ယူကရိန်းနိုင်ငံ၊ လဗီဖ်မြို့မှာ ၂၀၁၈၊ ဇူလိုင် ၆-၈ ရက်အတွင်း ကျင်းပတဲ့ အထူးအစည်းအဝေးကြီးကို တက်ရောက်လာကြတဲ့ ညီအစ်ကို/မ ထောင်ချီကို ယူကရိန်းနိုင်ငံက ယေဟောဝါသက်သေတွေ ကြိုဆိုခဲ့ကြတယ်။ ကိုးနိုင်ငံက ကိုယ်စားလှယ် ၃,၃၀၀ ကျော်ဟာ ကျမ်းစာအခြေပြု အဓိကအကြောင်း “ရဲစွမ်းသတ္တိ ရှိပါ” အစီအစဉ်ကနေ အကျိုးရဖို့ ယူကရိန်းကို ရောက်လာကြတာပါ။ ယူကရိန်း ညီအစ်ကို/မတွေရဲ့ ဧည့်ဝတ်ကျေပွန်မှုကြောင့်လည်း ရွှင်လန်းခဲ့ကြတယ်။

အစည်းအဝေးကြီးအတွက် ၂၀၁၇၊ ဧပြီလကစပြီး ပြင်ဆင်ခဲ့ကြတယ်။ ဒေသခံ ယေဟောဝါသက်သေများစွာဟာ အစည်းအဝေးကြီး အစီအစဉ်တွေနဲ့ ရောက်ရှိလာမယ့် ညီအစ်ကို/မတွေအတွက် ၁၅ လကျော် စေတနာ့ဝန်ထမ်းခဲ့ကြတယ်။ ယူကရိန်း အက၊ တေးဂီတ၊ ရိုးရာအစားအစာ စတဲ့ ထူးခြားတဲ့ ယဉ်ကျေးမှုတချို့ကို ကိုယ်စားလှယ်တွေ မြည်းစမ်းခဲ့ကြရတယ်။ ပြတိုက်တစ်ခုနဲ့ ရှေးဟောင်း ရဲတိုက်တွေကို လည်ပတ်ကြည့်ရှုပြီး ခမ်းနားလှတဲ့ ကာရ်ပေသီယမ်တောင်တန်းကို ရှုစားခဲ့ကြတယ်။ အထူးအမှတ်ရစရာကတော့ ယူကရိန်း ယေဟောဝါသက်သေတွေနဲ့အတူ အမှုဆောင်လုပ်ငန်းမှာ ပါဝင်ခွင့် ရတာပါပဲ။

အစည်းအဝေးကြီး အစီအစဉ်ကို လဗီဖ်မြို့က အားကစားကွင်းကြီးမှာ ကျင်းပပြီး အများဆုံး ၂၅,၀၀၀ ကျော် တက်ရောက်ခဲ့တယ်။ အစီအစဉ်ရဲ့ အဓိကအပိုင်းတွေကို အားကစားရုံ ၁၅ ခုနဲ့ နိုင်ငံတစ်ဝန်းက ဝတ်ပြုရာခန်းမ များစွာကို တိုက်ရိုက် ထုတ်လွှင့်ပေးခဲ့တဲ့အတွက် စုစုပေါင်းတက်ရောက်သူ ၁၂၅,၀၀၀ ကျော် ရှိပြီး ၁,၄၂၀ ယောက် နှစ်ခြင်းခံခဲ့တယ်။

ယူကရိန်းနိုင်ငံ ဌာနခွဲရုံး ကိုယ်စားလှယ် အိုင်ဗန် ရီဟာ ဒီလိုပြောတယ်- “ဒီအထူးအခါသမယနဲ့ တခြားနိုင်ငံက ညီအစ်ကို/မတွေကို ကြိုဆိုဖို့ ကျွန်တော်တို့ မျှော်လင့်စောင့်စားခဲ့ကြတာ။ ဧည့်သည်တွေကို ယူကရိန်းဧည့်ဝတ်ကျေပွန်မှု ပြခွင့်ရခဲ့လို့ ဝမ်းသာကြပါတယ်။ ယေဟောဝါကို ဝတ်ပြုကိုးကွယ်တဲ့ ကမ္ဘာချီ မိသားစုဝင်တွေရဲ့ စည်းလုံးမှုနဲ့ ရဲစွမ်းသတ္တိတွေ ပိုတိုးများလာတယ်လို့ ခံစားရတယ်။”—ဆာလံ ၁၃၃:၁။