ယေဟောဝါသက်သေတွေရဲ့လုပ်ငန်းတွေကို ရုရှားက မတရား ပိတ်ပင်တာ ၂၀၂၂၊ ဧပြီ ၂၀ ဆိုရင် ငါးနှစ်ရှိပါပြီ။ ရုရှားအာဏာပိုင်တွေဟာ စတင်ပိတ်ပင်ချိန်ကစပြီး ညှဉ်းပန်းနှိပ်စက်မှုတွေ တစ်နှစ်ပြီးတစ်နှစ် ပိုပြင်းထန်လာတယ်။ a ကိုယ်ထိလက်ရောက် နှိပ်စက်တာတွေတောင် ရှိတယ်။ ဒါပေမဲ့ jw.org မှတ်တမ်းတွေမှာ တွေ့ရတဲ့အတိုင်း ညီအစ်ကို၊ ညီအစ်မတွေဟာ ရဲရဲရင့်ရင့် ခံရပ်နေကြပါတယ်။

အကျဉ်းကျနေတာ ငါးနှစ်နီးပါးရှိပြီဖြစ်တဲ့ ညီအစ်ကို ဒဲနစ္စ ခရစ်တန်ဆန်ဟာ အင်မတန် အတုယူစရာပါ။ ၂၀၁၉၊ မေလမှာ သူအယူခံဝင်တာ ရှုံးသွားပြီးတဲ့နောက် ချက်ချင်းပဲ တရားရုံးမှာ သူ့ကိုအားပေးဖို့ လာကြတဲ့ ညီအစ်ကို၊ ညီအစ်မအားလုံးကို “ကျွန်တော် အတတ်နိုင်ဆုံး ယေဟောဝါ အမှုကို ကြိုးစားထမ်းဆောင်ခဲ့တယ်။ အဲ့ဒီလို အမြဲ လုပ်ဆောင်သွားမှာပဲ “ လို့ တည်တည်ငြိမ်ငြိမ်၊ ယုံကြည်စိတ်ချစွာ ပြောခဲ့တယ်။

ညီအစ်ကို အီဂေါ် တူရစ်ခ်လည်း အဲ့ဒီလိုပဲ စိတ်ပိုင်းဖြတ်ထားတယ်။ ဆိုဗီယက်ခေတ်မှာ ညှဉ်းပန်းနှိပ်စက်ခံခဲ့ရတဲ့ ညီအစ်ကို နီကိုလိုင် ကယ်လစ်ဘာဘာနဲ့ တွေ့ဆုံခဲ့တာကို သူပြန်အမှတ်ရတယ်။ စုံစမ်းခြင်းတွေက မိမိလူမျိုးကို ယေဟောဝါ စောင့်ရှောက်ပုံကို တွေ့မြင်ခွင့်ရစေတယ်လို့ နီကိုလိုင်က အီဂေါ်ကို သွန်သင်ပေးခဲ့တယ်။ “ယုံကြည်ခြင်းကြောင့် ဒုက္ခခံရတာ အခွင့်ထူးပဲဆိုတာ ရှင်းနေပါတယ်” လို့ အီဂေါ် ပြောတယ်။ အီဂေါ်က ဆိုင်းငံ့ထောင်ဒဏ် ခုနစ်နှစ်ကျပေမဲ့ ဆက်လက် ခံရပ်နေပါတယ်။

ညီအစ်ကို ယေ့ဂျနီ ဖီဒင်က ခိုင်မာတဲ့ ခံယူချက်ကို ခုလို ရှင်းပြတယ်- “အခုအချိန်ဟာ ကိုယ်ပိုင် တရားမျှတမှုအတွက် တိုက်ရမယ့်အချိန် မဟုတ်ဘူး။ သစ္စာရှိဖို့ လိုတဲ့အချိန်ပါ။ ယေဟောဝါက တရားမျှတမှု ပြန်ရအောင် လုပ်ပေးမယ်။ ကောင်းချီးရဖို့ ကျွန်တော်တို့ တိုက်နေတာ။ . . . အဲ့ဒီလိုတွေးတော့ ဒီစုံစမ်းခြင်းတွေရဲ့ ရလဒ်ဟာ ဘယ်လိုမျိုးပဲ ဖြစ်ပေါ်လာပါစေ သဘောထားမှန်ရှိဖို့ ထောက်ကူပေးတယ်။ စုံစမ်းခြင်းတစ်ခုစီက ယေဟောဝါကို ဂုဏ်တင်ဖို့နဲ့ သက်သေခံဖို့ အခွင့်အရေးပါပဲ။”

ညီအစ်မ တာတယာနာ ဇာတ်လည်း ဒီလိုပြောတယ်- “ကျွန်မတို့ အောင်မြင်ကျော်လွှားခဲ့တာတွေကို ပြန်စဉ်းစားတဲ့အခါ ဒီအခက်အခဲတွေကို ဆက်ခံရပ်ဖို့ လှုံ့ဆော်မှုဖြစ်စေတယ်။ ယေဟောဝါဟာ ကျွန်မတို့နဲ့ အတူရှိနေကြောင်း သက်သေပြနေတာပဲ။ ကောင်းကင်မှာစံမြန်းတဲ့ ခမည်းတော်ရဲ့ အကူအညီမပါပဲ ဒီလို အခြေအနေတွေအောက်မှာ ဆက်ပျော်ရွှင်နေကြဖို့ဆိုတာ မဖြစ်နိုင်ဘူး။”

အစောပိုင်းက ပြောခဲ့တဲ့ ယေ့ဂျနီက “ကျွန်တော်တို့က အောင်မြင်သူတွေပါ” လို့ ပြောတယ်။ “ကျွန်တော်တို့ အချုပ်ကျပြီး အောင်မြင်စွာ ပြန်ထွက်လာကြတယ်။ တရားရုံး တက်ခဲ့ကြပြီး အောင်မြင်စွာ ပြန်ထွက်လာကြတယ်။ ထောင်ကျပြီး အောင်မြင်စွာ ပြန်ထွက်လာခဲ့ကြတယ်။”

၂၀၁၇ ပိတ်ပင်မှု မကြေညာခင်လေးမှာ ဆိုဗီယက် ပြည်ထောင်စုက ယေဟောဝါသက်သေတွေအကြောင်း အကျွမ်းတဝင်ရှိသူ သမိုင်းပညာရှင် ဒေါက်တာ အမ်မလီ ဘယ်ရန်က ဒီလို ရေးခဲ့တယ်- “တကယ်လို့ သမိုင်းဟာ အနာဂတ်မှာဖြစ်လာမယ့်အရာကို ဖော်ပြတဲ့ သဲလွန်စ ဖြစ်မယ်ဆိုရင် ရုရှားဟာ ယေဟောဝါသက်သေတွေကို ပယ်ရှားလို့ မရနိုင်သလောက် ဖြစ်ပါလိမ့်မယ်။”

ဒါကြောင့် ဟေရှာယ ၅၄:၁၇ ပါ ကြိုဟောချက်က ရုရှားနဲ့ ခရိုင်းမီးယားက ညီအစ်ကို၊ ညီအစ်မတွေအတွက် မှန်ကန်ကြောင်း သက်သေပြနေတာ ရှင်းနေပါတယ်– “မင်းကိုတိုက်ခိုက်ဖို့လုပ်တဲ့ လက်နက်တစ်ခုမှ အောင်မြင်မှာ မဟုတ်ဘူး။”