွေရဲ့ အစည်းအဝေးကြီး​ကို ဘိုလီးဗီးယား​နိုင်ငံရှိ အဖွဲ့အစည်း​နှစ်ခု​က သဘောကျ​သွားတယ်။ ဒါကြောင့် အစည်းအဝေးကြီး​နေရာကို အကြီးစား​ပြင်ဆင်​မွမ်းမံမှု၊ ဘိုလီးဗီးယား တိုင်းရင်းသား​တွေရဲ့ ယဉ်ကျေးမှု​ပြခန်း​အတွက် ဆု​ချီးမြှင့်​ခဲ့တယ်။

ဖန်​ဒါ​ဆီ​ယွန် ပါ​ရာ​လာ ဖယ်​ရီ​ယာ အင်​တာ​နေ​ရှင်​နယ် ဒီကို​ချာ​ဘ​န်​ဘာ (FEICOBOl) ကွင်း​မှာ ၂၀၁၂ ခုနှစ်​က​စပြီး ယေဟောဝါသက်သေတွေ နှစ်​တိုင်း အစည်းအဝေးကြီး ကျင်းပ​ကြတယ်။ အစည်းအဝေးကြီး မစ​ခင် ထုံးစံ​အတိုင်း သန့်ရှင်းရေး​လုပ်ကြတယ်။ ဒါပေမဲ့ လူ​သောင်း​ချီ တက်ရောက်​မယ့် ဒီ​နှစ် အစည်းအဝေးကြီး​ကို ကြိုတင်​ပြင်ဆင်​တဲ့အခါ ယေဟောဝါ​သက်သေ စေတနာ့​ဝန်ထမ်း ၄,၉၀၀ ခန့်​က အဆောက်အအုံ အတွင်းအပြင်​ကို ၁၅ ရက်​ကြာ ပြင်ဆင်​မွမ်းမံ​ခဲ့​ကြတယ်။ ဆေးသုတ်​တာ၊ ပိုက်​ပြင်​တာ၊ ရုပ်သံ​စနစ်၊ ကွန်​ယက် ချိတ်ဆက်​တာ​တွေ ပါဝင်တယ်။ အပြင်​ပိုင်း မွမ်းမံမှု​မှာ ပန်းပင်​စိုက်​တာ၊ ခုံတန်း​တွေ၊ လမ်း​မီး​တွေ ပြုပြင်​တာ ပါတယ်။

နိုင်ငံတကာ​က​လာတဲ့ ကိုယ်စားလှယ်​တွေကို ဘိုလီးဗီးယား တိုင်းရင်းသား​တွေရဲ့ ယဉ်ကျေးမှု​အကြောင်း သိစေဖို့ ဒေသခံ ယေဟောဝါသက်သေတွေ​က ပြခန်း​တစ်ခု ဆောက်လုပ်ခဲ့​ကြတယ်။ ပြခန်း​မှာ စိုက်ပျိုးရေး ထွက်ကုန်​တွေ၊ နံရံ​ဆေး​ရေး​ပန်းချီ​တွေ ပြသထား​တယ်။ ဘိုလီးဗီးယား​ရဲ့ တ​မူ​ထူး​တဲ့ ဗိသုကာ​လက်ရာကို ပေါ်လွင်​စေတဲ့ အိမ်ပုံစံ​ငယ် သုံးလုံး​ကိုလည်း ပြသထား​တယ်။ ပြီးတဲ့နောက် ယေဟောဝါသက်သေတွေ​က ဒီ​အိမ်တွေကို FEICOBOL ဆီ လှူဒါန်းခဲ့​တယ်။

ယေဟောဝါသက်သေတွေရဲ့ အလုပ်ကို အသိအမှတ်ပြု ဆု​ချီးမြှင့်​ပေးတဲ့ FEICOBOL ဒါရိုက်တာ​ဘုတ်အဖွဲ့၊ ဥက္ကဋ္ဌ အာလ်​ဒို ဗာ​က​က်ဖ​လော် ဒီလို​ပြောခဲ့တယ်– “ခင်ဗျားတို့​အသင်းသားတွေရဲ့ အလုပ်​ကြိုးစားမှု​ကို တကယ်​လေးစားတယ်​ဗျာ။ အစည်းအဝေးကြီး ဖြစ်မြောက်​ဖို့ စိတ်အား​ထက်သန်မှု၊ ဆည်းကပ်မှု၊ အလုပ်​ကြိုးစားမှု​ကို မ​ချီးမွမ်း​ဘဲ မနေ​နိုင်ဘူး။ ဒါကို ကျွန်တော်တို့ နမူနာ​ယူ​ရမယ်။”

ကို​ချာ​ဘ​န်​ဘာ ယဉ်ကျေးမှု ဌာန​ဆိုင်ရာ ကောင်စီ​က ယေဟောဝါသက်သေတွေရဲ့ ပြခန်း​ကို သဘောကျတဲ့​အတွက် ကို​ချာ​ဘ​န်​ဘာ​ပြည်နယ် အစိုးရရုံး​က ယေဟောဝါ​သက်သေတွေကို ဆု​ချီးမြှင့်​ခဲ့တယ်။ ကောင်စီ​ဥက္ကဋ္ဌ စ​ဒန်​ကာ ဖွန်​တက်​က ကို​ချာ​ဘ​န်​ဘာကို အစည်းအဝေးကြီး ကျင်းပမယ့်​မြို့​အဖြစ် ရွေးချယ်​တဲ့​အတွက် သက်သေခံတွေကို ကျေးဇူးတင်ကြောင်း၊ ဘိုလီးဗီးယား​ရဲ့ ယဉ်ကျေးမှု​ပြခန်း​ဟာ တကယ်​ထူးခြား​ကြောင်း ပြောခဲ့တယ်။

ဘိုလီးဗီးယား​နိုင်ငံက ယေဟောဝါသက်သေများရဲ့ ပြောရေးဆိုခွင့်​ရှိသူ ဂတ် ဂွတ်​မ​န် ဒီလို​ပြောပါ​တယ်– “ဒီ​အစည်းအဝေးကြီး​ကို မြို့​ခြောက်မြို့​နဲ့ ချိတ်ဆက်​ထားတဲ့​အတွက် လူပေါင်း ၄၉,၃၂၀ ယောက် အတူတကွ စုဝေး​ဝတ်ပြု​နိုင်ခဲ့ကြ​တယ်။ ဘိုလီးဗီးယား​နိုင်ငံနဲ့ ထူးခြားတဲ့ တိုင်းရင်းသား ယဉ်ကျေးမှု ပြသ​တာ​ကို အများ​ပြည်သူ တန်ဖိုး​ထားတဲ့​အတွက် ဝမ်းသာ​ပါတယ်။”

ယေဟောဝါ​သက်သေတွေဟာ ဘိုလီးဗီးယား​နိုင်ငံမှာ ၁၉၂၄ ခုနှစ်​ကတည်းက ကျမ်းစာ ပညာပေး​လုပ်ငန်း လုပ်ဆောင်​နေကြပါတယ်။ ၂၀၁၇ နှစ်ဆန်းပိုင်း​မှာ ခရစ်ယာန်​ဂရိကျမ်း​စာ (“ဓမ္မသစ်ကျမ်း”) ကို က​က်​ချူ​ဝါ၊ အေ​မာ​ရာ ဘာသာစကားတွေနဲ့ ထုတ်ဝေ​ခွင့်​ရတဲ့​အတွက် သမိုင်း​မှတ်တိုင် ထူ​နိုင်ခဲ့တယ်။

Media Contacts:

International: David A. Semonian, Office of Public Information, +1-845-524-3000

Bolivia: Garth Goodman, +591-3-342-3442