၂၀၂၀၊ ဒီဇင်ဘာ ၁၇ မှာ ရော့စတို့ဗ် အော်န်ဒွန်မြို့၊ လီနင်စကီ ခရိုင်တရားရုံးက ညီအစ်ကို ရုစလန် အောလီယေ့ဖ်ကို ဆိုင်းငံ့ထောင်ဒဏ် နှစ်နှစ်ခွဲ စီရင်ချက် ချလိုက်ပါတယ်။ အခုတစ်ကြိမ်မှာ သူ ထောင်ထဲ ဝင်စရာ မလိုဘူး။

စီရင်ချက် စောင့်နေချိန်အတွင်း ရုစလန်မှာ ဘုရား ပေးတဲ့ “ငြိမ်သက်ခြင်း” ရှိနေပါတယ်။ (ဖိလိပ္ပိ ၄:၇) “ရာဇဝတ်မှုနဲ့ တရားစွဲဆိုခံရတဲ့အတွက် သိပ်စိတ်မပူပါဘူး။ ဘုရား ခွင့်ပြုထားတဲ့အရာမှန်သမျှ ဘုရား ထိန်းချုပ်ထားနိုင်တယ်။ အချိန်ကိုက် ကူညီနိုင်တယ်။ ကျွန်တော် ဘယ်မှာပဲ ရှိနေပါစေ ယေဟောဝါကိုပဲ ကိုးကွယ်မယ်” လို့ မိတ်ဆွေတွေကို ပြောတယ်။ ဆက်ခံရပ်နိုင်အောင် ကမ္ဘာတစ်ဝန်းမှာ ရှိတဲ့ ညီအစ်ကို၊ ညီအစ်မတွေ ဆုတောင်းပေးနေတယ်ဆိုတာ သူ သိတဲ့အတွက် ’အလွန် သက်သာရာရတယ်’ လို့ ပြောတယ်။

၂၀၂၀၊ ဒီဇင်ဘာ ၁၄ ရက် တုန်းက တရားရုံးမှာ နောက်ဆုံး လျှောက်လဲချက် ပေးချိန်မှာ ရုစလန် အခုလို သတ္တိရှိရှိ ပြောခဲ့တယ်– “လွန်ခဲ့တဲ့ ပထမရာစုတုန်းက အသက် ၃၃ နှစ်အရွယ် လူငယ်တစ်ယောက်ဟာ အစိုးရကို ပုန်ကန်ဖို့ လှုံ့ဆော်တယ်လို့ စွပ်စွဲပြီး တရားစွဲခံခဲ့ရတယ်။ ဒါပေမဲ့ မှတ်တမ်းတင်ထားတဲ့ တရားရေးဆိုင်ရာ အချက်အလက်တွေအရ သူဟာ ယေဟောဝါနဲ့ ရင်းနှီးတဲ့ ဆက်ဆံရေးကြောင့် တရားစီရင်ခံရကြောင်း ဖော်ပြတယ်။ မျက်မြင်သက်သေတွေရဲ့ ထွက်ဆိုချက်တွေဟာ တစ်ယောက်နဲ့ တစ်ယောက် ကိုက်ညီမှု မရှိကြဘူး။ စွပ်စွဲချက်ဟာ သူ အပြစ်ရှိကြောင်း သက်သေမပြနိုင်ပေမဲ့ အပြစ်ရှိတယ်လို့ စီရင်ချက် ချခဲ့တယ်။ သူကတော့ ယေရှုခရစ်ပါပဲ။

“ဒီနေ့ ၂၁ ရာစု၊ အသက် ၃၃ နှစ်အရွယ်၊ လူငယ်တစ်ယောက် ဖြစ်တဲ့ ကျွန်တော့်ကိုလည်း နိုင်ငံတော် ဖွဲ့စည်းပုံအခြေခံ ဥပဒေနဲ့ နိုင်ငံတော် လုံခြုံရေးကို ဆန့်ကျင်တဲ့ ပြစ်မှုနဲ့ စွပ်စွဲပြီး ရုံးတင်တယ်။ ဒီစွဲချက်ကို ကျွန်တော် ကြားတဲ့အခါ ဒါဟာ ရှေ့နောက်မညီ၊ အဓိပ္ပာယ် မရှိတဲ့အတွက် အံ့သြမိတယ်။”

လူမျိုးရေးနဲ့ ဘာသာရေး မုန်းတီးမှုကို လှုံ့ဆော်ပေးနေတယ်ဆိုတဲ့ မှားယွင်းတဲ့ စွဲချက်ကို ရုစလန် ပြင်းပြင်းထန်ထန် ချေပခဲ့တယ်။ သူက “အခြေအနေ အမျိုးမျိုးကြောင့် ကျွန်တော်ဟာ ရုရှား၊ အဇာဘိုင်ဂျန်၊ ယူကရိန်း စတဲ့ လူမျိုးသုံးမျိုးရဲ့ ယဉ်ကျေးမှုအောက်မှာ ကြီးပြင်းလာတယ်။ ယဉ်ကျေးမှု သုံးမျိုးစလုံးကို ကျွန်တော် ကြိုက်တယ်။ ကျွန်တော့်ရဲ့ မိတ်ဆွေတွေထဲမှာ အာဖရိကနိုင်ငံတွေထဲက အင်္ဂလိပ်စကားပြောသူတွေ၊ တရုတ်စကားပြောသူတွေ အများကြီး ရှိတယ်။ ကျွန်တော်က အဇာဘိုင်ဂျန် လူမျိုးပါ။ အဇာဘိုင်ဂျန်နဲ့ အာမေးနီးယားလူမျိုးကြား ကြာရှည်တဲ့ ရန်ငြိုး ရှိတာကို လူတိုင်း သိကြတယ်။ ဒါပေမဲ့ ကျွန်တော့်ရဲ့ ရင်းနှီးတဲ့ မိတ်ဆွေတစ်ယောက်ကတော့ အာမေးနီးယားလူမျိုး။ ကျွန်တော့် မင်္ဂလာပွဲမှာ သူ သက်သေလုပ်ပေးတယ်။ နိုင်ငံ၊ လူမျိုး၊ ဘာသာတရား၊ လူနေမှု အဆင့်အတန်း အမျိုးမျိုး ကွဲပြားတဲ့ လူတွေကို ချစ်ဖို့ ကျွန်တော့်ရဲ့ ဘာသာတရားက သွန်သင်ပေးတယ်။ အခုတော့ လူမျိုးစု အချင်းချင်း ကွဲပြားအောင်၊ လူတစ်မျိုးဟာ တခြားလူမျိုး တစ်မျိုးထက် ပိုသာတယ်လို့ မြင်အောင် လှုံ့ဆော်ပေးတယ်ဆိုပြီး စွပ်စွဲတာ ကြားရတော့ ကျွန်တော် သိပ်အံ့သြမိတယ်” လို့ ပြောတယ်။

ရုရှားမှာ ရှိတဲ့ ညီအစ်ကို၊ ညီအစ်မတွေဟာ တရားရုံးမှာ အမှုရင်ဆိုင်ရချိန်ကို အခွင့်အရေး ယူပြီး သတ္တိရှိရှိ သက်သေခံနေကြောင်း ကြားရတာ အားရှိစရာပါပဲ။ အစိုးရ အရာရှိတွေရှေ့ ကျွန်တော်တို့ရဲ့ ယုံကြည်ခြင်းကို ခုခံကာကွယ်တဲ့အခါ စိတ်ရိုးဖြောင့်သူတွေ သတင်းတရားကို ကြားပြီး ယေဟောဝါဆီ ဆွဲဆောင်မှုဖြစ်စေမယ်ဆိုတာ ယုံကြည်စိတ်ချပါတယ်။—မဿဲ ၁၀:၁၈။