၂၀၁၇၊ စက်တင်ဘာ ၂၈ ရက်နေ့မှာ သုံးနာရီကြာ အမှုကြားနာပြီးနောက် ဒိန်းမတ်နိုင်ငံသား ယေဟောဝါသက်သေ ဒဲနစ္စ ခရစ်တန်ဆန်ကို လွှတ်ပေးဖို့ အယူခံဝင်တာကို အိုရွိုလ် ခရိုင်တရားရုံးက ပယ်ချလိုက်ပါတယ်။ သူဟာ ၂၀၁၇၊ နိုဝင်ဘာ ၂၃ ရက်အထိ အမှုမစစ်မချင်း အချုပ်ထဲ ဆက်နေရပါဦးမယ်။

ဇူလိုင်လတုန်းက မစ္စတာ ခရစ်တန်ဆန်ရဲ့ အမှုကို ကြားနာချိန်မှာ အောက်တရားရုံးက သူ့ကို နိုဝင်ဘာလအထိ ချုပ်ထားဖို့ မတရား ဆုံးဖြတ်ခဲ့ပါတယ်။ အကြောင်းကတော့ သူ့ကို အစွန်းရောက်အဖြစ် တရားစွဲဆိုနိုင်အောင် “သက်သေ” တွေ စုဆောင်းနိုင်ဖို့ပါပဲ။ မစ္စတာ ခရစ်တန်ဆန်ရဲ့ ရှေ့နေက လူ့အခွင့်အရေး ဥရောပတရားရုံး (ECHR) ကို အမှုတင်ထားတဲ့အတွက် ECHR က ၂၀၁၇၊ စက်တင်ဘာ ၄ ရက်နေ့ကစပြီး မစ္စတာ ခရစ်တန်ဆန် လူ့အခွင့်အရေး ချိုးဖောက်ခံနေရတာနဲ့ပတ်သက်ပြီး ရုရှားကို မေးခွန်းတစ်သီတစ်တန်း မေးပြီး စစ်ဆေးခဲ့တယ်။

မစ္စတာ ခရစ်တန်ဆန်ရဲ့ အမှုကို နိုင်ငံတကာကလည်း အာရုံစိုက်နေပါတယ်။ အကြောင်းကတော့ ဆိုဗီယက်ခေတ်နောက်ပိုင်း ရုရှားနိုင်ငံက ယုံကြည်ကိုးကွယ်မှု အကြောင်းပြချက်သက်သက်နဲ့ ထောင်ချတဲ့ ပထမဆုံးအမှု ဖြစ်လို့ပါပဲ။