၂၀၂၂ ခုနှစ်ဟာ အယ်လ်ဘေးနီးယားကို ယေဟောဝါသက်သေတွေ ရောက်ရှိတဲ့ အနှစ် ၁၀၀ မြောက်ပါ။

အမှန်တရားကို လက်ခံတဲ့ ပထမဆုံး အယ်လ်ဘေးနီးယားလူတွေထဲမှာ နာရှို အီဒရီဇီလည်း ပါဝင်တယ်။ ၁၉၂၀ ဝန်းကျင်လောက်က အမေရိကန်မှာ သူ နေခဲ့ချိန် အပြည်ပြည်ဆိုင်ရာ ကျမ်းစာကျောင်းသားတွေလို့ ခေါ်တဲ့ ယေဟောဝါသက်သေတွေနဲ့ ကျမ်းစာ လေ့လာခဲ့တယ်။

၁၉၂၂ မှာ အယ်လ်ဘေးနီးယားကို နာရှို ပြန်ရောက်လာတယ်။ နောက်ပိုင်းမှာ ကျမ်းစာကျောင်းသားတွေ ဖြစ်လာတဲ့ အယ်လ်ဘေးနီးယားတွေလည်း အမေရိကန်နိုင်ငံကနေ ပြန်လာပြီး သတင်းကောင်း ဟောကြတယ်။

သာနာစ် ဒူလီဟာ အယ်လ်ဘေးနီးယားမှာ ရှိတဲ့ အစောပိုင်း ကျမ်းစာကျောင်းသားတွေထဲက တစ်ယောက်ပါ။ “၁၉၂၅ ခုနှစ်တုန်းက အယ်လ်ဘေးနီးယားမှာ အသင်းတော် သုံးခု ရှိတယ်။ သီးခြားဒေသတွေမှာ ကျမ်းစာကျောင်းသားတွေနဲ့ စိတ်ဝင်စားသူတွေလည်း ရှိတယ်” လို့ သူ ပြောတယ်။

အဲဒီနှစ်တွေမှာ ဘုရားသခင့် စောင်းတော်၊ နှစ်လို့ဖွယ် အစိုးရ စတဲ့ စာအုပ်တွေကို အယ်လ်ဘေးနီးယားစကားနဲ့ ပြန်ဆိုထားတယ်။ ၁၉၂၅၊ ဒီဇင်ဘာ ၁ ရက်ထုတ် ကင်းမျှော်စင်ထဲမှာ “အယ်လ်ဘေးနီးယားစာစောင်တွေကို လူအတော်များများ ဖတ်ရှုကြပြီး အမှန်တရားကို ဝမ်းမြောက်ဝမ်းသာ လက်ခံလာကြတယ်” လို့ ဖော်ပြတယ်။

ဇွဲရှိရှိ ဟောပြောကြတဲ့ သက်သေခံတွေကို “သတင်းကောင်း ဟောပြောသူတွေ” လို့ အဓိပ္ပာယ်ရတဲ့ အွန်ဂျီလိုရီ ဆိုပြီး ခေါ်ကြတယ်။ ၁၉၃၀ ပြည့်လွန်နှစ်မှာ နှစ်ခြင်းခံခဲ့တဲ့ နာရှို ဒိုရီ ဒီလိုပြောပြတယ်– “၁၉၃၅ တုန်းက ကီလစရီမြို့မှာ ဟောပြောဖို့ ဘတ်စကား ငှားပြီး သွားကြတယ်။ အဲဒီနောက် အယ်လ်ဘေးနီးယားမှာ ရှိတဲ့ ပါမက်၊ လက်စကိုဗစ်၊ အဲရ်စကီ၊ ကော်စီ၊ ပေါ့ဂရာဒက်၊ အယ်လဘာစန်မြို့တွေဆီ လည်ပတ်ပြီး ဟောကြတယ်။ ခရစ်တော်ရဲ့ သေခြင်း အောက်မေ့ရာပွဲကို ကျင်းပဖို့ တရာနာမြို့ကို အချန်မီ ရောက်တယ်။”

၁၉၃၉ ခုနှစ်မှာ အီတီလီ ဖက်ဆစ်အစိုးရ တက်လာပြီး ယေဟောဝါသက်သေလုပ်ငန်းကို ပိတ်ပင်ခဲ့တယ်။ ဂရိ–အီတလီ စစ်ပွဲ ဖြစ်ချိန်မှာ ညီအစ်ကိုတွေ စစ်မှုမထမ်းလို့ ဒုက္ခကြုံခဲ့ရတယ်။ a အဲဒီနှစ်တွေအတွင်း ညီအစ်ကို ၁၅ ယောက် ထောင်ချခံရတယ်။ ချွေးတပ်စခန်း အပို့ခံရတဲ့ ညီအစ်ကို နီကိုဒဟင်ဆိုရင် သတင်း အစအနတောင် မရတော့ဘူး။

၁၉၄၄၊ ဒုတိယ ကမ္ဘာစစ်အပြီး၊ အယ်လ်ဘေးနီးယားကို ကွန်မြူနစ်တွေ အာဏာသိမ်းချိန်မှာ ဆက်နှိပ်စက်ညှဉ်းဆဲခံရပြန်တယ်။ ညီအစ်ကို အတော်များများ ထောင်ချခံရ၊ နှိပ်စက်ခံရတယ်။ တချို့ကို မိသားစုတွေနဲ့ ဝေးတဲ့ ချွေးတပ်စခန်းတွေဆီ ပို့လိုက်တယ်။ အဲဒီနှစ်တွေအတွင်း အယ်လ်ဘေးနီးယားသတင်း မကြားရသလောက်ပဲ။ ၁၉၅၉ ခုနှစ် ယေဟောဝါသက်သေများရဲ့ နှစ်ချုပ်စာအုပ် မှာ “အစိုးရတွေဟာ အယ်လ်ဘေးနီးယား ညီအစ်ကိုတွေကို ကမ္ဘာသစ် အဖွဲ့အစည်းနဲ့ အဆက်ပြတ်အောင် ကြိုးစားကြပေမဲ့ ဘုရားသခင့် စွမ်းအားတော်ကိုတော့ မတားဆီးနိုင်ပါဘူး” လို့ ဖော်ပြတယ်။ ၁၉၆၇ ခုနှစ်မှာ အယ်လ်ဘေးနီးယားဟာ ဘုရားမဲ့ နိုင်ငံဆိုပြီး ကြေညာလိုက်တယ်။ သက်သေခံ အနည်းစုကတော့ ယုံကြည်ချက်အတိုင်း သတိရှိရှိ လိုက်နာကြတယ်။

ကွန်မြူနစ်အစိုးရ ကျပြီးနောက် ၁၉၉၂၊ မေ ၂၂ ရက်မှာ အနှစ် ၅၀ ကြာ ပိတ်ပင်ခံရတဲ့ ယေဟောဝါသက်သေတွေဟာ တရားဝင် အဖွဲ့အစည်းအဖြစ် အသိအမှတ်ပြုခံရတယ်။

အခု၊ အယ်လ်ဘေးနီးယားမှာ အသင်းတော် ၈၉ ခု၊ သက်သေခံ ၅,၅၅၀ ရှိနေပါပြီ။ ဖိနှိပ်မှုတွေ ကြုံရပေမဲ့ “ယေဟောဝါရဲ့ တရားစကားဟာ အကြီးအကျယ် လွှမ်းမိုးပျံ့နှံ့သွား” တဲ့အတွက် ကျွန်တော်တို့ အလွန် ဝမ်းမြောက်ကြတယ်။—တမန်တော် ၁၉:၂၀။