ဆို​နီ​ချ​နာ​ယာ​မြို့မှာ​ရှိတဲ့ ယေဟောဝါသက်သေများရဲ့ ရုံးချုပ် သိမ်းယူ​တဲ့​အမှု အယူခံဝင်​တာ​ကို စိန့်​ပီတာစဘတ်​မြို့တော် တရားရုံး​က ၂၀၁၈၊ မေ ၃ ရက်မှာ ပယ်ချ​လိုက်ပါ​တယ်။ စီရင်​ဆုံးဖြတ်ချက် အတည်​ဖြစ်သွား​ပြီ​ဖြစ်လို့ အိမ်မြေ​ရာ​အဆောက်အအုံတွေကို နိုင်ငံတော်​က အချိန်မရွေး သိမ်းယူ​နိုင်ပြီ။

ဒီ​ဆုံးဖြတ်ချက်​က အစောပိုင်း ဆက်​စ​ထရို​ရက်​စ​ကီ ခရိုင်​တရားရုံး​ရဲ့ ဆုံးဖြတ်ချက်ကို အတည်ပြု​ပေးခဲ့​ခြင်း ဖြစ်တယ်။ ခရိုင်​တရားရုံး​က ဆို​နီ​ချ​နာ​ယာ​မြို့မှာ​ရှိတဲ့ အဆောက်အအုံတွေကို အမေရိကန်၊ ပင်စီဗေးနီးယား ကင်းမျှော်စင် သမ္မာကျမ်းစာ​နဲ့ ဝေစာ​အသင်း (WTPA) ဆီ တရားဝင် လွှဲပြောင်း​ထားတဲ့ ၁၇ နှစ်သက်​တမ်း​ရှိ ပိုင်ဆိုင်မှု​စာချုပ်​ကို တရားမဝင်​ဘူးလို့ ဆုံးဖြတ်ခဲ့တယ်။ ဒီ​အဆောက်အအုံတွေကို ရုရှား​နိုင်ငံရှိ ယေဟောဝါသက်သေများရဲ့ ဗဟို​အုပ်ချုပ်ရေး​ရုံး​က​ပဲ အမြဲတမ်း ပိုင်ဆိုင်တယ်​လို့ တရားရုံး​က အခိုင်အမာ ဆိုတယ်။ ရုရှား​နိုင်ငံရှိ ယေဟောဝါသက်သေများရဲ့ ဗဟို​အုပ်ချုပ်ရေး​ရုံး​ကို ၂၀၁၇၊ ဧပြီလ​တုန်း​က ဖျက်သိမ်း​လိုက်ပြီ​လို့ တရားရုံးချုပ် စီရင်​ဆုံးဖြတ်တဲ့​အတွက် နိုင်ငံတော်​က အိမ်မြေ​ရာ အဆောက်အအုံ​ကို သိမ်းယူ​ခွင့် ရသွား​စေတယ်။ ဒီလို​မတရား “အကြောင်းပြချက်” တွေ၊ တရား​ဥပဒေ​ဆိုင်ရာ လှည့်​ကွက်​တွေ​ကြောင့် အိမ်မြေ​ရာ​အဆောက်အအုံ​ကို မတရား​သိမ်းယူ​သွား​နိုင်ပါတယ်။

ယေဟောဝါသက်သေများရဲ့ အကြံပေး​ရှေ့နေ ဖိလစ် ဘ​ရမ်​လေ ဒီလို​ပြောတယ်– “ဒီ​ဆုံးဖြတ်ချက်​ဟာ တကယ့်​မတရားမှု​ပါပဲ။ ဒီ​အိမ်မြေ​ရာ အဆောက်အအုံ​ကို ဘုရားဆီ အပ်နှံ​ထားတာ။ ရုရှား​မှာ​ရှိတဲ့ ယေဟောဝါသက်သေတွေရဲ့ ငြိမ်သက်​အေးချမ်း​တဲ့ ဘာသာရေး လုပ်ဆောင်မှုတွေ​အတွက် အသုံးပြု​ခဲ့တာပါ။ အစိုးရက ခိုးယူ​လိုက်​သလို ဖြစ်နေတယ်။ ဒီ​မတရားမှုကို ဥရောပ လူ့​အခွင့်အရေး တရားရုံး​ဆီ တင်ပြ​မှာပါ။”