၂၀၁၇၊ နိုဝင်ဘာ ၂၀ ရက်နေ့မှာ ရုရှားနိုင်ငံ၊ ဆိုဗက်စကီး အိုရွိုလ် ခရိုင်တရားရုံးက သုံးနာရီကြာ ကြားနာစစ်ဆေးမှု လုပ်ပြီးနောက် ဒဲနစ္စ ခရစ်တန်ဆန်ကို ၂၀၁၈၊ ဖေဖော်ဝါရီ ၂၃ ရက်နေ့အထိ ဆက်ပြီး အချုပ်ချလိုက်ပါတယ်။ မစ္စတာ ခရစ်တန်ဆန်ကို နောက်ထပ် သုံးလ အချုပ်ချတာဟာ ဒီတစ်ခါနဲ့ဆိုရင် နှစ်ကြိမ်ရှိပါပြီ။ အိုရွိုလ်မြို့မှာ ငြိမ်သက်အေးချမ်းစွာ ဝတ်ပြုစည်းဝေးနေတဲ့ ဘာသာရေး အစည်းအဝေးတစ်ခုကို ရဲတွေ ဝင်ရောက်စီးနင်းပြီး မစ္စတာ ခရစ်တန်ဆန်ကို ဖမ်းဆီးခဲ့တာဖြစ်တယ်။ အဖမ်းခံရတဲ့ ၂၀၁၇၊ မေလကတည်းက စုံစမ်းမေးမြန်းခြင်း မရှိဘဲ ချုပ်နှောင်ထားကြတယ်။

မစ္စတာ ခရစ်တန်ဆန်ဟာ ဒိန်းမတ်နိုင်ငံသား ယေဟောဝါသက်သေတစ်ယောက်ပါ။ သူ့ကို မဖမ်းချုပ်ခင် ရုရှားတရားရုံးချုပ်က ယေဟောဝါသက်သေတွေရဲ့ ဘာသာရေး လုပ်ဆောင်မှုတွေဟာ အစွန်းရောက်တယ်ဆိုပြီး ပိတ်ပင်ခဲ့တယ်။ ခရိုင်တရားရုံးက သူ့ကို ချုပ်ထားဖို့ ရက်တိုးလိုက်တာက တရားမဝင် ဘာသာရေးလုပ်ဆောင်မှုတွေ လုပ်နေကြောင်း “သက်သေအထောက်အထား” စုဆောင်းနိုင်အောင် အမှုလိုက်ရှေ့နေတွေ အခွင့်အရေး ရစေဖို့ ဖြစ်တယ်။ အမှုရင်ဆိုင်ချိန်အတွင်း သူ့အိမ်မှာ အကျယ်ချုပ်ထားဖို့ တရားရုံးက ခွင့်မပြုတဲ့အပြင် မစ္စတာ ခရစ်တန်ဆန်ကို နိုင်ငံကူးလက်မှတ် ထုတ်မပေးပါဘူး၊ နိုင်ငံက ထွက်ခွာသွားအောင် မကူညီပါဘူးလို့ ဒိန်းမတ်အစိုးရ အာမခံတာကိုလည်း လက်မခံဘူး။

မစ္စတာ ခရစ်တန်ဆန်ဟာ ရုရှားနိုင်ငံသူ ဇနီးနဲ့အတူ လွတ်လပ်စွာ ဝတ်ပြုကိုးကွယ်၊ စုဝေးခွင့်ဆိုတဲ့ အခြေခံလူ့အခွင့်အရေးအတိုင်း လုပ်ဆောင်နေတုန်း အဖမ်းခံရတာဖြစ်တယ်။ တရားရုံးက အမှုမစစ်ခင် နှစ်နှစ်ကြာတဲ့အထိ သူ့ကို ဥပဒေအရ ချုပ်ထားနိုင်တယ်။ အမှုစစ်ပြီးတဲ့အခါ ပြစ်ဒဏ်ချခဲ့ရင် ခြောက်နှစ်ကနေ ဆယ်နှစ်အထိ ထောင်ဒဏ်ချနိုင်တယ်။