၂၀၂၁၊ ဖေဖော်ဝါရီ ၂ a မှာ ဂျူးကိုယ်ပိုင်အုပ်ချုပ်ခွင့်ရဒေသ ဘိုင်ရိုဘစ်ဇန် ခရိုင် တရားရုံးက ညီအစ်ကို အာတာ လော့ဗစ်ချ်ကီရဲ့ အမှုကို စီရင်ချက်ချမယ်။ ထောင်ဒဏ် လေးနှစ် ချမှတ်ခံရနိုင်ဖွယ် ရှိတယ်။

အာတာ လော့ဗစ်ချ်ကီ

• မွေးဖွားတဲ့နှစ်– ၁၉၈၆ (ဂျူးကိုယ်ပိုင်အုပ်ချုပ်ခွင့်ရဒေသ ဘယ်ဂိုရော့စကိုယီမြို့)

• ဘဝအတ္ထုပ္ပတ္တိ– အာတာ ခုနစ်နှစ်အရွယ်မှာ ဖခင် ဆုံးပါးသွားတယ်။ မီးဘေး ကာကွယ်ရေးဆိုင်ရာ လျှပ်စစ်ပညာရှင်အဖြစ် အာတာ အလုပ်လုပ်တယ်။ အလုပ်ကြိုးစားလို့ ဆုတွေ ရဖူးတယ်

  အာတာ ငယ်စဉ်ကတည်းက ယေဟောဝါကို ချစ်တတ်အောင် အမေဖြစ်သူ ကူညီပေးတယ်။ ၁၉၉၈၊ အသက် ၁၁ နှစ်မှာ ယေဟောဝါသက်သေအဖြစ် နှစ်ခြင်းခံတယ်။ ၂၀၁၈ မှာ အန်နာနဲ့ လက်ထပ်တယ်။ ခရီးထွက်ရတာ၊ အပြင် အတူသွားရတာ နှစ်သက်ကြတယ်

အာတာနဲ့ အန်နာ လက်ထပ်ပြီး သုံးလအကြာ ၂၀၁၈၊ မေလမှာ အရာရှိတွေက သူတို့အိမ်ထဲ ဝင်ရှာကြတယ်။ “တရားစီရင်ရာနေ့” လို့ လျှို့ဝှက်နာမည် ပေးထားတဲ့ အဲဒီစစ်ဆင်ရေးမှာ လုံခြုံရေး အရာရှိ ၁၅၀ က ယေဟောဝါသက်သေတွေရဲ့ အိမ် ၂၂လုံးကို ဝင်ရောက်ရှာဖွေခဲ့ကြတယ်။ အာတာရဲ့ မိခင် အီရီနာရဲ့ အိမ်ကိုလည်း ဝင်ရှာကြတယ်။ ၂၀၁၉၊ ဇူလိုင် ၃၁ မှာ ဘိုင်ရိုဘစ်ဇန်မြို့က ဖယ်ဒရယ် လုံခြုံရေးဌာန (FSB) ရဲအရာရှိတွေဟာ အာတာကို အစွန်းရောက် လုပ်ရပ်မှာ ပါဝင်တယ်လို့ အမည်တပ်ပြီး ရာဇဝတ်မှုနဲ့ တရားစွဲတယ်။ အန်နာနဲ့ အီရီနာကိုလည်း ရာဇဝတ်မှုနဲ့ သပ်သပ်စီ အမှုဖွင့်တယ်။

ဒီမိသားစုဟာ စွဲဆိုခံရတဲ့ ရာဇဝတ်မှုတွေကြောင့် တော်တော် ငွေကြေးအခက်အခဲ ရင်ဆိုင်ရတယ်။ အာတာရဲ့ ဘဏ်အကောင့်ကိုလည်း အာဏာပိုင်တွေ ပိတ်ထားတယ်။ အလုပ်ရှင်ကလည်း အလုပ်ထုတ်ပစ်မယ်လို့ ခြိမ်းခြောက်တယ်။

ရာဇဝတ်မှု စစ်ဆေးမေးမြန်းတာတွေကြောင့် မိသားစုရဲ့ နေ့စဉ်လုပ်ငန်းဆောင်တာတွေ တော်တော် ထိခိုက်တယ်။ “ပုံမှန် ဘဝပုံစံ လုံးဝ ပြောင်းလဲသွားတယ်။ တစ်ပတ်တာ၊ တစ်နေ့တာကိုတောင် စီစဉ်ဖို့ တော်တော် ခက်လာတယ်။ [ရဲတွေက] သူတို့ ကြိုက်တဲ့အချိန် ခေါ်ကြလို့ ကိုယ့်အချိန်ဇယားကို အမြဲ ပြောင်းခဲ့ရတယ်” လို့ အာတာ ပြောတယ်။

ယုံကြည်သူချင်းတွေရဲ့ ထောက်မမှုကို အာတာနဲ့ အန်နာ သိပ်ကျေးဇူးတင်တယ်။ “စိတ်ပိုင်းရော၊ ဘုရားရေးရာပိုင်းပါ ညီအစ်ကိုတွေ သိပ်ထောက်မပေးတယ်။ . . . ယေဟောဝါရဲ့ လူမျိုးအဝင် ဖြစ်ရလို့၊ ဒီအမှု ကြားနာချိန်တွေမှာ ယေဟောဝါရဲ့ နာမည်ကို ခုခံကာကွယ်ခွင့် ရလို့ ဘယ်လောက် ဝမ်းသာပီတိ ဖြစ်ရတယ်ဆိုတာ စကားလုံးနဲ့ ပြောမပြတတ်အောင်ပါပဲ။ မိမိလူမျိုးကို ယေဟောဝါ ဘယ်တော့မှ မစွန့်တာ သိပ်ထင်ရှားတယ်” လို့ အာတာ ပြောတယ်။

ပုံမှန် ဘုရားရေးရာ လုပ်ဆောင်မှုတွေ ဆက်လုပ်နေတာကနေလည်း အာတာတို့ မိသားစု ခွန်အားနဲ့ သတ္တိ ရတယ်။ အမြဲတော့ မလွယ်ဘူး။ “တရားစီရင်ရာနေ့” စစ်ဆင်ရေး ပြီးပြီးချင်းမှာပဲ “ကျမ်းစာ၊ ကျမ်းစာ စာပေ ဘာတစ်ခုမှ မရှိတော့ဘူး” လို့ အာတာ ပြောတယ်။ ပထမတော့ ဘုရားရေးရာ လုပ်ဆောင်မှုတွေ ဘယ်လို ဆက်လုပ်ရမလဲဆိုပြီး စိတ်ပူမိတယ်။ ဒါပေမဲ့ “ဆုတောင်းတာကိုတော့ ရဲတွေ မတားနိုင်ဘူး။ ဒါကြောင့် ချက်ချင်း ဆုတောင်းလိုက်တယ်။ ဆုတောင်းတာက သိပ်ကူညီပေးတယ်” လို့ အာတာ ပြောတယ်။

သူတို့ရဲ့ ဆုတောင်းချက်တွေကို ယေဟောဝါ ချက်ချင်း ဖြေပေးတယ်။ ဘုရားရေးရာ လုပ်ဆောင်မှုတွေမှာ ဆက်ပါဝင်နိုင်အောင် လိုအပ်တဲ့ ကျမ်းစာ အကြောင်းအရာတွေ ပြင်ဆင်ပေးတယ်။ “မိသားစု ဝတ်ပြုမှု လုပ်တာ၊ အစည်းအဝေးအတွက် ပြင်ဆင်တာ၊ မိသားစုလိုက် ကျမ်းစာ ဖတ်တာတွေကို အတတ်နိုင်ဆုံး ပုံမှန် လုပ်ကြတယ်။ ဒါက အချင်းချင်းကို ပိုရင်းနှီးစေသလို ဘဝမှာ ဘုရားလက်တော်ကို မြင်ဖို့၊ အပြုသဘောထား ဆက်ရှိနေဖို့ ကူညီပေးတယ်” လို့ အာတာ ပြောတယ်။

ကျမ်းစာ ဖတ်ရှုလေ့လာတဲ့အပြင် အနာဂတ် ကောင်းချီးတွေကို စဉ်းစားခြင်းကနေလည်း သူတို့ အကျိုးရတယ်။ “အနာဂတ် မျှော်လင့်ချက်အကြောင်း ပိုစဉ်းစားတယ်။ ကိုယ့်ကိုယ်ကိုယ် ကမ္ဘာသစ်မှာ မြင်ယောင်ကြည့်တယ်။ ကမ္ဘာကို သန့်ရှင်းရေး လုပ်တာနဲ့ ဆောက်လုပ်ရေး လုပ်ငန်းတွေမှာ ပါဝင်ချင်တယ်။ ဒါက ကျွန်တော်တို့အတွက် တွန်းအားပဲ။ တကယ် အားရှိစေတယ်” လို့ အာတာ ပြောတယ်။

“ယေဟောဝါဟာ ကူညီမစရှင် ဖြစ်တဲ့အတွက် ငါ ဘာကိုမှ မကြောက်ဘူး။ လူက ငါ့ကို ဘာလုပ်နိုင်မှာလဲ” ဆိုတဲ့ ဟီဘရူး ၁၃:၆ ကို အာတာနဲ့ အန်နာ အမြဲ တွေးတောဆင်ခြင်တယ်။ “လွတ်လပ်ခွင့်၊ အစည်းအဝေး တက်ခွင့်၊ အချင်းချင်း တွေ့ဆုံခွင့်တွေ ရုပ်သိမ်းခံရရင်တောင် ကျွန်တော်တို့ တကယ် တန်ဖိုးထားတဲ့ ယေဟောဝါနဲ့ ရင်းနှီးတဲ့ ဆက်ဆံရေး၊ ဆုတောင်းခြင်း၊ အနာဂတ် မျှော်လင့်ချက်တွေကိုတော့ သူတို့ ဘယ်တော့မှ မရုပ်သိမ်းနိုင်ဘူးဆိုတဲ့ အချက်ကို အာရုံစိုက်တယ်” လို့ အာတာ ပြောတယ်။