နယူးယောက်-၂၀၁၇၊ ဧပြီလ ၁၉ ရက် ဗုဒ္ဓဟူး​နေ့မှာ တရားရေး​ဝန်ကြီးဌာန​က ယေဟောဝါသက်သေတွေရဲ့ လုပ်ဆောင်မှုကို ပိတ်ပင်​ဖို့ ကြိုးစားတာ​နဲ့ ပတ်သက်ပြီး ရုရှား​ဖယ်​ဒ​ရေး​ရှင်း တရားရုံးချုပ်​မှာ ၅ ရက်​မြောက်​နေ့ ဆက်လက်​ကြားနာ​ခဲ့​ပါတယ်။ ကြားနာ​မှု​ကို နားထောင်ဖို့ လူ ၃၀၀ လောက် (တစ်ချို့​က မနက် ၂:၀၀ နာရီ​ခန့်​ကတည်းက) ရောက်​နေကြတယ်။ လွန်ခဲ့တဲ့ ဆယ်စုနှစ်​အတွင်း ယေဟောဝါသက်သေတွေ​အပေါ် ရုရှား​အာဏာပိုင်တွေ​ရဲ့ ကြမ်းတမ်း​စွာ လုပ်ဆောင်မှုတွေ​နဲ့ ပတ်သက်တဲ့ အတွဲ ၄၃ တွဲ​ပါ စာရွက်​စာတမ်း​တွေကို တရားရုံး​က ပြန်လည်​သုံးသပ်​ခဲ့တယ်။

အဲဒီလို​ပြန်​သုံးသပ်​ချိန်မှာ တရားရေး​ဝန်ကြီးဌာန​ကို ကိုယ်စား​ပြုတဲ့ ရှေ့နေ​တွေ​က ယေဟောဝါသက်သေတွေရဲ့ စီမံခန့်ခွဲရေး​ဌာန​ကို ပိတ်ပစ်​ဖို့နဲ့ ယေဟောဝါ​သက်သေ စီမံခန့်ခွဲရေး​ဌာန​ဖြစ်စေ၊ ရုရှား​မှာ​ရှိတဲ့ ယေဟောဝါသက်သေတွေ အသုံးပြုတဲ့ ဒေသခံ​ဘာသာရေး​အဖွဲ့​ဖြစ်စေ အစွန်းရောက်​လုပ်ဆောင်မှုတွေမှာ ပါဝင်တာ​ကို ဥပဒေ​အရ ခိုင်လုံတဲ့​အထောက်အထား တစ်ခု​မှ မပြ​နိုင်​ခဲ့​ပါဘူး။ ယေဟောဝါသက်သေတွေရဲ့ စီမံခန့်ခွဲရေး​ဌာန​အတွက် ရှေ့နေ​တွေ​ထဲ​က တစ်ယောက်​ဖြစ်သူ ယူ​ရီ တို​ပို​ရော့ဖ်​က တရားရုံး​ကို စာရွက်စာတမ်းတွေ တင်ပြခဲ့တယ်။ အဲဒီ​စာရွက်စာတမ်းတွေ​ထဲမှာ ယေဟောဝါသက်သေတွေရဲ့ စီမံခန့်ခွဲရေး​ဌာန​ရဲ့ လုပ်ရပ်​ကောင်း​တွေ​အတွက် နှစ်တွေ​တစ်လျှောက် ရုရှား​အာဏာပိုင်တွေ အသိအမှတ်ပြု ကျေးဇူးတင်တဲ့​စာတွေ​နဲ့ ဆုတံဆိပ်​တွေ ပါတယ်။ ဒေသခံ​ဘာသာရေး​အဖွဲ့​တွေ (LROs) ပြုလုပ်​ခဲ့​တဲ့ ရပ်ကွက်​အတွက် အကျိုးဆောင်​မှု​တွေကို​လည်း ထောက်ပြခဲ့တယ်။ ဒါ့အပြင် ၂၀၀၈ ခုနှစ်​ကတည်းက ရုရှား​မှာ​ရှိတဲ့ ယေဟောဝါသက်သေတွေရဲ့ ဒေသခံ​ဘာသာရေး​အဖွဲ့​တွေ (LROs) ကို အစွန်းရောက်​လုပ်ရပ်တွေ​မှာ ပါ​မပါ တရားရေး​ဝန်ကြီးဌာန​က စုံစမ်း​စစ်ဆေး​ခဲ့​တာ ဘာ​အထောက်အထား​မှ မ​တွေ့ရှိ​ခဲ့​တဲ့​အကြောင်းကိုလည်း အမှုတွဲ​အတော်များများ​နဲ့ တင်ပြခဲ့တယ်။ အဲဒါကို တရားရေး​ဝန်ကြီးဌာနရဲ့ ရှေ့နေ​တွေ​လည်း အသိအမှတ်ပြု ဝန်ခံခဲ့​ကြပါတယ်။

တရားရုံး​က ဒီ​ကြားနာ​မှု​ကို ၂၀၁၇ ဧပြီ ၂၀ ရက် မွန်းလွဲ ၂:၀၀ နာရီ မှာ ပြန်လည်​သုံးသပ်​မယ်​လို့ မျှော်လင့်​ပါတယ်။

သတင်း​အချက်အလက် ဆက်သွယ်​ရန်-

နိုင်ငံတကာ- David A. Semonian, Office of Public Information, +1-845-524-3000

ရုရှား- Yaroslav Sivulskiy, +7-911-087-8009