ရုရှား​အာဏာပိုင်တွေ​ဟာ စိန့်​ပီတာစဘတ်​မြို့အနီး ဆို​နီ​ချ​နာ​ယာ​မြို့မှာ​ရှိတဲ့ ယေဟောဝါသက်သေများရဲ့ ဗဟို​အုပ်ချုပ်ရေး​ရုံး အဆောက်အအုံတွေကို သိမ်း​ဖို့ ကြိုးပမ်း​နေကြပါတယ်။

ယေဟောဝါသက်သေများရဲ့ တရားဝင် အဖွဲ့အစည်း​အားလုံး ဖျက်သိမ်း​ဖို့နဲ့ ဗဟို​အုပ်ချုပ်ရေး​ရုံး အဆောက်အအုံ​တွေ အပါအဝင် ပိုင်ဆိုင်ရာ​အားလုံးကို သိမ်းယူ​ဖို့ ၂၀၁၇၊ ဧပြီ ၂၀ ရက်​နေ့မှာ တရားရုံးချုပ်​က အမိန့်ချ​ခဲ့တယ်။ ဒါပေမဲ့ ပင်စီဗေးနီးယား ကင်းမျှော်စင် သမ္မာကျမ်းစာ​နဲ့ ဝေစာ​အသင်း (WTPA) အမေရိကန်​ပိုင်တဲ့ အဆောက်အအုံ​ကိစ္စ ပေါ်လာတယ်။ ဒါကြောင့် WTPA ကို ပိုင်ဆိုင်ခွင့် တရားဝင် လွှဲပြောင်း​ထားတဲ့ သက်တမ်း ၁၇ နှစ်​ရှိတဲ့ စာချုပ် ပျက်ပြယ်​အောင် အစိုးရ​ရှေ့နေ​တွေ​က ကြိုးစား​နေကြတယ်။ တရားရုံးချုပ် ဆုံးဖြတ်ချက် မချခင်​တုန်း​က အဲဒီ​စာချုပ်​ကိစ္စ တစ်ခါ​မှ ပြဿနာ မဖြစ်ခဲ့ဘူး။ ပိုင်ဆိုင်ခွင့် လွှဲပြောင်း​ပြီး​ကတည်းက WTPA ဟာ ပုံမှန် အခွန်ဆောင်​ခဲ့တယ်။ အဆောက်အအုံ​ကို သိမ်းယူ​ခွင့် ရအောင် အာဏာပိုင်တွေ ပရိယာယ်​ဆင် ကြိုးပမ်း​နေကြတယ်။

၂၀၁၇၊ နိုဝင်ဘာ ၂၉ ရက်၊ အကြို​ကြားနာ​မှု​မှာ တရားသူကြီး​က ယေဟောဝါသက်သေများရဲ့ ရှေ့နေ​တွေ တင်သွင်းတဲ့ လျှောက်ထား​ချက်​အားလုံးကို ပယ်ချ​ပြီး အစိုးရ​ရှေ့နေ​တွေကို အခွင့်အရေး ဖန်တီး​ပေး​လိုက်တယ်။ ဒီ​အဆောက်အအုံ​တွေဟာ ဒေါ်လာ​သန်း​ချီ တန်​ရုံ​သာမက နိုင်ငံခြားသား​တွေ အပါအဝင် ရုရှား​နိုင်ငံသား အ​ယောက် ၄၀၀ နီးပါး နေထိုင်တဲ့​နေရာလည်း ဖြစ်တယ်။ တချို့​ဆိုရင် ဒီမှာ နေထိုင်​တာ အနှစ် ၂၀ ကျော်နေ​ပြီ။ နေအိမ်​ကနေ ပြောင်းရွှေ့​ရတဲ့​အပြင် ရုရှား​ပြည်သူတွေ​အတွက် စေတနာ​နဲ့ လုပ်ဆောင်​နေတဲ့ ဘာသာရေး​လုပ်ငန်း​တွေ ပျက်ပြားသွား​တဲ့​အတွက် သူတို့ စိတ်မကောင်း ဖြစ်​ကြပါတယ်။

ဒီ​အမှုကို ၂၀၁၇၊ ဒီဇင်ဘာလ ၇ ရက်​နေ့မှာ စိန့်​ပီတာစဘတ်​မြို့၊ စက်​စ​ထရို​ရက်​စ​ကီ ခရိုင်​တရားရုံးမှာ စတင် ကြားနာ​ပါ​မယ်။