မေ ၁၀၊ ၂၀၁၈
ရုရှား
ဒဲနစ္စ ခရစ်တန်ဆန်ရဲ့အမှု ပထမအကြိမ် သက်သေထွက်ဆိုချက်ကို အိုရွိုလ်တရားရုံး ကြားနာ
၂၀၁၈၊ ဧပြီ ၂၃ ရက်နေ့မှာ ဒဲနစ္စ ခရစ်တန်ဆန်ရဲ့ အမှုကို အိုရွိုလ်မြို့၊ ရှလက်ဇနာ ဒရော်ဇက်ဇနီ ခရိုင်တရားရုံးမှာ ပြန်စစ်ဆေးပါတယ်။ ဒိန်းမတ်နိုင်ငံသား၊ ယေဟောဝါသက်သေ မစ္စတာ ခရစ်တန်ဆန်ဟာ ၂၀၁၇၊ မေလ၊ ဘာသာရေးအစည်းအဝေးမှာ အဖမ်းခံရချိန်ကတည်းက စုံစမ်းစစ်ဆေးခြင်း မရှိဘဲ ချုပ်နှောင်ခံထားရတယ်။
မစ္စတာ ခရစ်တန်ဆန်ကို ‘အစွန်းရောက်အဖွဲ့အစည်းရဲ့ လုပ်ငန်း စီမံဆောင်ရွက်ပေးမှု’ နဲ့ အစိုးရရှေ့နေ မစ္စတာ ဖိုမင်က တရားစွဲထားပါတယ်။ အစွန်းရောက်အဖွဲ့အစည်းဆိုတာ ၂၀၁၆၊ ဇွန်လမှာ ဖျက်သိမ်းထားတဲ့၊ အိုရွိုလ်မြို့ရှိ ယေဟောဝါသက်သေများရဲ့ ဒေသန္တရ ဘာသာရေးအဖွဲ့အစည်း (LRO) ကို ဆိုလိုတယ်။ မစ္စတာ ခရစ်တန်ဆန်ရဲ့ ရှေ့နေတွေက အိုရွိုလ်မြို့၊ ယေဟောဝါသက်သေ အသင်းတော်ဟာ အသင်းအဖွဲ့အနေနဲ့ မဟုတ်ဘဲ အုပ်စုအနေနဲ့ ကျမ်းစာလေ့လာဖို့ ငြိမ်သက်အေးချမ်းစွာ စုဝေးခြင်းသာဖြစ်ကြောင်း ချေပခဲ့ကြတယ်။ ရုရှားအစိုးရက ယေဟောဝါသက်သေ ဘာသာရေးကို ပိတ်ပင်ခြင်း မဟုတ်ကြောင်း၊ ရုရှား ဖွဲ့စည်းပုံအခြေခံဥပဒေမှာ လူတစ်ယောက်ရဲ့ ဘာသာရေး ယုံကြည်ချက်ကို လေးစားပါမယ် aလို့ ပါရှိကြောင်း၊ ဒါကြောင့် မစ္စတာ ခရစ္စတန်ဆန် ဝတ်ပြုစည်းဝေးမှာ ပါဝင်နေတာက ယုံကြည်ချက်ကို ကျင့်သုံးခြင်းသာဖြစ်ကြောင်း ရှေ့နေတွေက အလေးအနက် ဖော်ပြခဲ့ကြတယ်။
သက်သေထွက်ဆိုချက်ကို ၂၀၁၈၊ ဧပြီ ၂၄ ရက်နေ့မှာ စတင်ကြားနာတယ်။ အစိုးရရှေ့နေက ဖယ်ဒရယ် လုံခြုံရေးဌာန ကိုယ်စားလှယ်တစ်ယောက်ကို ဦးဆုံး မေးမြန်းတယ်။ ၂၀၁၇ ခုနှစ်၊ အိုရွိုလ်မြို့ ဝတ်ပြုရာခန်းမကို ဝင်စီးချိန် ဗီဒီယို မှတ်တမ်းအကြောင်း ထွက်ဆိုတယ်။ ဗီဒီယိုမှတ်တမ်းမှာ အဆောက်အအုံထဲ ဝင်လာသူတွေကို မစ္စတာ ခရစ်တန်ဆန် ကြိုဆိုပုံကိုပဲ မှတ်တမ်းတင်ထားတဲ့အတွက် အဆောက်အအုံအတွင်း ဖြစ်ရပ်ကို မဖော်ပြနိုင်ခဲ့ဘူး။ ဒါကြောင့် အိုရွိုလ်မြို့ ယေဟောဝါသက်သေတွေရဲ့ အစည်းအဝေးတွေကို တက်ရောက်သူ ဒေသခံ အမျိုးသမီးတစ်ယောက်ကို အစိုးရရှေ့နေက မေးမြန်းခဲ့တယ်။ ဒါပေမဲ့ အိုရွိုလ်မြို့ LRO ကို မဖျက်သိမ်းခင်က အစည်းအဝေးတွေကို တက်ရောက်ခဲ့တာဖြစ်လို့ မစ္စတာ ခရစ်တန်ဆန်ရဲ့ လုပ်ဆောင်မှုတွေကို မပြောပြနိုင်ခဲ့ဘူး။
အီရီနာ ခရစ်တန်ဆန်
နောက်နေ့မှာ အစိုးရရှေ့နေက အသက် ၇၈ နှစ်အရွယ် ယေဟောဝါသက်သေ အမျိုးသမီးကို မေးမြန်းခဲ့တယ်။ ပြစ်မှုမြောက်တဲ့ “အထောက်အထား” ရှာတွေ့ဖို့ အစိုးရရှေ့နေက နှစ်နာရီခွဲကြာ စစ်ဆေးမေးမြန်းခဲ့ပေမဲ့ ယေဟောဝါသက်သေတွေမှာ ဒါရိုက်တာတွေ၊ ခေါင်းဆောင်တွေ မရှိကြောင်း၊ အစည်းအဝေးတွေမှာ ရုရှားအစိုးရ ပိတ်ပင်ထားတဲ့ ဘာသာရေးစာပေတွေကို တစ်ခါမှ အသုံးမပြုခဲ့ကြောင်းသာ ထွက်ဆိုခဲ့တယ်။
၂၀၁၈၊ မေ ၁၄ ရက်နေ့မှာ ပြန်လည်ကြားနာပြီး မေလအတွင်း ရက်ဆက် ကြားနာသွားပါမယ်။ မစ္စတာ ခရစ်တန်ဆန်ကို အပြစ်ရှိတယ်လို့ စီရင်ချက်ချရင် ထောင်ဒဏ် ၆ နှစ်ကနေ ၁၀ နှစ်အထိ ကျခံနိုင်ပါတယ်။ ဒါကြောင့် ကမ္ဘာတစ်ဝန်းက ယေဟောဝါသက်သေတွေဟာ မစ္စတာ ခရစ်တန်ဆန်နဲ့ ဇနီး အီရီနာအတွက် စိတ်ပူနေကြပါတယ်။
a အိုရွိုလ်မြို့၊ ယေဟောဝါသက်သေများရဲ့ LRO ကို ပိတ်ပင်တဲ့ ဆုံးဖြတ်ချက် အတည်ပြုချိန်မှာ တရားရုံးချုပ်က ဒီလို ဖော်ပြခဲ့တယ်– “အစွန်းရောက် ဘာသာရေးစာပေတွေ ဖြန့်ဝေတာ မဟုတ်ရင် လွတ်လပ်စွာ ဝတ်ပြုစည်းဝေးပိုင်ခွင့် ရှိလို့ အသင်းသားတွေရဲ့ ဘာသာရေး ရွေးချယ်ပိုင်ခွင့် ချိုးဖောက်မခံရပါ။”