၂၀၂၁၊ ဖေဖော်ဝါရီ ၁၈ a မှာ ဂျူးကိုယ်ပိုင်အုပ်ချုပ်ခွင့်ရဒေသ ဘိုင်ရိုဘစ်ဇန် ခရိုင်တရားရုံးက ညီအစ်မ ယူလီယာ ကာဂါနိုဗစ်ရဲ့ အမှုကို စီရင်ချက်ချဖို့ စီစဉ်ထားတယ်။ အစိုးရ ရှေ့နေတွေက ဘယ်လို ပြစ်ဒဏ်ပေးရမလဲဆိုတာ တောင်းဆိုထားခြင်း မရှိသေးဘူး။

ယူလီယာ ကာဂါနိုဗစ်

• မွေးဖွားတဲ့နှစ်– ၁၉၆၆ (မီခါလော့ဗ်ကာ၊ ဗော်ဂိုဂရက် ဒေသ)

• ဘဝအတ္ထုပ္ပတ္တိ– မြို့ပြ အင်ဂျင်နီယာကျောင်းဆင်း ဖြစ်တယ်။ ငယ်ငယ်တုန်းက အကသင်တန်း တက်ဖူးတယ်။ ဂီတကျောင်းဆင်း ဖြစ်တယ်။ သံစုံတီးဝိုင်းမှာ တီးပြီး တေးသံစုံအဖွဲ့မှာ သီချင်းဆိုတယ်။ ခင်ပွန်း အလက်ဇန်ဒါဟာ ယုံကြည်ခြင်း မတူပေမဲ့ ယူလီယာကို ထောက်မပေးတယ်။ ယူလီယာ ရာဇဝတ်မှုနဲ့ တရားစွဲခံရတာဟာ မတရားမှုကြီး ဖြစ်တယ်လို့ ယူဆတယ်

  ချစ်ရသူတချို့ သေဆုံးချိန်မှာ ဘဝအဓိပ္ပာယ်အကြောင်း ယူလီယာ စစဉ်းစားလာတယ်။ ကျမ်းစာမှာ ပါတဲ့ အဖြေတွေက စိတ်ငြိမ်းချမ်းစေပြီး မျှော်လင့်ချက် ရှိစေတယ်။ ၁၉၉၈ မှာ နှစ်ခြင်းခံတယ်။ ကျမ်းစာမူတွေကို ကျင့်သုံးလို့ အိမ်ထောင် ပိုသာယာလာတယ်။ ပေါင်းသင်းဆက်ဆံရေး ပိုကောင်းလာတယ်။ သားလေး အာတာကို ပြုစုစောင့်ရှောက်ပေးတယ်။ အာတာလည်း ယေဟောဝါသက်သေတစ်ယောက် ဖြစ်တယ်

  ယူလီယာ ကျန်းမာရေး မကောင်းဘူး။ ရာဇဝတ်မှုနဲ့ တရားစွဲခံရတော့ ကျန်းမာရေး ပိုဆိုးလာတယ်

“မနက်စောစော အိမ်တံခါး လာခေါက်တော့ ဘယ်သူမှန်း သိလိုက်တယ်။ ရင်တွေ တုန်လိုက်တာ။ ‘ယေဟောဝါ၊ ကျွန်မကို ကူညီပါ။ ယေဟောဝါ၊ ကျွန်မကို ကူညီပါ’ လို့ပဲ ပြောနိုင်လိုက်တယ်” လို့ ယူလီယာ ပြောတယ်။

၅၃ နှစ်အရွယ် ညီအစ်မ ယူလီယာဟာ ရုရှားမြို့ ဘိုင်ရိုဘစ်ဇန်မှာ ၂၀၁၉၊ အောက်တိုဘာ ၁၀ ကစပြီး ဘာသာရေးကြောင့် နှိပ်စက်ညှဉ်းပန်း ခံရတယ်။ အဲဒီဒေသမှာ ရုရှား ဖယ်ဒရယ် လုံခြုံရေး (FSB) အရာရှိတွေ ဝင်ရှာတဲ့ ညီအစ်ကို ညီအစ်မ အိမ် အလုံး ၂၀ ကျော်ထဲမှာ ယူလီယာရဲ့ အိမ်လည်း တစ်လုံး အပါအဝင် ဖြစ်တယ်။

ရဲတွေရဲ့ ဝင်ရောက်ရှာဖွေမှု အောင်မြင်တယ်။ ဒါပေမဲ့ ယူလီယာနဲ့ တခြားသက်သေခံတွေဟာ ကြိုတင်ပြင်ဆင်ထားတဲ့အတွက် ယုံကြည်ခြင်း ဆက်ခိုင်မာနေတယ်။

“ဝင်ရောက်စီးနင်းတာတွေ ကြုံရနိုင်တယ်၊ ကြိုတင်ပြင်ဆင်ထားဖို့ လိုတယ်ဆိုတာ အစည်းအဝေးတွေမှာ အကြိမ်ကြိမ် သတိပေးတယ်။ အဲဒီလို ဖြစ်လာနိုင်မှန်း သိလို့ ဘာလုပ်မယ်၊ ဘာပြောမယ်ဆိုပြီး ကျွန်မ စိတ်ကို ကြိုတင်ပြင်ဆင်ထားတယ်။ ဘာလုပ်ရမယ်ဆိုတာ ကြိုစဉ်းစားထားဖို့ သိပ်အရေးကြီးတယ်။ ဒါကြောင့် တကယ် ကြုံလာတဲ့အခါ ဘာလုပ်ရမှန်း မသိဘဲ ထိတ်ထိတ်ပျာပျာ ဖြစ်တာမျိုး မရှိဘဲ အမြန် စဉ်းစားဆုံးဖြတ်နိုင်တယ်” လို့ ယူလီယာ ပြောတယ်။

မျှော်လင့်ထားတဲ့အတိုင်း ဝင်ရောက်စီးနင်းမှုတွေ ပြီးနောက် ရုရှား အာဏာပိုင်တွေက ရာဇဝတ်မှုနဲ့ ချက်ချင်း အမှုဖွင့်တယ်။ ယူလီယာနဲ့ တခြားသူတွေဟာ အစွန်းရောက် လုပ်ရပ်နဲ့ တရားစွဲခံထားရတယ်။

၂၀၂၀၊ မတ် ၃ မှာ အာဏာပိုင်တွေက အမှုကို ဘိုင်ရိုဘစ်ဇန် ခရိုင်တရားရုံးဆီ လွှဲပေးလိုက်တယ်။ ကိုဗစ်-၁၉ ကပ်ရောဂါကြောင့် အမှုကို ငါးလ ရွှေ့ဆိုင်းထားတယ်။ ၂၀၂၀၊ အောက်တိုဘာ ၂၂ မှာ ယူလီယာ တရားရုံး ပြန်ရောက်တယ်။

“တစ်ဖက်က ကြည့်ရင် ဒီအခြေအနေမျိုး မကြုံချင်ဘူး။ တစ်ဖက်က ကြည့်ပြန်တော့လည်း ယေဟောဝါရဲ့ အချုပ်အခြာအာဏာဘက် ရပ်တည်ခွင့် ရလို့ သိပ်ပျော်တယ်” လို့ ယူလီယာ ပြောတယ်။

“ဟေရှာယ ၄၁:၁၀ ကိုတော့ ကျွန်မ အလိုအပ်ဆုံးပဲ။ ပရင့်ထုတ်ပြီး အိမ်မှာ ချိတ်ထားတယ်။ ဒါမှ ယေဟောဝါဘုရားရဲ့ ကတိစကားကို အမြဲ အမှတ်ရနေမှာ။ တုန်နေတဲ့ ဒူးကို ယေဟောဝါ တကယ် ခိုင်ခံ့စေမှန်း ကိုယ်တွေ့ ကြုံရတယ်” လို့ ယူလီယာ ပြောတယ်။

အခက်အခဲတွေကြား စိတ်တည်ငြိမ်စေတဲ့၊ သတ္တိရှိစေတဲ့၊ ပျော်ရွှင်စေတဲ့ ကျမ်းချက် အတော်များများကို ယူလီယာ အလွတ်ကျက်ထားတယ်။

ကျွန်တော်တို့လည်း အခုကတည်းက အနာဂတ် စမ်းသပ်မှုတွေအတွက် စိတ်ပိုင်း၊ ဘုရားရေးရာပိုင်း ကြိုတင်ပြင်ဆင်ထားခြင်းအားဖြင့် ပညာရှိရှိ လုပ်ဆောင်ကြပါစို့။ “ယေဟောဝါက သမာဓိရှိတဲ့ လမ်းစဉ်မှာ လျှောက်လှမ်းသူတွေကို ကောင်းမွန်ရာတွေ မပေးဘဲ မနေဘူး” ဆိုတာ ယုံကြည်စိတ်ချနိုင်ပါတယ်။—ဆာလံ ၈၄:၁၁။