ကမ္ဘာ့ဌာနချုပ်က ပြခန်းတွေကို ၂၀၁၉၊ ဇန်နဝါရီလမှာ အမေရိကန် လက်သင်္ကေပြဘာသာစကား (ASL) နဲ့ တရားဝင် ဖွင့်လှစ်လိုက်ပါတယ်။ ပြတိုက်ဌာနကို ကြီးကြပ်သူ အန်ရီကီ ဖော့ဒ် ဒီလို ရှင်းပြတယ်– “ဘာသာပြန်နဲ့ ကွန်ပျူတာပိုင်း ကြိုးစားမှုတွေကြောင့် ပြတိုက်မှာ ပြသထားရာတွေကို ASL နဲ့ ကြည့်ရှုနိုင်တာ တကယ့်ကို ထူးခြားတဲ့ အစီအစဉ်ပါ။ အခုဆိုရင် ပြခန်းတွေကို လာလည်ပတ်တဲ့ နားမကြားတွေနဲ့ အကြားအာရုံ ချို့ယွင်းသူတွေ ကောင်းကောင်း နားလည်သဘောပေါက်ပြီး ပျော်ရွင်နေကြပါပြီ။”

နယူးယောက်က နားမကြား၊ မှန်မှန်ရှေ့ဆောင် ညီအစ်မ အန်နာ ဘာရို့စ်က ပြခန်းကို ASL နဲ့ ပထမဆုံး လည်ပတ်ကြည့်ရှုသူတွေထဲမှာ ပါတယ်။ သူဒီလိုပြောတယ်– “ASL နဲ့ ဗီဒီယိုစက်ရတော့ စိတ်လှုပ်ရှားသွားတယ်။ ပြတိုက်ကို အရင်က ရောက်ဖူးတဲ့အတွက် ပြခန်းမှာ ပြသထားတာတွေနဲ့ ရင်းနှီးနေတယ်။ အချက်အလက်တွေကို အင်္ဂလိပ်ဘာသာစကားနဲ့ စာတန်းထိုး ဖော်ပြထားပေမဲ့ အသေးစိတ်ကို နားမလည်တဲ့အတွက် နှလုံး မထိမိခဲ့ဘူး။ ASL ဘာသာစကားနဲ့ ဗီဒီယိုမှာ ရှင်းပြချက်တချို့လောက်ပဲ ကြည့်ရသေးတာတောင် ယေဟောဝါနာမနဲ့ပတ်သက်ပြီး အရင်ကထက် နားလည်သဘောပေါက်လာတယ်။ ပြခန်းမှာ ယေဟောဝါရဲ့ အရည်အသွေးတွေ တင်ဆက်ထားတာ စိတ်ထိမိလွန်းလို့ မျက်ရည်တောင် ကျတယ်။”

ASL ပရောဂျက်ကို ၂၀၁၇၊ ဇွန်လမှာ စတင်ပါတယ်။ ပြတိုက်မှာ ပြသထားရာတွေကို ASL နဲ့ ဘာသာပြန်၊ ဗီဒီယိုရိုက်ဖို့ နားမကြား ၆ ယောက်၊ နားမကြားမိဘရှိတဲ့ နားကြားကြေညာသူ ၆ ယောက် အပါအဝင် ညီအစ်ကို/မ စုစုပေါင်း ၂၃ ယောက် ကူညီပေးခဲ့ကြတယ်။ ပြတိုက်မှာ ရုပ်သံနဲ့ တင်ဆက်ထားတဲ့ ၉ နာရီစာ အကြောင်းအရာတွေအတွက် ဘာသာပြန်အုပ်စုက ဗီဒီယို ၉၀၀ ကျော် ရိုက်ကူးခဲ့ရတယ်။ အဲဒီဗီဒီယိုတွေကို စတူဒီယို သုံးခုမှာ ရိုက်ကူးကြပါတယ်။ ဖလော်ရီဒါပြည်နယ် ဖော့ လူဒါဒယ်မြို့က ASL ဘာသာပြန်ရုံးခွဲ၊ နယူးယောက်၊ ဝေါကီးလ် အမေရိကန်ပြည်ထောင်စု ဌာနခွဲမှာနဲ့ နယူးယောက်၊ ဝေါဝစ် ကမ္ဘာ့ဌာနချုပ်တို့မှာ ဖြစ်တယ်။ ပြတိုက်မှာ ပြသထားတာတွေကို ASL နဲ့ အပြီးမသတ်ခင် အသက်အရွယ်၊ နောက်ခံအမျိုးမျိုးရှိတဲ့ နားမကြား ညီအစ်ကို/မတွေကို ကြည့်စေပြီး ဘာသာပြန်ထားတာကို ပြင်ဆင်တည်းဖြတ်ကြတယ်။

ASL နဲ့ လည်ပတ်ကြည့်ရှုသူတွေအတွက် ပြတိုက်ဌာနက ဝေါဝစ်ပြခန်း ရုပ်သံတင်ဆက်မှုတွေမှာ သုံးတဲ့ တို့ထိဖန်သားပြင်တွေနဲ့ အမျိုးအစားတူတဲ့ စက်ကိရိယာတွေကို ဝယ်ယူခဲ့ကြတယ်။ ပြခန်းမှာ ရှိနှင့်ပြီးသား တို့ထိဖန်သားပြင် ၁၄ ခုကိုလည်း ASL ဗီဒီယိုတွေ ကြည့်နိုင်အောင် ပြတိုက်ဌာနက စီစဉ်ပေးခဲ့တယ်။

ယေဟောဝါသက်သေများရဲ့ အုပ်ချုပ်ရေးအဖွဲ့ဝင် မာ့ခ် ဆန်ဒါစန် ဒီလိုပြောတယ်– “ဝေါဝစ်ပြတိုက်ရဲ့ ရည်ရွယ်ချက်က ကမ္ဘာ့ဌာနချုပ်ကို လာလည်ပတ်သူအားလုံးရဲ့ ယုံကြည်ခြင်းကို တည်ဆောက်ပေးဖို့၊ အားပေးဖို့ ဖြစ်တယ်။ ပြတိုက်ပြခန်းမှာ ပြသထားရာတွေကို ဘာသာစကား ၁၄ မျိုးနဲ့ ကြည့်နိုင်တယ်။ အဲဒီအထဲမှာ နားမကြားသူတွေ၊ အကြားအာရုံ ချို့ယွင်းသူတွေအတွက် ASL နဲ့ ရနိုင်ပြီဖြစ်လို့ စိတ်လှုပ်ရှားတယ်။”

အခုအချိန်အထိ ဝေါဝစ်ကို သန်းတစ်ဝက်ကျော် လာလည်ပတ်ပြီးကြပါပြီ။ ကမ္ဘာတစ်ဝန်းက ညီအစ်ကို/မတွေ ပြတိုက်ပြခန်းတွေဆီ လည်ပတ်ကြည့်ရှုပြီး ယေဟောဝါသက်သေများရဲ့ သမိုင်းဝင် အမွေအနှစ်တွေကို လေ့လာကြဖို့ ဖိတ်ခေါ်ပါတယ်။ လည်ပတ်ကြည့်ရှုသူတွေဟာ ‘ဘုရားသခင်ကို ဆက်ယုံကြည်အားထား’ ဖို့ အားပေးမှု ရကြပါလိမ့်မယ်။—ဆာလံ ၇၈:၇။