ကမ္ဘာတစ်ဝန်းက ညီအစ်ကို/မတွေဟာ COVID-19 ကပ်ရောဂါ ဖြစ်ပွားနေချိန်မှာ အလိုက်သင့်ပြောင်းလဲ အမှုဆောင်နေကြတယ်။ အီကွေဒေါနိုင်ငံက ကြေညာသူတွေလည်း နည်းလမ်းမျိုးစုံ သုံးပြီး သတင်းကောင်း ဟောရာမှာ အောင်မြင်နေပါတယ်။

အမ်ဘတိုမြို့မှာ ခုနစ်နှစ်အရွယ် ကြေညာသူ ညီအစ်မငယ်က မိခင်ရဲ့အကူအညီနဲ့ ကျောင်းဆရာမတွေဆီ စာတိုပို့ပြီး သက်သေခံတယ်- “မင်္ဂလာပါ ဆရာမ။ အခုလို ခေတ်ဆိုးကြီးမှာ အသက်ရှင်နေတဲ့အတွက် နှစ်သိမ့်မှုရစေဖို့ စာပို့လိုက်ပါတယ်။ ပိုကောင်းတဲ့ အနာဂတ် ရှိမယ်လို့ ဗျာဒိတ် ၂၁:၄ မှာ ကတိပေးထားတယ်။ ပိုသိနိုင်ဖို့ လင့်ပို့ပေးလိုက်ပါတယ်။”

ဆရာမတစ်ယောက်က “ကျေးဇူးပဲ။ သမီးက အရွယ်နဲ့မလိုက်အောင် ဉာဏ်ကြီးပါပေတယ်” လို့ စာပြန်တယ်။ နောက်ဆရာမတစ်ယောက်က ကျေးဇူးတင်ကြောင်း၊ ဖုန်းကနေ ဖတ်လို့ရတဲ့ ကျွန်ုပ်၏ ကျမ်းစာပုံပြင် စာအုပ် လိုချင်ကြောင်း၊ တစ်အုပ် ရှိပေမဲ့ ကျောင်းသားတစ်ယောက်ကို ငှားထားကြောင်း ပြောတယ်။ ဒါနဲ့ ကြေညာသူ ညီအစ်မငယ်က jw.org ကနေ ဒေါင်းလုတ်ဆွဲလို့ ရတဲ့အကြောင်း ရှင်းပြတယ်။

ကွီဗီဒိုမြို့နေ မောင်နှံတစ်စုံက ဖုန်းစာရင်းမှာပါတဲ့ သက်သေခံ မဟုတ်သူတွေဆီ စာပို့တယ်- “ကျွန်တော်က ယေဟောဝါသက်သေပါ။ ဒီကပ်ဘေးက ဒီနိုင်ငံရော တစ်ကမ္ဘာလုံးကိုပါ ထိခိုက်တဲ့အတွက် တစ်အိမ်တက်ဆင်း ဟောလို့ မရဘူး။ ဗီဒီယိုချိတ်ဆက်ပြီး ပြောချင်ပါတယ်။”

ဗီဒီယိုချိတ်ဆက်မှုနဲ့ တွေ့ဆုံဆွေးနွေးရတာကို လူတိုင်းလိုလို ကြိုက်ကြတယ်။ အရင်တုန်းက သက်သေခံတွေ လာဟောတာကို လက်မခံတဲ့ အမျိုးသမီးတစ်ယောက်က လူတွေကို နှစ်သိမ့်ပေးတဲ့အတွက် မောင်နှံစုံကို ချီးမွမ်းတယ်။ ကျေးဇူးတင်ကြောင်း၊ လက်ရှိ အခြေအနေကြောင့် စိတ်ညစ်နေရကြောင်း ပြောတယ်။ သက်သေခံ မောင်နှံက စိတ်ဖိစီးမှုမှ လွတ်မြောက်ခြင်း ခေါင်းစဉ်ရှိတဲ့ နိုးလော့! အမှတ် ၁၊ ၂၀၂၀ ကို PDF ပုံစံနဲ့ ပို့ပေးတယ်။ နောက်ထပ် စကားပြောခွင့်ရတဲ့အခါ အမျိုးသမီးက မဂ္ဂဇင်းအတွက် ကျေးဇူးတင်တယ်၊ အကြိမ်ကြိမ် ဖတ်တယ်လို့ ပြောပြတယ်။

စင်တို ဒိုမင်ဂို ဒီလော့စ်တာချီလပ်မြို့မှာ ဂျိုအင်နာလို့ခေါ်တဲ့ နားမကြား ညီအစ်မက ရုပ်ပုံတွေ ဆွဲတယ်။ a အဲဒီပုံတွေကို ဓာတ်ပုံရိုက်ပြီး နားမကြားတွေဆီ ဖုန်းနဲ့ ပို့ပေးတယ်။ သူတို့ထဲကတစ်ယောက်က နားကြားတဲ့ အမျိုးသမီး ဖြစ်နေတယ်။ ချက်ချင်း စာပြန်ပြီး သိချင်တာတွေ မေးတယ်။ ဂျိုအင်နာက မေးခွန်းတွေ နားမလည်တော့ ရောန်ဒါလို့ခေါ်တဲ့ နားကြားညီအစ်မနဲ့ ဆက်သွယ်ပေးလိုက်တယ်။

စိတ်ဝင်စားသူ အမျိုးသမီးက ဂျိုအင်နာပို့လိုက်တဲ့ ပုံကို သဘောကျတယ်လို့ ရောန်ဒါကို ပြောတယ်။ ကမ္ဘာ့အခြေအနေတွေအကြောင်း ရှင်းပြတဲ့ ကျမ်းချက်တွေ ရှိသေးလားလို့ မေးတယ်။ ရောန်ဒါက လုကာ ၂၁:၁၀၊ ၁၁ ကို ရှင်းပြတယ်။ ဆင်းရဲဒုက္ခတွေကို ဘုရားသခင် ဘာကြောင့် ဖြစ်ခွင့်ပြုထားသလဲ၊ ကမ္ဘာကို ဘုရားသခင် ဘာကြောင့် ဖန်ဆင်းခဲ့တာလဲ ဗီဒီယိုလင့်တွေ ပို့ပေးတယ်။ အဲဒီအမျိုးသမီးက ထပ်သိချင်နေတယ်။

အကျဉ်းကျနေချိန်မှာ “ဘုရားသခင်ရဲ့ နိုင်ငံတော်အကြောင်း စေ့စေ့စပ်စပ် သက်သေခံ” တဲ့ တမန်တော် ပေါလုလိုပဲ ညီအစ်ကိုတွေလည်း အိမ်တွင်း အောင်းနေရချိန်မှာတောင် အခွင့်အရေး ရှာပြီး ဟောပြောနေကြတယ်။—တမန်တော် ၂၈:၂၃။