ဒီဇင်ဘာ ၂၅၊ ၂၀၁၇
ရုရှား
ရုရှားအာဏာပိုင်တွေ ယေဟောဝါသက်သေများရဲ့ စည်းဝေးပွဲခန်းမကို သိမ်းယူ
၂၀၁၇၊ ဒီဇင်ဘာ ၁၄ ရက်နေ့မှာ ရုရှားအာဏာပိုင်တွေဟာ စိန့်ပီတာစဘတ်မြို့မှာရှိတဲ့ ယေဟောဝါသက်သေများရဲ့ ကိုလိုမြာဇကီယာ စည်းဝေးပွဲခန်းမကို ဝင်ရောက်စီးနင်း၊ အဆောက်အအုံကို အစောင့်အကြပ်တွေ ဝန်းရံပိတ်ဆို့ပြီး သိမ်းလိုက်ကြတယ်။ ဝင်ရောက်စီးနင်းချိန်မှာ ယေဟောဝါသက်သေတစ်ယောက်မှ ထိခိုက်ဒဏ်ရာရတာ မရှိပါဘူး။ အဆောက်အအုံလည်း ထိခိုက်ပျက်စီးပုံ မရဘူး။
ရုရှားဖယ်ဒရေးရှင်း အယူခံတရားရုံးချုပ် ဆုံးဖြတ်ချက် ချတဲ့ ၂၀၁၇၊ ဇူလိုင် ၁၇ ရက်ကစပြီး ယေဟောဝါသက်သေတွေဆီကနေ ရုရှားအာဏာပိုင်တွေ သိမ်းယူတဲ့ အဆောက်အအုံတွေထဲမှာ စည်းဝေးပွဲခန်းမဟာ အကြီးဆုံး အဆောက်အအုံ ဖြစ်တယ်။ တရားရုံးချုပ်က ရုရှားနိုင်ငံတစ်ဝန်းက ယေဟောဝါသက်သေများရဲ့ တရားဝင် အဖွဲ့အစည်းအားလုံး ဖျက်သိမ်းကြောင်း၊ သူတို့ရဲ့လုပ်ငန်းကို ပိတ်ပင်ကြောင်း၊ ပိုင်ဆိုင်မှုအားလုံးကို သိမ်းယူမှာဖြစ်ကြောင်း စီရင်ဆုံးဖြတ်ခဲ့တယ်။
ထိုင်ခုံ ၁,၅၀၀ ဆံ့တဲ့ စည်းဝေးပွဲခန်းမကို ၂၀၀၂ ခုနှစ်မှာ အကြီးစား ပြုပြင်ပြီးနောက်ပိုင်း ဝတ်ပြုစည်းဝေးပွဲတွေအတွက်သာမက ဒေသခံအသင်းတော်တွေပါ အသုံးပြုကြတယ်။ စည်းဝေးပွဲခန်းမကို ရုရှားဖယ်ဒရေးရှင်း အမည်ပေါက်ရအောင် အာဏာပိုင်တွေ လုပ်ဆောင်ခဲ့ကြောင်း ယေဟောဝါသက်သေတွေရဲ့ ရှေ့နေတွေ သိလိုက်ရတယ်။ အဆောက်အအုံကို အနီးနားက ကျန်းမာရေးဌာနဆီ လွှဲပေးတဲ့အတွက် အခု ဝင်ပေါက်မှာ အဲဒီဌာနရဲ့ဆိုင်းဘုတ် တပ်ထားတယ်။
စိန့်ပီတာစဘတ်မြို့အနီးမှာရှိတဲ့ ယေဟောဝါသက်သေများရဲ့ ဌာနချုပ်ရုံး အဆောက်အအုံကို သိမ်းယူမှာဖြစ်ကြောင်း တရားရုံးဆုံးဖြတ်ချက် မချခင် တစ်ပတ်အလိုမှာ သိမ်းယူလိုက်တာ ဖြစ်တယ်။ ယေဟောဝါသက်သေများရဲ့ ရုရှားဌာနချုပ်က ပင်စီဗေးနီးယား ကင်းမျှော်စင် သမ္မာကျမ်းစာနဲ့ ဝေစာအသင်းကို ပိုင်ဆိုင်မှု လွှဲအပ်ထားတဲ့ ၁၇ နှစ် သက်တမ်းရှိ စာချုပ်ကို တရားရုံးက ပယ်ဖျက်ခဲ့တယ်။ အယူခံတရားရုံးကသာ အတည်ပြုပေးခဲ့ရင် ရုရှားအာဏာပိုင်တွေအနေနဲ့ ယေဟောဝါသက်သေများရဲ့ နိုင်ငံခြားသားပိုင် အဆောက်အအုံတွေကို သိမ်းယူဖို့ လမ်းပွင့်သွားမယ်။
ယေဟောဝါသက်သေတွေကို ဘာသာရေးလွတ်လပ်ခွင့် မပေးရုံသာမက သူတို့ပိုင်ဆိုင်တဲ့ အဆောက်အအုံတွေကိုပါ သိမ်းယူလာတဲ့အတွက် ရုရှားအစိုးရရဲ့ လုပ်ရပ်တွေဟာ လုံးလုံးလျားလျား ဘာသာရေးအမြင်ကျဉ်းမှုလို့ ယေဟောဝါသက်သေတွေ ယူဆပါတယ်။ အဆောက်အအုံ အတော်များများဟာ ဆင်းရဲတဲ့ ရုရှားနိုင်ငံသားတွေ ဝယ်ယူပြီး ပြန်လည်ပြုပြင်ထားတဲ့ အဆောက်အအုံတွေ ဖြစ်တယ်။ အစိုးရရဲ့ လုပ်ရပ်တွေကို အယူခံဝင်ဖို့ ယေဟောဝါသက်သေတွေ အတတ်နိုင်ဆုံး ကြိုးစားနေကြတယ်။ လူ့အခွင့်အရေးဆိုင်ရာ ဥရောပတရားရုံးနဲ့ ကုလသမဂ္ဂ လူ့အခွင့်အရေး ကော်မတီဆီကိုလည်း တိုင်ချက်ဖွင့်ထားပါတယ်။