ရုရှားအာဏာပိုင်တွေက ညီအစ်ကို ဒီမီထရီ မီခေးလော့ဗ်ကို ဖမ်းဆီးပြီး “ဘာသာရေး အကြောင်းပြချက်နဲ့ မတရားဆက်ဆံ” ချုပ်နှောင်ထားခြင်းက နိုင်ငံတကာ ဥပဒေကို ချိုးဖောက်ခြင်း ဖြစ်ကြောင်း ကုလသမဂ္ဂ နိုင်ငံတကာ ဥပဒေပညာရှင်တွေ ကောက်ချက်ချလိုက်တယ်။ ညီအစ်ကို မီခေးလော့ဗ်ကို ရာဇဝတ်မှုနဲ့ စွဲချက်တင်ထားတာအားလုံးကို ရုပ်သိမ်းပေးဖို့လည်း တိုက်တွန်းလိုက်ပါတယ်။

မတရားဖမ်းဆီးထိန်းသိမ်းခြင်းဆိုင်ရာ လုပ်ငန်းအဖွဲ့ (WGAD) က ပညာရှင်တွေ ပြုစုတဲ့ ၁၂ မျက်နှာရှိတဲ့ သဘောထားမှတ်တမ်းမှာ ညီအစ်ကို မီခေးလော့ဗ်ရဲ့ လုပ်ဆောင်မှုတွေဟာ “လုံးလုံး ငြိမ်သက်အေးချမ်းတယ်” လို့ ဖော်ပြထားတယ်။ “သူပဲ မဟုတ်ဘူး၊ ရုရှားနိုင်ငံမှာရှိတဲ့ ဘယ်ယေဟောဝါသက်သေမှ အကြမ်းဖက်လုပ်ရပ် လုပ်တယ်၊ အကြမ်းဖက်ဖို့ သူတစ်ပါးကို အားပေးတယ်ဆိုတဲ့ အထောက်အထား တစ်ခုမှ မရှိဘူး” လို့လည်း ဖော်ပြထားတယ်။

ညီအစ်ကို မီခေးလော့ဗ်ဟာ “ဘာသာရေး လွတ်လပ်ခွင့်ကို ကျင်းသုံးတာကလွဲလို့ တခြား ဘာမှမလုပ်တဲ့အတွက် စုံစမ်းစစ်ဆေးခြင်းမရှိဘဲ ချုပ်နှောင်ထားခြင်း၊ ဖမ်းဆီးခြင်း မပြုသင့်” လို့ WGAD က ကောက်ချက်ချပါတယ်။ အာဏာပိုင်တွေဟာ သူ့ကို မတရားဖမ်းချုပ်ထားပြီး ကိုယ်ပိုင်လွတ်လပ်မှု မပေးတဲ့အတွက် သူဆုံးရှုံးသွားတဲ့ လုပ်အားခတွေကို လျှော်ကြေးပေးသင့်ပါတယ်။

ယုံကြည်ချက်ကြောင့် မမျှမတ ဆက်ဆံခံနေရတာ ညီအစ်ကို မီခေးလော့ဗ် တစ်ယောက်တည်း မဟုတ်ဘူးဆိုတာလည်း WGAD က အသိအမှတ်ပြုထားပါတယ်။ မီခေးလော့ဗ်ဟာ “ရုရှားနိုင်ငံမှာ ဘာသာရေးလွတ်လပ်ခွင့်ကို ကျင့်သုံးမှုနဲ့ ဖမ်းဆီးချုပ်နှောင်ခံရ၊ ရာဇဝတ်မှုနဲ့ စွဲချက်တင်ခံရတဲ့ ယေဟောဝါသက်သေများစွာထဲက တစ်ယောက်သာ ဖြစ်တယ်။” တကယ်ဆိုရင် ဘာသာရေးလွတ်လပ်ခွင့်ကို နိုင်ငံတကာ ဥပဒေမှာ ကာကွယ်ပေးထားပါတယ်။ ဒါကြောင့် ရုရှားမှာရှိတဲ့ ယေဟောဝါသက်သေအားလုံး ညှဉ်းပန်းနှိပ်စက်ခံနေရတာကို ပြစ်တင်ရှုတ်ချတဲ့အနေနဲ့ မတရားဖမ်းဆီးချုပ်နှောင်ခံနေရတဲ့ ညီအစ်ကို မီခေးလော့ဗ်သာမက “မီခေးလော့ဗ်လို အခြေအနေမျိုး” ကြုံနေရတဲ့ ယေဟောဝါသက်သေအားလုံးနဲ့ သက်ဆိုင်တဲ့ မိမိတို့ရဲ့ သဘောထားကို WGAD က ပွင့်ပွင့်လင်းလင်း ထုတ်ဖော်ပြောခဲ့တယ်။

ညီအစ်ကို မီခေးလော့ဗ်ဟာ ဆယ်ကျော်သက်အရွယ်မှာ ကျမ်းစာ စလေ့လာပြီး အသက် ၁၆ နှစ်အရွယ် ၁၉၉၃ ခုနှစ်မှာ နှစ်ခြင်းခံခဲ့တယ်။ ၂၀၀၃ ခုနှစ်မှာ ယယ်လေနာနဲ့ လက်ထပ်ပြီး ယေဟောဝါကို အတူ ဝတ်ပြုကိုးကွယ်ခဲ့ကြတယ်။

၂၀၁၈ ခုနှစ်မှာ အာဏာပိုင်တွေက ညီအစ်ကိုနဲ့ ညီအစ်မ မီခေးလောဗ်တို့ရဲ့ ဖုန်းတွေကို လအတော်ကြာ ခိုးနားထောင်ပြီး သူတို့အသွားအလာကို ဗီဒီယို ခိုးရိုက်နေကြတာကို သိလိုက်ကြရတယ်။ ၂၀၁၈၊ ဧပြီ ၁၉ ရက်နေ့မှာ အိုင်ဗန်နိုပြည်နယ် ရုရှားဖယ်ဒရေးရှင်း စုံစမ်းစစ်ဆေးရေး ကော်မတီက ညီအစ်ကို မီခေးလော့ဗ်ကို ရာဇဝတ်မှုနဲ့ အမှုဖွင့်ပြီး လက်နက်ကိုင် ရဲတွေက သူ့အိမ်ကို ဝင်ရောက်ရှာဖွေခဲ့ကြတယ်။ တစ်လကြာပြီးနောက် အာဏာပိုင်တွေက သူ့ကို “အစွန်းရောက်” လုပ်ဆောင်မှုကို ငွေကြေးထောက်ပံ့မှုနဲ့ တရားစွဲပြီး ဖမ်းဆီးချုပ်နှောင်လိုက်တယ်။ စုံစမ်းစစ်ဆေးခြင်းမရှိဘဲ ခြောက်လနီးပါး၊ ၁၇၁ ရက်ကြာ ချုပ်နှောင်ထားပြီးနောက် လွှတ်လိုက်တယ်။ သူ့အမှုကို ကွင်းလုံးကျွတ် မလွတ်ပေးမချင်း ခရီးသွားလာမှု၊ ပေါင်းသင်းဆက်ဆံမှုတွေကို အာဏာပိုင်တွေက ကန့်သတ်ထားတယ်။

WGAD ရဲ့သဘောထားကို ခြောက်လအတွင်း တုံ့ပြန်ဖို့ ရုရှားအစိုးရကို တောင်းဆိုထားပါတယ်။ မီခေးလော့ဗ်ရဲ့ အမှုကို ပိတ်သိမ်းပေးမပေး၊ လျော်ကြေးပေးမပေး၊ သူ့ရဲ့လူ့အခွင့်အရေး ချိုးဖောက်သူတွေကို စုံစမ်းစစ်ဆေးခြင်းပြုမပြု ပြန်တုံ့ပြန် ဖြေကြားပေးရမှာ ဖြစ်တယ်။

WGAD ရဲ့ အလားတူ သဘောထားကြောင့် ကာဇက်စတန်နိုင်ငံက ညီအစ်ကို တေမူ အခါမေဒေါ့ဗ်အမှုလည်း အပြောင်းအလဲ ဖြစ်ခဲ့ပုံရတယ်။ ညီအစ်ကို တေမူဟာ ၂၀၁၇ ခုနှစ်မှာ မိမိရဲ့ ယုံကြည်ချက်ကို တခြားသူတွေကို ငြိမ်သက်အေးချမ်းစွာ ဝေမျှမှုကြောင့် အဖမ်းခံရပြီး ၅ နှစ် ထောင်ဒဏ် စီရင်ခံခဲ့ရတယ်။ ညီအစ်ကို အခါမေဒေါ့ဗ်ရဲ့အမှု ကာဇက်စတန် တရားရုံးအားလုံးမှာ ရှုံးနိမ့်သွားတဲ့အတွက် ညီအစ်ကိုရဲ့ ရှေ့နေတွေက WGAD ထံ တိုင်စာ တင်သွင်းခဲ့တယ်။ ကာဇက်စတန် အစိုးရအာဏာပိုင်တွေရဲ့ လုပ်ရပ်တွေကို ပြစ်တင်ရှုတ်ချထားတဲ့၊ ညီအစ်ကို အခါမေဒေါ့ဗ်ကို လွတ်ပေးဖို့ တောင်းဆိုထားတဲ့ WGAD ရဲ့ သဘောထားကို ၂၀၁၇၊ အောက်တိုဘာ ၂ ရက်နေ့မှာ ထုတ်ပြန်ပေးခဲ့တယ်။ ခြောက်လကြာပြီးနောက် ကာဇက်စတန် သမ္မတက ညီအစ်ကို အခါမေဒေါ့ဗ်ကို အပြစ်မရှိကြောင်း ကြေညာပေးတယ်။ ၂၀၁၈၊ ဧပြီ ၄ ရက်နေ့မှာ ထောင်ကနေ လွှတ်ပေးလိုက်တယ်။

ညီအစ်ကို မီခေးလော့ဗ်ရဲ့ အမှုနဲ့ပတ်သက်ပြီး WGAD ရဲ့ ဆုံးဖြတ်ချက်ကို ရုရှားအာဏာပိုင်တွေ ဘယ်လိုပဲ တုံ့ပြန်ပါစေ ကျွန်တော်တို့ ဒီကတိတော်ကို အပြည့်အဝ ယုံကြည်စိတ်ချကြပါတယ်– “[ယေဟောဝါ] ဘုရားကို ခိုလှုံသူဟာ ပျော်ရွှင်ချမ်းမြေ့တယ်။” ရာဇဝတ်သားတွေအဖြစ် ဆက်ဆံခံနေရတဲ့ ရုရှားနိုင်ငံက ကျွန်တော်တို့ရဲ့ ညီအစ်ကို၊ ညီအစ်မတွေကို ယေဟောဝါ ဆက်ကြည့်ရှုစောင့်ရှောက်ပေးဖို့၊ ဘုရားကို ရဲစွမ်းသတ္တိရှိရှိ ကိုးစားသူတွေ “ကောင်းမွန်ရာတစ်ခုမှ ချို့တဲ့မှာ မဟုတ်ဘူး” ဆိုတာ ဆက်မြင်တွေ့နေရဖို့ ကျွန်တော်တို့ ဆုတောင်းပေးနေကြပါတယ်။—ဆာလံ ၃၄:၈၊ ၁၀။