၂၀၂၀၊ ဒီဇင်ဘာ ၁၇ မှာ a ရော့စတို့ဗ် အော်န်ဒွန်မြို့၊ လီနင်စကီ ခရိုင်တရားရုံးက ညီအစ်ကို ရုစလန် အောလီယေ့ဖ်ရဲ့ အမှုကို စီရင်ချက်ချပါတော့မယ်။ ရုစလန်ကို ဆိုင်းငံ့ထောင်ဒဏ် သုံးနှစ်ချဖို့ အစိုးရရှေ့နေ တောင်းဆိုထားပါတယ်။

ရုစလန် အောလီယေ့ဖ်

• မွေးဖွားတဲ့နှစ်။ ၁၉၈၇ (ကရာနိုရာ့စ်ဒေသ၊ ချွန်နိုရာမြို့)

• ဘဝအတ္ထုပ္ပတ္တိ။ မိသားစုက အဇာဘိုင်ဂျန်နဲ့ ယူကရိန်းမှာ မကြာခဏ ပြောင်းရွှေ့နေထိုင်ကြတယ်။ ဆောက်လုပ်သူ၊ အရောင်း အတိုင်ပင်ခံ၊ ဂီတနည်းပြ၊ အင်္ဂလိပ်နဲ့ တရုတ်သာသာစကား သင်ပေးသူ ဖြစ်တယ်။ အားကစား ဝါသနာပါတယ်။ တေး၊ ကဗျာတွေ ရေးတယ်။ ဘာသာစကား လေးမျိုး တတ်တယ်။ ဇနီး ခရစ်တီနာလည်း တရုတ်စကား တတ်တယ်

  အသက် ၁၃ နှစ်အရွယ်မှာ ကျမ်းစာကို ဖတ်ရှုလေ့လာတယ်။ လေ့လာတာနဲ့အမျှ ကျမ်းစာမှာ ဘဝနဲ့ဆိုင်တဲ့ မေးခွန်းတွေရဲ့ အဖြေ ပါမှန်း သဘောပေါက်လာတယ်။ ဒါကြောင့် ၂၀၀၆ ခုနှစ်မှာ ဆက်ကပ်အပ်နှံပြီး နှစ်ခြင်းခံလိုက်တယ်

၂၀၁၉၊ ဇွန် ၆ ရက်မှာ ညီအစ်ကို ရုစလန် အောလီယေ့ဖ်ကို ရာဇဝတ်မှုနဲ့ စွဲချက်တင်ပြီးတဲ့နောက် ၂၀၁၉၊ ဇွန် ၁၀ ရက်မှာ ဖမ်းချုပ်လိုက်ကြတယ်။ အချုပ်ထဲမှာ ၂၄ နာရီကြာ နေပြီးတဲ့နောက် ညီအစ်ကို ရုစလန်နဲ့ ဆင်မ်ယွန် ဘေးဘက်တို့ကို နေအိမ်အကျယ်ချုပ် ချလိုက်တယ်။ ရုစလန်ရဲ့ အကျယ်ချုပ်ကာလ ရှစ်လဆိုပေမဲ့ အကျယ်ချုပ်သက်တမ်းကို ကိုးကြိမ် ထပ်တိုးကြလို့ ၁၈ လကြာ နေခဲ့ရတယ်။ ရှေ့နေ၊ စစ်ကြောရေးမှူး၊ စစ်ဆေးရေးအရာရှိ၊ ဇနီးတို့ကလွဲလို့ ဘယ်သူနဲ့မှ ဆက်သွယ်ခွင့် မရဘူး။ အင်တာနက် သုံးခွင့်၊ စာပို့ခွင့်၊ စာလက်ခံခွင့် မရဘူး။

ရုစလန် အချုပ်မကျခင်တုန်းက တစ်ချိန်ချိန်မှာ အခုလို နှိပ်စက်ညှဉ်းပန်းခံရနိုင်တဲ့အကြောင်း ဇနီး ခရစ်တီနာနဲ့ ဆွေးနွေးဖူးတယ်။ “ဘုရားရေးရာ လုပ်ရိုးလုပ်စဉ်အတိုင်း ကျွန်တော်တို့ ဆက်လုပ်ဆောင်တယ်။ နှစ်ချုပ်စာအုပ်နဲ့ ညီအစ်ကိုတွေရဲ့ ဘဝအတ္ထုပ္ပတ္တိတွေကနေ နှိပ်စက်ညှဉ်းပန်းခြင်းအကြောင်း ကောင်းကောင်း သိထားတယ်။ သူတို့မှာ ဟာသဉာဉ် ရှိတယ်။ အဆိုးဆုံးအခြေအနေမှာတောင် စိတ်မပျက်ကြဘူး။ ကျွန်တော်တို့လည်း ရှေ့မှာကြုံရမယ့်အရာတွေအတွက် ခွန်အားပေးဖို့ ယေဟောဝါဆီ ဆုတောင်းတယ်” လို့ ရုစလန် ပြောတယ်။

ဖြစ်လာနိုင်တဲ့ အခြေအနေတွေကို တခြားသူနဲ့ ပြောဆိုတာက ရုစလန်အတွက် အကျိုးရှိစေတယ်။ “အသင်းတော်က ကြေညာသူတွေကို စိတ်တည်ငြိမ်စေမယ့်၊ အားရှိစေမယ့်အချက်တွေ ကျမ်းစာမှာ၊ ဆောင်းပါးတွေထဲမှာ ရှာဖွေလေ့လာခဲ့တယ်။ အခုလို ကိုယ်တိုင် နှစ်သိမ့်မှု လိုနေချိန်မှာတော့ အရင်က ရှာဖွေခဲ့တဲ့၊ မှတ်မိနေတဲ့ ကျမ်းချက်တွေ၊ ဆောင်းပါးတွေကြောင့် စိတ်သက်သာရာရတယ်။”

နှိပ်စက်ညှဉ်းပန်းမှုအတွက် ကြိုတင်ပြင်ဆင်ခြင်းကနေ ရုစလန်နဲ့ ခရစ်တီနာတို့ အကျိုးရခဲ့ကြတယ်။ သူတို့အိမ် ဝင်ရောက်ရှာဖွေခံရတဲ့အခါ “ကျွန်တော်တို့ အေးအေးဆေးဆေး တည်တည်ငြိမ်ငြိမ်ပါပဲ” လို့ ရုစလန် ပြောတယ်။ စစ်ကြောမေးမြန်းခံရချိန်မှာလည်း စစ်ကြောမေးမြန်းသူတွေက ခရစ်တီနာကိုပါ ရာဇဝတ်မှုနဲ့ တရားစွဲမယ်လို့ ခြိမ်းခြောက်တယ်။ “ရာဇဝတ်မှုနဲ့ တရားစွဲခံရနိုင်တယ်ဆိုလို့ ခရစ်တီနာ လန့်ဖျပ်မသွားဘူး။ ဒါကိုကြည့်ပြီး ကျွန်တော်လည်း အားရှိသွားတယ်” လို့ ရုစလန် ပြောတယ်။

ရုစလန်ရဲ့ နေအိမ်အကျယ်ချုပ်ဘဝဟာ အတော် ခက်ခဲပါတယ်။ ဒါပေမဲ့ “ကျွန်တော်တို့ရဲ့ ကာယပိုင်း၊ စိတ်ပိုင်း၊ ဘုရားရေးရာပိုင်းမှာ လိုအပ်ရာမှန်သမျှ ယေဟောဝါ ဖြည့်ဆည်းပေးတယ်။ ဘာမှ မလိုတော့ပါဘူး။ ကျွန်တော်တို့ ဘုရားကို အမြဲ အားကိုးတယ်။ ပြီးတော့ ရိုးရှင်းတဲ့ဘဝမှာ နေသားကျနေပြီ။ ဒါကြောင့် မလိုအပ်ဘဲ အစိုးရိမ်လွန်မနေတော့ဘူး” လို့ ရုစလန် ပြောတယ်။

နေအိမ်အကျယ်ချုပ်ကာလ တိုးမြှင့်လိုက်တဲ့ အမှုကြားနာစစ်ဆေးခြင်းမှာ လာရောက်အားပေးသူတွေ တရားရုံးထဲ ဝင်ခွင့်မရဘူး။ ဒါပေမဲ့ ညီအစ်ကို/မတွေဟာ တရားရုံးအပြင်ဘက်မှာ စုဝေးပြီး သူ ထွက်လာတဲ့အခါ ‘ညီအစ်ကို ရုစလန်၊ ခင်ဗျားနဲ့အတူ ကျွန်တော်တို့ ရှိတယ်’ ဆိုပြီး လက်ခုပ်တီး အားပေးကြတယ်။

ရုရှားက ညီအစ်ကို/မတွေရဲ့ စံနမူနာကောင်းကို ကျွန်တော်တို့ အလွန် ကျေးဇူးတင်လေးမြတ်ပါတယ်။ သူတို့ဟာ အကြောင်းမဲ့ နှိပ်စက်ခံရပေမဲ့လည်း ယေဟောဝါကို အကြွင်းမဲ့ ယုံကြည်ကိုးစားနေကြတယ်။—ဆာလံ ၁၁၈:၆-၉။