အီရီနာ လော့ဗစ်ချ်ကီ

• မွေးဖွားတဲ့နှစ်။ ၁၉၆၂ (အိုင်ဗီရ်ကဗွိုက်)

• ဘဝအတ္ထုပ္ပတ္တိ။ အသက်ခြောက်နှစ်အရွယ်မှာ ဖခင် ဆုံးသွားတယ်။ ကလေးဘဝတုန်းက ပြဇာတ်ကတာ၊ ဇာထိုးတာ၊ ဘတ်စကတ်ဘောနဲ့ ဘော်လီဘော ကစားရတာ နှစ်သက်တယ်

  ကျမ်းစာမှာ ပါတဲ့ ရှင်ပြန်ထမြောက်ခြင်း မျှော်လင့်ချက်ကြောင့် စိတ်ထိမိသွားတယ်။ ၁၉၉၃ မှာ ယေဟောဝါသက်သေအဖြစ် နှစ်ခြင်းခံတယ်။ နှစ်ခြင်းခံပြီး ခုနစ်လအကြာမှာ ခင်ပွန်းဖြစ်သူ ဆုံးသွားလို့ ခုနစ်နှစ်အရွယ် သားလေး အာတာကို တစ်ယောက်တည်း စောင့်ရှောက်ခဲ့ရတယ်

၂၀၂၀၊ ဖေဖော်ဝါရီ ၆၊ ဘိုင်ရိုဘစ်ဇန်မှာ ရုရှား အာဏာပိုင်တွေက ညီအစ်မ ခြောက်ယောက်ကို “အစွန်းရောက်” အဖြစ် တရားစွဲတယ်။ အဲဒီထဲမှာ ညီအစ်မ အီရီနာ လော့ဗစ်ချ်ကီလည်း ပါဝင်တယ်။ အဲဒီဒေသမှာ ရှိတဲ့ ယေဟောဝါသက်သေ ၂၂ ယောက်ကို အမှုပေါင်း ၁၉ ခုနဲ့ တရားစွဲထားပြီး အီရီနာရဲ့ သား အာတာနဲ့ ဇနီး အန်နာလည်း ပါဝင်တယ်။

တရားရုံးက အီရီနာရဲ့ အမှုကို တံခါးပိတ် စစ်ဆေးပြီး သတင်းသမားတွေနဲ့ မိသားစုဝင်တွေကို တက်ရောက်ခွင့် မပေးဘူး။ အမှုကို လူအများရှေ့မှာ ရုံးတင်စစ်ဆေးဖို့၊ အမှုကို အစိုးရ ရှေ့နေတွေ လက်ထဲ ပြန်အပ်ဖို့ အီရီနာ တောင်းဆိုပေမဲ့ ငြင်းပယ်ခံရတယ်။

အီရီနာဟာ လက်ရှိ ရင်ဆိုင်နေရတဲ့ ခက်ခဲတဲ့ အခြေအနေတွေကြောင့် ရုပ်ပိုင်းနဲ့ စိတ်ပိုင်း ကျန်းမာရေး ပြဿနာတွေ ခံစားနေရတယ်။ ဒါပေမဲ့ ဘုရားရေးရာ လုပ်ရိုးလုပ်စဉ်တွေက ခံနိုင်ရည် ရှိဖို့ ကူညီပေးတယ်။ “အကျင့်ကောင်းတွေ မွေးမြူနိုင်ဖို့ ယေဟောဝါဘုရား ကျွန်မကို ကူညီပေးတယ်။ ကျွန်မ ကျမ်းစာဖတ်တဲ့အခါ ဖတ်ရုံ ဖတ်တာမျိုး မဟုတ်ဘဲ နားလည်ဖို့ သေသေချာချာ ရှာဖွေလေ့လာတယ်” လို့ ပြောတယ်။ စိုးရိမ်စိတ်တွေကြောင့် ဘုရားရေးရာ လုပ်ရိုးလုပ်စဉ်တွေကို ထိခိုက်လာတဲ့အခါ ဘုရားဆီ အကူအညီတောင်းတယ်။ “အရင်က ချမှတ်ထားတဲ့ ပန်းတိုင်တွေအတိုင်း ပုံမှန် ပြန်လုပ်ဆောင်နိုင်အောင် ကူညီပေးဖို့ ဘုရားဆီ ထက်ထက်သန်သန် ဆုတောင်းတယ်။ ကိုယ့်အတွက်လောက်သာ မဟုတ်ဘဲ တခြားသူတွေအတွက်ပါ ထည့်စဉ်းစားဖို့ ကျွန်မကို ယေဟောဝါ သင်ပေးတယ်” လို့ အီရီနာ ပြောတယ်။

ကိုယ့်ထက် ပိုပြီး အားပေးထောက်မမှု လိုအပ်သူတွေကို အီရီနာ အာရုံစိုက်တယ်။ အဲဒီထဲမှာ စိတ်ဝင်စားသူတွေရော ညီအစ်ကို/မတွေပါ ပါဝင်တယ်။ “တခြားသူတွေအတွက် စဉ်းစားပေးတဲ့အခါ ကိုယ့်ကိုယ်ကိုယ် သနားနေတာမျိုး၊ အလွန်အမင်း စိုးရိမ်နေတာမျိုး ဖြစ်ဖို့ အချိန်မရှိတော့ဘူး” လို့ ပြောတယ်။

အသင်းတော်နဲ့ အထူးသဖြင့် အကြီးအကဲတွေက အီရီနာကို အားပေးကြတယ်။ “ကိုယ်တိုင် နှိပ်စက်ညှဉ်းပန်းမှုတွေ ရင်ဆိုင်နေရချိန်မှာတောင် အကြီးအကဲတွေက ကျွန်မကို နှစ်သိမ့်ပေးတယ်။ ခွန်အားဖြစ်စေမယ့် စကားတွေ ပြောတယ်။ ကျွန်မ လိုအပ်တဲ့ အချိန်တိုင်းမှာ အမြဲ အသင့်ရှိနေကြတယ်။ ဒါတွေအတွက် တကယ် ကျေးဇူးတင်ပါတယ်” လို့ အီရီနာ ပြောတယ်။

ဒီစမ်းသပ်မှုကို ဆက်ခံရပ်နေစဉ်အတွင်း အီရီနာ လိုအပ်တဲ့ ထောက်မမှုတွေကို ယေဟောဝါ ပြင်ဆင်ပေးမယ်ဆိုတာ သူ့လိုပဲ ကျွန်တော်တို့ အပြည့်အဝ ယုံကြည်ပါတယ်။ “နှိပ်စက်ညှဉ်းပန်းမှုတွေအကြောင်း ဖတ်တဲ့အခါ ငါသာဆိုရင် ဒီလိုအခြေအနေကို ဘယ်လို ကိုင်တွယ်မလဲ၊ ဘုရားကို အားကိုးမလား ဆိုတာ အမြဲ သိချင်ခဲ့တာ။ အခုတော့ ကျွန်မ သိသွားပြီ။ ဘုရားရဲ့ အကူအညီနဲ့ ဘုရားကို မှီခိုအားကိုးသွားမှာပါ။ တခြားသစ္စာရှိ ကျေးကျွန်တွေလိုပဲ ကျွန်မ မားမားမတ်မတ် ရပ်တည်မယ်။ ယေဟောဝါလည်း ကျွန်မကို ညာလက်နဲ့ မြဲမြဲ ကိုင်ထားမယ်” လို့ အီရီနာ ပြောတယ်။—ဟေရှာယ ၄၁:၁၀။