နယူးယောက်​—ရုရှားနိုင်ငံမှာရှိတဲ့ ညီအစ်ကို၊ ညီအစ်မတွေကို အားပေးစေချင်တဲ့အတွက် တိုက်ကြီးသုံးတိုက်က ကိုယ်စားလှယ် ညီအစ်ကိုတွေ မော်စကိုမြို့ကိုသွားဖို့ ယေဟောဝါသက်သေတွေရဲ့ အုပ်ချုပ်ရေးအဖွဲ့က စီစဉ်ပေးခဲ့ပါတယ်။

ကိုယ်စားလှယ်တွေ ရောက်တဲ့အခါ ပြုံးရွှင်နေတဲ့ ရုရှားညီအစ်ကို၊ ညီအစ်မတွေကို မြင်တွေ့လိုက်ရတယ်။ တချို့ဆိုရင် အလွန်ဝေးတဲ့ ဆိုက်ဘေးရီးယားကနေ မော်စကိုအထိ လာခဲ့ကြတာ ဖြစ်တယ်။ ကိုယ်စားလှယ်တွေက ကမ္ဘာတစ်ဝန်းက ညီအစ်ကို၊ ညီအစ်မတွေဟာ ရုရှားညီအစ်ကို၊ ညီအစ်မတွေအတွက် တကယ်စိုးရိမ်နေကြောင်းနဲ့ ဆုတောင်းပေးနေကြကြောင်း နှစ်သိမ့်အားပေးခဲ့တယ်။ ကိုယ်စားလှယ်တစ်ယောက်က “လုပ်ငန်းကို ပိတ်ပင်လိုက်တဲ့ ဒီဆုံးဖြတ်ချက်ကို ပြန်ပြင်ပေးလိမ့်မယ်လို့ မျှော်လင့်ချက် သိပ်မရှိတာတောင် ရုရှားက ညီကိုတွေရဲ့ ရဲရင့်တဲ့ စိတ်ဓာတ်ကို မြင်ရတာ ကျွန်တော် သိပ်အားရှိတယ်။”

တရားသူကြီး သုံးဦးပါတဲ့ ဘုတ်အဖွဲ့က မမှန်တဲ့ဆုံးဖြတ်ချက် ချခဲ့ပေမဲ့ တရားရုံးအခန်းထဲမှာ စစ်မှန်တဲ့ မေတ္တာနဲ့ စည်းလုံးမှုကို တွေ့မြင်နေရတယ်။ အခုလို လူထုရှေ့မှာ ယေဟောဝါရဲ့နာမည် ရှုတ်ချခံရတာကို ညီအစ်ကိုတွေ ကြားတဲ့အခါ တကယ်ဝမ်းနည်းကြတယ်။ ပြီးတော့ ရုရှားရှိ ယေဟောဝါသက်သေတွေ အကြီးအကျယ် စမ်းသပ်ခံရတော့မယ်ဆိုတာ သူတို့ သိကြတယ်။ တရားရုံးမှာ ရောက်ရှိနေကြတဲ့ ညီအစ်ကို၊ ညီအစ်မတွေဟာ သိက္ခာရှိပြီး အချင်းချင်း မေတ္တာပြပုံတွေက “အစွန်းရောက်” သူတွေလို့ တရားသူကြီးတွေရဲ့ စွပ်စွဲချက် မှားကြောင်း သက်သေပြခဲ့တာပဲ။

အဲဒီကိုယ်စားလှယ်အဖွဲ့ကို အုပ်ချုပ်ရေးအဖွဲ့ဝင် မာ့ခ် ဆန်ဒါစန် ဦးဆောင်ခဲ့တယ်။ “မကြောက်နဲ့၊ ရဲစွမ်းသတ္တိရှိပါ” လို့ ညီအစ်ကိုတွေကို သူအားပေးခဲ့တယ်။ ဧည့်သည် ညီအစ်ကိုတွေ တရားရုံးကနေ ထွက်လာကြတဲ့အခါ ဒေသခံ ညီအစ်ကိုတွေက ပွေ့ဖက်ကြပြီး ဒီသမိုင်းတွင်မယ့် အခါသမယမှာ သူတို့ကို ထောက်မအားပေးခဲ့လို့ ကျေးဇူးတင်ကြောင်း ပြောကြတယ်။

ရုရှားမှာရှိတဲ့ ယေဟောဝါသက်သေတွေကို တိုက်ခိုက်တာနဲ့ ပတ်သက်ပြီး သတင်းအမှန်ကို ပြောပြဖို့ အဲဒီကိုယ်စားလှယ်တွေဟာ မော်စကိုမှာရှိတဲ့ သံရုံး ၂၁ ရုံးကို သွားခဲ့ကြတယ်။ သက်သေခံအိမ်တွေကို မီးရှို့တာ၊ သက်သေခံတွေကို အလုပ်ဖြုတ်တာ၊ ကျောင်းတွေမှာ ကလေးတွေကို နှောင့်ယှက်တာနဲ့ အချုပ်ကျနေတဲ့ ညီအစ်ကို ဒဲနစ္စ ခရစ်တန်ဆန် အပါအဝင် ခရစ်ယာန်ဝတ်ပြုမှုမှာ ဦးဆောင်တဲ့ အကြီးအကဲတွေကို ဖမ်းဆီးတာတွေအကြောင်း ပြောပြကြတယ်။ အဲဒီအဖြစ်အပျက်တွေကို အကျဉ်းချူပ်ဖော်ပြထားတဲ့ ၂ မိနစ်ကြာ ဗီဒီယိုကို ကြည့်ပြီး သံအမတ်တချို့ တော်တော် စိတ်မကောင်းဖြစ်သွားကြတယ်။ သူတို့အတော်များများက ‘ဘာဖြစ်လို့ ယေဟောဝါသက်သေတွေကို ဒီလိုလုပ်ရတာလဲ’ လို့မေးကြတယ်။ ယေဟောဝါသက်သေတွေဟာ နိုင်ငံရေးမှာ ကြားနေကြလို့၊ ပြီးတော့ သက်သေခံတွေရဲ့ ဟောပြောခြင်းလုပ်ငန်းကြောင့် ရုရှားနိုင်ငံသား အတော်များများ ပြောင်းလဲခဲ့ကြလို့ဖြစ်တယ် ဆိုတာ ညီအစ်ကိုတွေ ရှင်းပြပြီး ကောင်းကောင်းသက်သေခံခွင့် ရခဲ့ကြတယ်။ “သြသဒေါ့ချာ့ချ်က သူတို့ရဲ့နောက်လိုက်တွေကို ခင်ဗျားတို့ လိုက်ဟောပြောတာ မကြိုက်ကြလို့ပေါ့” ဆိုပြီး သံအမတ်တစ်ယောက်က ပြောတယ်။ သံရုံး ၁၀ ရုံးကျော်က သူတို့ရဲ့ ကိုယ်စားလှယ်တွေကို စေလွှတ်ခဲ့ပြီး တရားရုံးကြားနာချိန်တစ်လျှောက် ၈ နာရီကြာ ရှိနေခဲ့ကြတယ်။

ရုရှားနိုင်ငံက ညီအစ်ကိုတွေရဲ့ သစ္စာရှိဖို့ ဆုံးဖြတ်ထားမှုတွေ၊ တရားရုံးမှာ ကောင်းကောင်း သက်သေခံခဲ့တာတွေကို တွေ့ခဲ့ရတဲ့အတွက်ကြောင့် အပြည်ပြည်ဆိုင်ရာ ကိုယ်စားလှယ် ညီအစ်ကိုတွေဟာ ယုံကြည်ခြင်းပိုခိုင်ခံ့ပြီး အားအင်အပြည့်နဲ့ ရုရှားကနေ ပြန်သွားကြပါတယ်။

Media Contact:

David A. Semonian, Office of Public Information, +1-845-524-3000