“အုပ်ချုပ်ရေးအဖွဲ့က ညီအစ်ကို/မတို့အတွက် အထူးလက်ဆောင်တစ်ခု ပြင်ဆင်ထားပါတယ်” လို့ပြောပြီးတဲ့နောက် အုပ်ချုပ်ရေးအဖွဲ့ဝင် ဂျက်ဖရီ ဂျက်ဆင်က ကမ္ဘာသစ်ဘာသာပြန်ကျမ်း ဟီဘရူးကျမ်းစောင်များကို ထုတ်ဝေကြောင်း ကြေညာလိုက်တယ်။ ၂၀၂၀၊ ဇန်နဝါရီ ၁၁ ရက်နေ့က အစ္စရေးနိုင်ငံ၊ ဟိုင်ဖာမြို့၊ ရိုမီမာအားကစားကွင်းမှာ ကျင်းပတဲ့ အထူးအစည်းအဝေးပွဲကို စုစုပေါင်း ၂,၁၂၅ ဦး တက်ရောက်တယ်။

အစ္စရေးနိုင်ငံ၊ လူထုသတင်းအချက်အလက်ဌာနမှာ တာဝန်ကျတဲ့ ညီအစ်ကို ဒေးဗစ် စီမိုရက်က “ခန့်မှန်းချက်အရ ကျွန်တော်တို့ဒေသမှာ ဟီဘရူးစကားပြောသူ ရှစ်သန်းကျော် ရှိတယ်။ သူတို့အားလုံး ခေတ်သုံး ဟီဘရူးစကားနဲ့ တာနာ့ခ် aကနေ အကျိုးခံစားရမယ်လို့ မျှော်လင့်ပါတယ်” လို့ပြောတယ်။ အခုခေတ် ဟီဘရူးစာဖတ်ပရိသတ်တွေ ရနိုင်တဲ့ ခေတ်သုံးဘာသာပြန်ကျမ်း အနည်းငယ်မှာ ဒီထုတ်ဝေမှုအသစ်လည်း ပါတယ်။

အခုဆိုရင် ကမ္ဘာသစ်ဘာသာပြန်ကျမ်းကို တစ်အုပ်လုံးအနေနဲ့ဖြစ်စေ၊ တစ်စိတ်တစ်ပိုင်းအနေနဲ့ ဖြစ်စေ ဘာသာစကား ၁၈၆ မျိုးနဲ့ ရနိုင်ပါပြီ။ ရှေးခေတ် မက်စိုရက်တစ် ကျမ်းတတ်တွေလိုပဲ ဟီဘရူးဘာသာပြန်အဖွဲ့က ညီအစ်ကိုတွေဟာ ကျမ်းစာသတင်းစကားကို တိကျမှန်ကန်စွာ ဘာသာပြန်ဖို့ ကြိုးစားခဲ့ကြတယ်။ ဒီခေတ်သုံးဘာသာပြန်ကျမ်း ပြီးစီးဖို့ သုံးနှစ်ကျော် အချိန်ယူခဲ့ရတယ်။ ဘာသာပြန်တစ်ဦးက “ဟီဘရူး စာဖတ်ပရိသတ်တွေဟာ ကျမ်းချက်တချို့ကိုဖြစ်စေ၊ ကျမ်းတစ်အုပ်လုံးကိုဖြစ်စေ နားလည်နိုင်ဖို့ အနက်ဖွင့်ကျမ်းတွေ၊ တခြားဘာသာပြန်ကျမ်းတွေကို လိုက်ရှာပြီး ဖတ်ခဲ့ရတယ်။ ဒီကျမ်းစာကို ဖတ်သူတွေကတော့ ကျမ်းချက်တွေရဲ့ အဓိပ္ပာယ်ကို အလွယ်တကူ နားလည်နိုင်ပြီ” လို့ပြောတယ်။

ညီအစ်ကိုတစ်ဦးက “တာနာ့ခ်အပိုင်းအများစုကို ကောင်းကောင်း နားမလည်ဘဲ နှစ်ပေါင်းများစွာ ဖတ်ခဲ့တဲ့သူဟာ အခုတော့ ပိုနားလည်လွယ်တဲ့ သတင်းစကားကို ဖတ်နိုင်ပြီ” လို့ပြောတယ်။ အစ္စရေးဌာနခွဲနယ်မြေရှိ ကြေညာသူ ၂,၀၀၀ ကျော်ထဲက ဟီဘရူးစကားပြော ကြေညာသူ ၆၀၃ ယောက်တို့ဟာ ဒီအထူးလက်ဆောင်ကို သုံးပြီး “ယေဟောဝါရဲ့ ပညတ်ကျမ်းကို ရှာဖွေလေ့လာ” ကြတော့မှာ သေချာတယ်။—ဧဇရ ၇:၁၀။