ယေဟောဝါသက်သေတွေဟာ ရိုမေးနီးယားနိုင်ငံ၊ ဂျီလဗာ ဘူခါရက် အကျဉ်းထောင်က အကျဉ်းသားတွေဆီ အပတ်တိုင်း သွားပြီး ကျမ်းစာအကြောင်း ဆွေးနွေးနေတာ ၁၇ နှစ် ရှိပါပြီ။ ကိုဗစ်-၁၉ ကပ်ရောဂါ စဖြစ်ပွားတဲ့အခါ လူချင်း တွေ့ဆုံခွင့် မရတော့ဘူး။ ဒါပေမဲ့ ၂၀၂၁၊ မတ် ၂၇ ရက်နေ့ အောက်မေ့ရာပွဲ မတိုင်ခင် နှစ်ပတ်အလိုမှာ ထောင်အာဏာပိုင်တွေက ဗီဒီယို ချိတ်ဆက်မှုကတစ်ဆင့် ပြန်တွေ့ဆုံခွင့် ပေးတယ်။ ဒါနဲ့ အောက်မေ့ရာပွဲ ဟောပြောချက်ကို ဗီဒီယို ချိတ်ဆက်မှုကတစ်ဆင့် ထုတ်လွှင့်ပေးလို့ ရမလားလို့ ထောင်အာဏာပိုင်တွေကို မေးကြည့်တော့ ခွင့်ပြုကြတယ်။ စုစုပေါင်း အကျဉ်းသား ၂၁ ဦး၊ ထောင်ကြပ် ၄ ဦး အောက်မေ့ရာပွဲ တက်ရောက်ကြတယ်။

ညီအစ်ကို ကော်နေလူ စီပန်က ရိုမေးနီးယား ဘာသာစကားနဲ့ ဟောပြောချက် ပေးပြီး ညီအစ်ကို အန်ဂျလို ကရန်ပလီယာက တက်ရောက်သူတစ်ဦးအတွက် ဂရိလို စကားပြန်လုပ်ပေးတယ်။ အရာရှိတစ်ဦး အပါအဝင် ထောင်ဝန်ထမ်း လေးဦး တက်ရောက်တယ်။

“အခုလို အောက်မေ့ရာပွဲ ဟောပြောချက် ပေးရတာ အခွင့်ထူးပါပဲ။ အကျဉ်းသားတွေ အာရုံစိုက် နားထောင်ကြတယ်၊ မိမိတို့အတွက် ယေရှု ဘယ်လောက် စွန့်လွှတ်အနစ်နာခံခဲ့မှန်း စဉ်းစားမိစေတယ်” ညီအစ်ကို စီပန် ပြောပြတယ်။

“အကျဉ်းသားတွေကို ဟောပြောခွင့်၊ အောက်မေ့ရာပွဲ ကျင်းပခွင့် ရအောင် ယေဟောဝါ လမ်းဖွင့်ပေးလို့ သိပ်ပျော်ကြတယ်။ ကျမ်းစာလေ့လာရာမှာ ပါဝင်လာပြီး ကျမ်းစာကနေ နှစ်သိမ့်မှု ရကြလိမ့်မယ်လို့ ကျွန်တော်တို့ မျှော်လင့်ပါတယ်” လို့ ညီအစ်ကို ကရန်ပလီယာ ပြောတယ်။

အောက်မေ့ရာပွဲ ဟောပြောချက်ကို အကျဉ်းသားတွေ နားထောင်နိုင်အောင် ထောင်အာဏာပိုင်တွေ ခွင့်ပြုပေးလို့ ကျွန်တော်တို့လည်း ဝမ်းသာပါတယ်။—၁ တိမောသေ ၂:၃၊ ၄။